पोखरा– सुदूरपश्चिमका भुइँमान्छेका कथालाई लेखनको विषयवस्तु बनाउँदै आएका कवि हेमन्त विवश बिहीबार पोखरामा सुदूरपश्चिमकै सुवास छर्दै थिए।
अलिमियाँ लोक वाङ्मय प्रतिष्ठानको आयोजनामा भएको एकल कविता वाचन ‘पोखरामा सुदूरपश्चिमेली सुवास’ मा विवशले दुई दर्जन कविता सुनाए।
पार्दीस्थित नेपाल पर्यटन बोर्डको हलमा ‘आमा’ शीर्षकको कविताबाट वाचन सुरु गरेका उनले गीत पनि सुनाए । जीवनको पहिलो एकल वाचनमा उभिँदा ज्यादै भावुक बनेका उनले गद्यका साथै छन्द कविताको स्वाद पनि पस्किएका थिए।
विवशका कविता सुन्दा सुदूरपश्चिम पुगेको अनुभूति भयो । ‘सरल अनि कलात्मक कविता सुनिरहूँ झैं लाग्यो’, कविता सुन्न आइपुगेका गाउँ पर्यटन प्रवद्र्धन मञ्च पोखराका संस्थापक अध्यक्ष तारानाथ पहारीले भने।
वाचनपछि कवितामाथि टिप्पणी गर्दै प्रकट पगेनी शिव र पद्मराज ढकालले विवशका कविता हेपिएका मान्छेको आवाज भएको बताए । कार्यक्रममा लोकगायिका हरिदेवी कोइराला र पत्रकार अमृत भादगाउँलेले पनि विवशका कविताबारे बोलेका थिए।
छन्द कविता लेखन मार्फत साहित्यमा प्रवेश गरेका विवश पछिल्लो समय गद्य कविता लेखनका साथै सांस्कृतिक अध्ययनमा जुटेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
