काठमाडौं– सरकारले १ तारेदेखि ५ तारे डिलक्स होटलसम्मको वर्गीकरणमा नयाँ मापदण्ड तय गरेको छ।
संस्कृति, पर्यटन तथा नागरिक उड्डयन मन्त्रालयले तारे होटलको वर्गीकरण मापदण्ड तय गरेको हो। नयाँ मापदण्डमा होटलको रुम संख्या, लबीको स्पेस, पार्किङ क्षेत्रदेखि जग्गाको समेत विषय समावेश गरिएको छ। यो मापदण्ड राजपत्रमा समेत प्रकाशन भई कार्यान्वयनको चरणमा रहेको मन्त्रालयले जनाएको छ।
यस्तो छ मापदण्ड
मन्त्रालयले सबै स्तरको तारे होटलको ल्याण्डस्केपिङ समान हुनुपर्ने मापदण्ड बनाएको छ। जसअनुसार होटल बलियो भू–धरातलमा बनेको हुनुपर्ने, खुल्ला र आकर्षक प्रवेशद्वार, मौसमी फूल फूल्ने बगैँचा, होटल परिसरभित्रै डुल्न, घुम्न र आराम गर्न मिल्ने सुविधा सहितको शान्त र मनोरञ्जनपूर्ण वातावरण हुनुपर्ने उल्लेख छ। साथै होटल परिसर पूर्ण रुपमा धुलो र धुँवामुक्त हुनुपर्नेछ।
४ तारेदेखि पाँच तारे डिलक्स होटलले कुल क्षेत्रफलको ४० प्रतिशतमा संरचना बनाउनुपर्ने र सबै स्तरका होटलले वातावरणीय प्रभाव मूल्यांकन (इआइए) गर्नुपर्ने मापदण्डमा छ।
साथै होटलले बनाउने संरचना भवन ऐन २०५५ तथा नियमावली २०६६ र राष्ट्रिय भवन संहिता २०६० अनुसार स्वीकृत भएको हुनुपर्नेछ। भवन आधुनिक र पुरानो भएको अवस्थामा मर्मत सम्भारदेखि ऐतिहासिक तथा सांस्कृतिक सम्पदा प्रतिबिम्बित हुनुपर्ने र ऐतिहासिक तथा सांस्कृतिक सम्पदालाई अवरोध नहुने प्रकृतिको बनाउने पर्नेछ।
यसैगरी होटलको प्रवेशद्वारमा नेपाली र अंग्रेजीमा स्पष्ट बुझिने गरी नाम हुनुपर्ने र होटलको सम्पूर्ण कागजपत्रमा समेत नाम खुलाउनुपर्ने मापदण्डमा उल्लेख छ। होटल कुन स्तरको वा कति तारे हो भनेर पनि खुलाउनु पर्नेछ।
पार्किङ क्षमता एक तारे होटलमा ५ वटा चार पांग्रे गाडी, २ तारेमा १० वटा, ३ तारेका हकमा १५, चारतारेमा २०, पाँच तारेको हकमा २५ र पाँच तारे डिलक्सा ४०सवारी अटने हुनुपर्ने मापदण्डमा उल्लेख छ। यसैगरी होटलले दिने सुविधा लबीबाटै थाहा पाउने गरी हुने उल्लेख हुनुपर्नेछ। ४ तारेभन्दा माथिका होटलले भने कम्तिमा ३० वटा देशको झन्डा राख्न मिल्ने पोल राख्नु पर्ने, अन्तर्राष्ट्रिय मापदन्डका खेलहरु खेल्न मिल्ने गरी बिहान ६ बजेदेखि बेलुका ८ बजेसम्म खेलकुदको सुविधा हुनु पर्नेछ।
यसैगरी ३ तारे वा सोभन्दा माथिल्लो स्तरको होटलेमा २४ घन्टा नै रुम सर्भिस दिनुपर्नेछ। साथै सबै स्तरको होटलसँग ग्राहकलाई बसपार्क र विमानस्थल पु¥याउने सुविधासम्पन्न साधन हुनुपर्नेछ भने ४ तारेदेखि माथिल्लो स्तरको होटलसँग भने कम्तिमा २ वटा सुविधासम्पन्न आफ्नै सवारी हुनुपर्ने नयाँ मापदण्ड बनाइएको छ।
ग्राहकको बहुमूल्य वस्तु राख्न रिसेप्सननजिकै लकर हुनुपर्ने र ४ तारे माथिको होटलको हकमा भने प्रत्येक रुममा लकर हुनुपर्नेछ। बत्तिको सुविधा २४ घन्टा नै हुनुपर्ने, प्रशोधित पानी हुनुपर्ने, आकाशे पानी भन्डारका प्रविधि जडान हुनुपर्ने र नियम अनुसार ढल निकासीको व्यवस्था हुनुपर्ने समेत मापदण्डमा उल्लेख छ। होटलको लबीको क्षमता १ तारेको हकमा १० जना, दुई तारेको हकमा १५, ३ तारेमा २०, ४ तारेमा ४०, पाँच तारेमा ६० र पाँच तारे डिलक्सको हकमा ८० जना अट्ने हुनुपर्नेछ।
सबैले देख्ने गरी कम्पनी दर्ता, उद्योग दर्ता, सञ्चालन इजाजत र ताराअंकित प्रमाणपत्र रिसेप्सननजिकै राख्नुपर्ने पनि मापदण्डमा उल्लेख छ। सुविधासम्पन्न महिला र पुरुषसहित अपांगमैत्री शौचालयसमेत हुनुपर्नेछ। रिसेप्सनमा बस्ने कर्मचारीले अंग्रेजी र नेपाली दुबै भाषामा बोलचाल गर्न सक्ने, गेष्टको लगेज रुम र पार्किङसम्म लगिदिने व्यवस्था हुनुपर्नेछ।
यसैगरी, आन्तरिक तथा बाह्य उडानको टिकटको व्यवस्था गर्न ट्राभल डेक्स राख्नुपर्ने, ३ घन्टीभित्र फोन उठ्नु पर्ने, भुक्तानी नगद, अनलाइन र क्रेडिट कार्डबाट हुने व्यवस्था मिलाउनुपर्ने, पत्रपत्रिका तथा पर्यटकसम्बन्धित जानकारीमुलक सामग्री होटलको क्षमताअनुसार हुनुपर्ने पनि मापदण्डमाउल्लेख छ।
यसैगरी ४ तारेभन्दा माथिल्लो स्तरको होटलमा धर्म अनुसारको प्राथना गर्ने वा सुन्ने कक्ष हुनुपर्नेछ।
मापदण्डसम्बन्धी विस्तृत जानकारीका लागि हेर्नुहोस्
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
