काठमाडौं– केपी शर्मा ओली नेतृत्वको सरकारमा संघीय समाजवादी फोरम नेपाल र राष्ट्रिय जनता पार्टी (राजपा) सहभागी हुने चर्चा चलिरहेकै बेला राजपा संयोजक महन्थ ठाकुरले आफूहरू सरकारमा जाने विषयमा कुनै औपचारिक छलफल नै नभएको बताएका छन्।
शुक्रबार पार्टी कार्यालयमा बसेको अध्यक्ष मण्डलको बैठकमा ठाकुरले वर्तमान सरकारका सत्ता सहयात्रीले राजपासँग कुनै औपचारिक वार्ता नगरेको भन्दै ‘राजपा सरकारमा जाने’ भन्ने हल्लाको पछाडि नदौड्न आग्रह गरेका थिए।
शुक्रबार बैठकमा सहभागी नेता राजेन्द्र महतोले भने, ‘बैठकमा संयोजक ठाकुरले अहिलेकै अवस्थामा सरकारमा सहभागी नहुने कुरा स्पष्ट पार्नुभयो।’
शनिबार काठमाडौंमा आयोजित साक्षात्कार कार्यक्रममा राजपा अध्यक्ष मण्डलका एक नेता अनिल झाले पनि संविधान संशोधन नभएसम्म राजपा सरकारमा नजाने दाबी गरेका थिए।
उपेन्द्र यादव नेतृत्वको फोरमसँग वाम गठवन्धनले सहमति गर्न लागेको समाचार बाहिरिए लगत्तै उनले राजपा सरकारमा जाने विषयमा कुनै कुरा नभएको जनाउ दिएका हुन्।
नेकपा एमाले र माओवादी केन्द्रबीच पार्टी एकताका लागि प्रधानमन्त्री निवास बालुवाटारमा संवाद भइरहँदा फोरम अध्यक्ष उपेन्द्र यादव पनि बालुवाटार प्रवेश गरेका थिए। यसले फोरम सरकारमा सहभागी हुने आँकलन गरिएको थियो।
फोरम अध्यक्ष यादवले पनि संविधान संशोधन लगायतका कुरामा सहमति नभए आफू सरकारमा नजाने बताइसकेका छन्। फोरमले वाम गठबन्धनसँग अघि सारेको संशोधन सहितको प्रस्तावमा विगत दुई दिनयता ठोस छलफल समेत हुन नसकेको नेताहरूको भनाइ छ।
पछिल्लो समय वाम गठबन्धनले फोरमलाई सरकारमा ल्याउन पहल गरिरहेको छ। सम्बद्ध स्रोतका अनुसार वाम गठवन्धनले फोरमलाई दुई वटा मन्त्रालयको समेत प्रस्ताव गरिसकेको थियो। एमाले र माओवादीसँग कुरा भएकै आधारमा वाम गठवन्धनले २ नम्बर प्रदेशमा फोरमका मुख्यमन्त्रीलाई समर्थन गरेको नेताहरूको दाबी छ।
राजपाको शुक्रबार बसेको बैठकमा फोरम नेपालले आफूहरूसँग कुनै छलफल नगरेको कुरा नेताहरुले उठाएका थिए। राजपालाई नसोधी फोरम नेपाल केन्द्रीय सरकारमा गएको खण्डमा कसरी अगाडि बढ्ने भन्ने विषयमा राजपाभित्र छलफल चलिरहेको नेता महतोले जनाए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
