पोखरा- पोखरा प्रिमियर लिग (पिपिएल) टी ट्वान्टी क्रिकेटको १३औँ खेलमा पोखरा पल्टनले धनगढी ब्लुजलाई ८० रनको लक्ष्य दिएको छ। टस जितेर ब्याटिङ रोजेको पोखराले सुरुदेखि नै सम्हालिएर ब्याटिङ गर्न सकेन।
१६.३ ओभर ब्याटिङ गरेको पोखराले ७९ रन बनाउँदा सबै विकेट गुमाएको हो। जुन प्रतियोगिताकै सबैभन्दा कम योगफल हो।
पोखराका लागि ओपनिङ ब्याटिङमा आएका कुशल भुर्तेलले ७ बलमा ६ रन बनाए। एक छक्का हानेका उनी कमल सिंह ऐरीको बलमा क्याच आउट भएका थिए। अर्का ओपनर आसिफ शेखले २९ बलमा ३२ रन बनाए। उनले ४ चौका हाने।
कप्तान शरद भेषावकर ३ बलमा ४ रन हान्दा हिट विकेट भए। रवि इन्दर सिंह २ बल खेलेर शून्यमै आउट भए। बिनोद भण्डारी १५ बलमा १२ रन हानेर आउट भए। ६ बलमा २ रन हानेका कुशल मल्ल रन आउट भए
रोहित कुमार पौडेल ३ बल खेल बिना रन आउट भए। प्रथमेस डाके ५ बलमा २ रन हान्दा अनिलको बलमा बोल्डआउट भए।
धनगढीका अनिल खरेलले तीन, दीपक पुनिया, कमल सिंह ऐरी र सागर ढकालले दुई–दुई विकेट लिए।
यो पोखरा र धनगढी दुवैको लिग चरणको अन्तिम खेल हो। यसपछि लिग चरणका दुई खेल बाँकी हुनेछन्। जसमा चितवन र काठमाडौंबीच मंगलबार साथै विराटनगर र बुटवलबीच बुधबार खेल हुनेछ।
अहिलेसम्म चारमा चारै खेल जितेको चितवन ८ अंक तालिकाको शीर्ष स्थानमा छ। चार खेलमा तीन खेल जितेको बुटवल ६ अंकसहित दोस्रो स्थानमा छ। चितवन र बुटवल प्लेअफमा पुगिसकेका छन्।
चार खेलमा दुई हार र दुुई जितसहित ४ अंक भएको काठमाडौं तेस्रो स्थानमा छ। समान दुई–दुई अंक रहेका विराटनगर, पोखरा र धनगढी क्रमशः चौथौ, पाँचौँ र छैठौँ स्थानमा छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
