काठमाडौं- भारतबाट चोरी गरेर ल्याइएको टोयोटा ‘फर्चुनर’ कार वैधानिक बनाइ बिक्री गर्ने खोज्ने गिरोहविरुद्ध राजस्व अनुसन्धान विभागले मुद्दा दायर गरेको छ। विभागले चोरीका फर्चुनरमा नम्बर प्लेट राखी बिक्री गर्न खोज्नेविरुद्ध ३ करोड ३५ लाख रुपैयाँ विगो दाबीसहित जिल्ला अदातल काठमाडौंमा मुद्दा दायर गरेको हो।
राजस्व अनुसन्धान विभागको टोलीले कात्तिक ६ गते २०१९ मोडलका भारतबाट चोरी गरि ल्याइएका दुईवटा टोयोटा फर्चुनरमा नेपाली नम्बर प्लेट राखेर बिक्री गर्ने तयारी गरिरहेको अवस्थामा फेला पारेको थियो। उक्त दुईवटा कार किर्ते गरि बिक्री गर्न खोज्ने ६ जनाविरुद्ध यही मंसिर २० गते मुद्दा दायर गरेको हो। एउटा गाडीमा ५ जना र अर्को गाडीमा ६ जनालाई विपक्षी बनाई मुद्दा दायर गरेको हो। एउटा गाडीको विगो १ करोड ७२ लाख कायम गरिएको छ।
यो मुद्दामा नुवाकोट विदुरका रञ्जित श्रेष्ठ, सन्तबहादुर ओझा र सन्तोष राई, वीरगन्ज ३ पर्साका निजामुद्धिन, आठराई तेह्रथुमका अभयराज घिमिरे र बैतडीका कृष्णानन्द भट्टलाई विपक्षी बनाइएको छ। यीमध्ये अभयराज घिमिरे भने गाडी खरिद गर्न लागेको पाइएको विभागले जनाएको छ। त्यस्तै अर्को गाडीमा भने अभयराज घिमिरेबाहेक पाँच जनालाई विपक्षी बनाई १ करोड ६३ लाख रुपैयाँ विगो दाबी गरिएको छ। विभागले दुवै गाडी जफत गरि विगो र त्यसमा दुई गुणा जरिवानासहित मुद्दा दायर गरेको हो।
विभागले अनुसन्धानका क्रममा चोरीका सवारीमा नम्बर प्लेट लागाई बिक्री गर्ने तयारी गरेको अवस्थामा पक्राउ गरेको थियो। पक्राउपछि विभागले थप अनुसन्धान गरि जिल्ला अदालत काठमाडौंमा मुद्दा दायर गरेको महानिर्देशक दीर्घराज मैनालीले जानकारी दिए। ‘राजस्व छलीका यस्ता गतिविधिमाथि विभागले निगरानी बढाएको छ,’ उनले भने ‘शंका लागेका अन्य क्षेत्रमा समेत अनुसन्धान गरिरहेका छौं।’
भारतबाट ल्याइएका दुईवटा फर्चुनर कार यातायात व्यवस्था कार्यालय साना÷ठूला सवारी, एकान्तकुनामा दर्ता गरेको पाइएको थियो। तर, ती गाडीमा जुन नम्बर राखिएका छन्, कार्यालयको रेकर्डमा भने अर्कै गाडी दर्ता थियो। चोरी गरि ल्याइएका दुई टोयोटा फर्चुनरमा बा२१च ५५६२ र बा२१च ४७१६ नम्बर प्लेट राखिएको थियो। कार्यालयको रेकर्डअनुसार बा२१च ५५६२ नम्बरमा महिन्द्रा कम्पनीको ‘स्कर्पियो’ गाडी दर्ता भएको थियो।
त्यस्तै, चोरीको फर्चुनरमा लगाइएको अर्को नम्बर बा२१च ४७१६ यातायात कार्यालयको रेकर्डमा मारुती सुजुकीको ‘अल्टो८००’ कार दर्ता भएको थियो। यी दुबै गाडी एकान्तकुना कार्यालयबाट धनगढी र पोखरा कार्यालयमा सरुवा सहमति लिएर गएको देखिन्छ। यसरी दर्ता भएको सवारी अर्को कार्यालयमा सरुवा सहमति लिएर गएको नम्बरमा टोयोटाको फर्चुनर गाडी दर्ता हुनुले यसमा कार्यालयको समेत मिलेमतो रहेको अनुसन्धानमा संलग्न अधिकारी बताउँछन्।
तर राजस्व अनुसन्धान विभागका अनुसार सरुवा सहमति लगिएको भए पनि नयाँ गाडीको फाइल खडा नभइसकेकाले यातायात कार्यालयका कर्मचारीको संलग्नता देखिएको छैन। भारतबाट चोरेर ल्याइएका पौने २ करोड रुपैयाँ ९प्रतिगाडी० पर्ने ती गाडी नेपाल प्रवेश गर्दा एक–दुई दिनका लागि तोकिएको दस्तुर तिरी ल्याइएको थियो। लामो अनुसन्धानपछि राजस्व अनुसन्धान विभागले ती गाडी नियन्त्रणमा लिन सफल भएको थियो। कात्तिक ६ को मध्यराति गाडीसहित पक्राउ परेका ३ जना व्यक्तिका आधारमा संलग्न अन्यलाई पक्राउ गरि अनुसन्धानपछि विभागले मुद्दा दायर गरेको हो।
चोरीका टोयोटा 'फर्चुनर' वैधानिक प्रकरण-२ : २५ लाख भारुमा किनेर प्रतिगाडी ६० लाख रुपैयाँमा 'डिल'
पौने २ करोड पर्ने चोरीको टोयोटा 'फर्चुनर' यसरी बनाइयो वैधानिक
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786800305.jpg)
-1786801195.jpg)
-1786800311.jpg)
-1786602170.png)
-1786513116.png)
