लगातार ४ खेल हारेर बाहिरियो साविक विजेता पोखरा

स्पोर्टस लाइभ

लगातार ४ खेल हारेर बाहिरियो साविक विजेता पोखरा धनगढीले ५ विकेटले हरायो

नेपाल लाइभ सोमबार, पुस ७, २०७६ १४:०९

पोखरा- पोखरा प्रिमियर लिग (पिपिएल) टी ट्वान्टी क्रिकेटको १३औँ खेलमा धनगढी ब्लुजले पोखरा पल्टनलाई ५ विकेटले हराएको छ। हारसँगै पहिलो पिपिएलको विजेता पोखरा यसपटक लिग चरणबाट बाहिरिएको छ।

८० रनको सामान्य लक्ष्य धनगढीले ९.१ ओभरमा ५ विकेट जाँदा पूरा गरेको हो। जितपछि प्ले अफमा पुग्ने धनगढीको सम्भावना बाँकी नै छ। अब लिग चरणका दुई खेल बाँकी छन्। जसमा चितवन र काठमाडौंबीच मंगलबार साथै विराटनगर र बुटवलबीच बुधबार खेल हुनेछ।

अहिलेसम्म चारमा चारै खेल जितेको चितवन ८ अंक तालिकाको शीर्ष स्थानमा छ। चार खेलमा तीन खेल जितेको बुटवल ६ अंकसहित दोस्रो स्थानमा छ। चितवन र बुटवल प्लेअफमा पुगिसकेका छन्।

पोखराले पहिलो खेलमा काठमाडौंलाई ९ विकेटले हराएको थियो। दोस्रो खेलमा चितवनसँग ६ विकेटले हारेको पोखरा तेस्रो खेलमा विराटनगरसँग ४५ रनले हारेको थियो। चौथो खेलमा पोखरा बुटवलसँग ८ विकेटले हारेको थियो।

यस्तै धनगढीले पहिलो खेलमा विराटनगरलाई ५ रनले हराएको थियो। धनगढी दोस्रो खेलमा काठमाडौंसँग १ सय ६ रनले हारेको थियो। तेस्रो खेलमा चितवनसँग ५२ रनले हारेको धनगढी चौथो खेलमा बुटवलसँग ७ विकेटले हारेको थियो।

सोमबार पोखराविरुद्ध ८० रनको लक्ष्य पछ्याएको धनगढीका लागि ओपनिङमा आएका रोड्रिगो थोमसले १० बलमा १५ रन बनाए। कप्तान दिपेन्द्र सिंह ऐरी १० बलमा १३ रन बनाउँदा आउट भए। दीपक पुनियाले १६ बलमा २५ रन बनाए। सुभेन्दु पाण्डेले ९ बलमा ११ रन बनाए।

यसअघि टस जितेर ब्याटिङ रोजेको पोखराले सुरुदेखि नै सम्हालिएर ब्याटिङ गर्न सकेन र सामान्य रनमा आउट हुन पुग्यो। १६.३ ओभर ब्याटिङ गरेको पोखराले ७९ रन बनाउँदा सबै विकेट गुमाएको हो। जुन प्रतियोगिताकै सबैभन्दा कम योगफल हो।

पोखराका लागि ओपनिङ ब्याटिङमा आएका कुशल भुर्तेलले ७ बलमा ६ रन बनाए। एक छक्का हानेका उनी कमल सिंह ऐरीको बलमा क्याच आउट भएका थिए। अर्का ओपनर आसिफ शेखले २९ बलमा ३२ रन बनाए। उनले ४ चौका हाने।

कप्तान शरद भेषावकर ३ बलमा ४ रन हान्दा हिट विकेट भए। रवि इन्दर सिंह २ बल खेलेर शून्यमै आउट भए। बिनोद भण्डारी १५ बलमा १२ रन हानेर आउट भए। ६ बलमा २ रन हानेका कुशल मल्ल रन आउट भए।

रोहित कुमार पौडेल ३ बल खेल बिना रन आउट भए। प्रथमेस डाके ५ बलमा २ रन हान्दा अनिलको बलमा बोल्डआउट भए।

धनगढीका अनिल खरेलले तीन, दीपक पुनिया, कमल सिंह ऐरी र सागर ढकालले दुई–दुई विकेट लिए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

सत्य निरुपण र बेपत्ता आयोगका पदाधिकारी नियुक्त

बेरूजु निरन्तर बढ्दो, राजस्व छुटको तथ्याङ्क संसद्मा पेस गरेर पारदर्शिता कायम गर्न सुझाव

विद्यालयमा हाजिरीविनै दिवा खाजामा २७ करोड खर्च