काठमाडौं– विश्वका विभिन्न देशबाट नेपाल भ्रमणमा आउने पर्यटकको संख्यामा कमी आएको छ।
सरकारले नेपाल भ्रमणमा आउने पर्यटकको संख्या बढाउँदै सन् २०२० मा २० लाख पर्यटक नेपाल भित्र्याउले लक्ष्यसहित भिजिट नेपाल २०२० को उद्घाटनसमेत गरिसकेको छ। तर, नेपाल भ्रमणमा आउने विदेशी पर्यटकको संख्या भने २०१५ पछि निरन्तर बढ्दै गएकोमा सन् २०१९ मा आएर घटेको हो।
अध्यागम विभागका सूचना अधिकारी रामचन्द्र तिवारीका अनुसार नेपाल आउने पर्यटकाे संख्या सन् २०१९ मा कूल ११ लाख ५२ हजार ५ सय १ पुगेको छ। ‘यो संख्या विभागले तयार पारेको प्रारम्भिक हो,’ उनले भने, ‘अब यसमा केही मात्रै तलमाथि हुन सक्छ।’
विभागले अहिले भारतबाट नागरिकता र विभिन्न परिचयपत्रमार्फत् त्रिभुवन अन्तर्राष्ट्रिय विमानस्थल हुँदै नेपाल आउने केही पर्यटको संख्यामा तलमाथि भएपनि सम्रगमा ११ लाख ५३ हजारको हाराहारीभन्दा माथि नपुग्ने जनाएको छ। विभागकै आधारमा ११ लाख ५३ हजार पर्यटक पुगे पनि यो संख्या सन् २०१८ को भन्दा कम हो। सन् २०१८ मा कूल ११ लाख ७३ हजार ७२ जना पर्यटक नेपाल भ्रमणमा आएका थिए।
सरकारले यो वर्ष १५ लाखको संख्यामा पर्यटक नेपाल भित्र्याउने लक्ष्य लिएको थियो। सन् २०१९ मा १५ लाख र सन् २०२० का २० लाख पर्यटक नेपाल भित्र्याउने लक्ष्यसहित सरकारले भिजिट नेपाल २०२० को उद्घाटन गरेको थियो। जनवरी १ मा नेपालबाट उद्घान भएको भिजिट नेपाल जनवरी ७ मा विश्वभर उद्घाटन भएकाे छ। तर, नेपाल भ्रमणमा आउने पर्यटकको संख्या घटे भने घटेको हो।
सन् २०१५ अप्रिलमा नेपालमा आएकाे भूकम्पका कारण सो वर्ष नेपाल भ्रमणमा आउने पर्यटकको संख्यामा कमी आएको थियो। त्यसपछि भने निरन्तररुपमा बढी रहेको पर्यटक आगमन अहिले आएर घटेको हो।
सन् २०१८ मा मात्रै सन् २०१७ को तुलनामा पर्यटकको आगमन संख्यामा २५ प्रतिशतले बढेको थियो। तर, सन् २०१९ मा भने सन् २०८ को तुलनामा २० हजारको संख्यामा पर्यटक आगमन घटेको छ।
योसँगै सरकारलाई सन् २०२० मा पर्यटक संख्या २० लाख पुर्याउन थप चुनौती थपिएको छ। सन् २०१९ मा नेपाल भ्रमणमा आएको पर्यटकको संख्यामा सन् २०२० मा २० लाख पुर्याउन ८ लाख ४७ हजारले बढाउनुपर्ने देखिएको छ। यो संख्यामा पुग्न सन् २०१९ मा नेपाल भ्रमणमा आएका पर्यटकको संख्यामा ७३ प्रतिशतले आगमन बढाउनुपर्ने हुन्छ।
पाँच वर्षको पर्यटक आगमन
सन् २०१५ मा नेपाल भ्रमणमा आउने पर्यटकको संख्या ५ लाख ३८ हजार ९ सय ७० थियो। यो वर्ष नेपालमा आएको भूकम्पको कारण पर्यटक आगमन सन् २०१४ को तुलनामा ३२ प्रतिशतले कमी आएको थियो। त्यसपछि भने विस्तारै पर्यटक आगमनमा सुधार आएको थियो।
सन् २०१६ मा सन् २०१५ को तुलनामा ४० प्रतिशतले बढेर पर्यटक आगमन ७ लाख ५३ हजार २ पुगेको थियो।
यसैगरी सन् २०१७ मा पनि सन् २०१६ को तुलनामा पर्यटक आगमन २५ प्रतिशतले पर्यटक आगमन बढेर ९लाख ४० हजार २ सय १८ पुगेको थियो। साथै सन् २०१८ मा पनि सन् २०१७ को तुलनमा पर्यटक आगमन २५ प्रतिशतले नै बढेर ११ लाख ७३ हजार ७२ पुगेको थियो। यो वर्ष सन् २०१९ मा सन् २०१८ को तुलनामा पर्यटक आगमन १ दशमलव ७५ प्रतिशतले घटेको ११ लाख ५२ हजार ५ सय १ मात्रै छ।
तस्बिर : नेपाल पर्यटन बाेर्ड
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
