बर्लिन- जर्मनी र फ्रान्सले सिरियामा युद्धविरामका लागि ‘अधिकतम दबाब’ दिन रसियालाई आग्रह गरेका छन्।
जर्मन चान्सलर एङ्गेला मर्केल र फ्रान्सका राष्ट्रपति इम्यानुएल म्याक्रोँले रसियाली राष्ट्रपति भ्लादिमिर पुटिनलाई फोन गरी सिरियाको गुटा क्षेत्रमा पछिल्लो समय सयौँको ज्यान जानेगरी भएको द्वन्द्वबारे ध्यानाकर्षण गराउँदै सिरियामा जारी तनाव तत्काल रोक्न दवाव दिन आग्रह गरेको जर्मन चान्सलर मर्केलको कार्यालयले आइतबार जनाएको छ।
शक्तिशाली युरोपेली नेताहरूले फोनवार्तामा संयुक्त राष्ट्रसंघको मध्यस्थतामा घोषणा गरिएको युद्धविरामलाई कार्यान्वयनमा लान आग्रह गरेका थिए।
उनीहरुले सिरियाली सरकारलाई युद्धविरामका लागि अधिकतम दवाव दिई हवाई तथा स्थल आक्रमण गर्नबाट रोक्न रसियाली पहलबारे छलफल गरेका हुन्।
यसअघि म्याक्रोँ र मर्केलले रसियाली राष्ट्रपति भ्लादिमिर पुटिनलाई आक्रमणलाई रोक्न पत्र लेखी औपचारिक आह्वान गरेको फ्रान्सको राष्ट्रपति कार्यालयले शुक्रबार विज्ञप्ति जारी गरी जनाएको थियो।
युरोपियन युनियन (इयू) सम्मेलनमा सहभागी हुने सिलसिलामा ब्रसेल्स पुगेका जर्मनी र फ्रान्सका नेताले रसियालाई पत्राचार गरेका हुन्।
जर्मनी र फ्रान्सले गुटामा मानवीय सहयोग पुग्न नसक्दा यस क्षेत्रका बासिन्दालाई खाद्यान्न तथा अन्य अतिआवश्यकीय सामग्रीको चरम अभाव भएको भन्दै कम्तिमा पनि ३० दिन लामो युद्धविरामका लागि पहल गर्न आग्रह गरेका थिए।
रसियाको समर्थन प्राप्त सिरियाली राष्ट्रपति बसर अल असद सरकार नेतृत्वको सेनाले विगत केही समय यता गुटा क्षेत्रमा कारबाही चलाउँदा सयौँ सिरियाली सर्वसाधारणको मृत्यु भएको छ। उक्त क्षेत्र सिरियाली विद्रोहीको आधार क्षेत्र मानिन्छ। बेलायतस्थित सिरियाली मानवअधिकारवादी संस्थाका अनुसार विगत केही दिनमा सरकारी सेनाले चलाएको हवाई कारबाहीमा कम्तिमा ७ सय सिरियाली नागरिकको मृत्यु भएको छ।
सिरियामा सन् २०११ देखि शुरु भएको द्वन्द्वका कारण ३ लाख २० हजारभन्दा बढी सिरियालीको ज्यान गुमेको संयुक्त राष्ट्रसंघको तथ्यांक छ। द्वन्द्वका कारण झन्डै आधा जनसंख्या विस्तापित बनेको छ। एएफपी
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
