भैरहवा– लुम्विनी सडकखण्डमा देखिएका विभिन्न समस्याले लुम्बिनीको पर्यटन प्रवर्धनमा अवरोध सिर्जना गरेको भन्दै लुम्बिनी सरोकार समितिका सदस्यहरुले मुख्यमन्त्री शंकर पोखरेलको ध्यानाकर्षण गराएका छन्।
लुम्विनी क्षेत्रका प्रदेशसभा सदस्य फकरुद्दिन खांनको नेतृत्वमा मंगलबार गएको सरोकारवाला टोलीले मुग्लिन—नारायणगढ र बुटवल–भैरहवा सडक विस्तारका कारण लामो समयदेखि प्रभावित लुम्बिनीको पर्यटनमा भर्खरै सुरु भएको भैरहवा—लुम्विनी सडक विस्तारले थप अप्ठेरो पारेको भन्दै समयमै सम्पन्न गर्नेगरी निर्देशन दिन आग्रह गरेका थिए।
सरोकारवालाहरुले ४ वर्षअघि ठेक्का भएको भैरहवा—लुम्बिनी सडकका ५ वटा पक्की पुलमध्ये तिनाउ र दानव नदीको पुल निर्माणमा ठेकेदारले गरेको ढिलासुस्तीका कारण घन्टौं सवारी आवागमनमा कठिनाइ हुन थालेको, जसका कारण लुम्बिनी घुम्न आउने पर्यटक घन्टौं जाममा फस्नुपर्ने अवस्था आएको, एम्बुलेन्सको प्रयोग गरेका बिरामीले समेत समयमा उपाचार पाउन नसकेको, सडक निर्माण र सिमेन्ट उद्योगहरुबाट निस्केको धुलोका कारण प्रदुषण बढेको, पर्यटन प्रवद्र्धनका लागि लुम्विनी गुरुयोजना क्षेत्र बाहिर भौतिक पूर्वाधारहरुको अभाव रहेको लगायतका समस्या मुख्यमन्त्री पोखरेलसमक्ष प्रस्तुत गरेका छन्।
उनीहरुले लुम्बिनी आउने हजारौं पर्यटकलाई स्वागत गर्न आफूहरु तयार रहे पनि सरकारले पर्यटनमैत्री भौतिक संचरनाहरु निर्माणमा सहयोग नगरेको गुनासो गरेका छन्। लुम्बिनी क्षेत्रका विभिन्न संघसंस्था, व्यवसायी, भिक्षु, आमा समूह र पत्रकारका प्रतिनिधिहरुले मुख्यमन्त्री समक्ष त्यस क्षेत्रका समस्या राखेका थिए।
टोलीले गराएको ध्यानाकर्षणपछि मुख्यमन्त्री पोखरेलले लुम्बिनीमा १० वर्षभित्र ५० लाख पर्यटक पु¥याउने लक्ष्यका साथ आफूहरु लागिपरेको बताए। उनले लुम्बिनीको पर्यटन प्रवद्र्धनमा देखिएका समस्याको चाँडो समाधान हुने आश्वासन दिलाए। मुख्यमन्त्री समक्ष लुम्बिनी सरोकार समितिका तर्फबाट पर्यटन व्यवसायी हेमबहादुर विष्ट, अकरामुद्दिन खान, भन्ते सागर धम्म लगायतले त्यस क्षेत्रका समस्या राखेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
