एजेन्सी- ब्राजिलियन युवा फरवार्ड रोड्रिगोले गालाटासारेविरुद्धको खेलमा ह्याट्रिक गर्दै रियल मड्रिडलाई जित दिलाएका छन्।
च्याम्पियन्स लिगअन्तर्गत ग्रुप 'ए' अन्तर्गत गएराति भएको खेलमा उनले किर्तिमानी ह्याट्रिक गरेका हुन्। १८ वर्षीय रोड्रिगो रियल मड्रिडबाट च्याम्पियन्स लिगमा सबैभन्दा कम उमेरमा ह्याट्रिक गर्ने राउलपछि दोस्रो खेलाडी बनेका छन्।
ब्राजिलियन क्लब सान्तोसबाट स्पेन पुगेका रोड्रिगोलाई हाल पेरिस सेन्ट जर्मेन स्टार नेमारसँग तुलना गर्न थालिएको छ। एकै देशका तथा कम उमेरमै यो सफलता हासिल गरेका कारण पनि रोड्रिगोलाई 'नयाँ नेमार'को संज्ञा दिइएको हो। 'समर स्विच'मा रियल मड्रिड छिरेका रोड्रिगो र नेमारको उचाइसमेत समान ५ फिट ९ इन्च छ।
गएराति रोड्रिगोको ह्याट्रिकलाई 'पर्फेक्ट ह्याट्रिक' भनिएको छ। योसँगै रियलका लागि उनको गोल संख्या ५ पुगेको छ। जसका लागि उनले ६ खेल मात्रै खेलेका छन्।
'बर्नबाउका लागि मेरो नाम छनोट हुनु नै सपना पूरा हुनु हो,' खेलपछि प्रतिक्रिया दिँदै रोड्रिगोले भने, 'म धेरै खुसी र हौसिएको छु। यो रात सौहार्दपूर्ण हुनेछ। तर, म शान्त रहन कोशिस गर्नेछु।'
खेलको चौथो मिनेटमै रियललाई सुरुवाती अग्रता दिलाउँदा रोड्रिगोलाई घरेलु दर्शकले उच्च सम्मान प्रकट गरेका थिए। आफ्नै देशका 'लेफ्ट फुटेड' मार्सेलोको पासमा उनले गोलको खाता खोलेका हुन्।
.jpg)
यही जुगलबन्दीमा अर्को गोल हुन बर्नबाउ रंगशालाले मात्र ३ मिनेट कुर्नुपर्यो। मार्सेलोको अर्को क्रसमा रोड्रिगोको हेड बलले जाली चुमेको थियो। च्याम्पियन्स लिगको कुनै पनि खेलमा पहिलो ७ मिनेटभित्र २ गोल गर्ने उनी पहिलो खेलाडीसमेत बनेका छन्।
गालाटासारेका स्टेभन जोन्जीले टोनी क्रसलाई डि-बक्स एरियाभित्र फउल गरेपछि कप्तान सर्जियो रामोस आफैं पेनाल्टी प्रहार गर्न उत्रिएपछि रोड्रिगोले तत्कालै ह्याट्रिक गर्ने मौका गुमाएका थिए।
पहिलो हाफको अन्तिम मिनेटमा रोड्रिगोको एसिस्टमा फ्रान्सेली स्टार करिम बेन्जिमाले गोल गरेपछि रियल ४ गोलले अघि बढेको थियो।
खेलअवधिभर ६९ प्रतिशत समय बल आफ्नो पक्षमा पारेको रियलले दोस्रो हाफमा पनि दबाबलाई कायम राख्यो।
खेल सकिन ९ मिनेट बाँकी रहँदा कार्भाजेलको क्रसमा बेन्जिमा पुनः गोल गर्न सफल भएपछि खेलमा पुनः रङ थपियो। अतिरिक्त समयको दोस्रो मिनेटमा चतुर खेल पस्कँदै रोड्रिगोको 'फाइनल टच' गालाटासारेका गोलकिपर मुसलेरालाई छक्काउँदै सुस्त गतिमा गोलपोष्ट छिरेको थियो। रोड्रिगोले च्याम्पियन्स लिगको दोस्रो सहभागीतामै 'पर्फेक्ट ह्याट्रिक' गर्न सफल भएका हुन्।
उनी छिट्टो सिक्न सक्छन् : जिदान
१८ वर्षीय युवा खेलाडीको सम्झनलायक प्रदर्शनपछि रियल म्यानेजर जिनेदिन जिदानले उनले छिट्टै सिकेको प्रतिक्रिया दिए।
'उनको प्रदर्शनलाई लिएर मलाई अचम्म लागेन,' जिदानले भने, 'किनकी उनीसँग सबै किसिमको खेल कौशल छ। उनी तीक्ष्ण छन् र छिट्टो सिक्न सक्छन्। सिक्न र गल्ति सुधार्न पनि उनमा उत्कट चाहना छ।'
शारीरिक रुपमा 'स्ट्राटजी' बनाउन उनले मेहनत गर्नुपर्ने बताउँदै जिदानले भने, 'प्राविधिक रुपमा बललाई कुन रुपमा दिशा दिनुपर्छ भन्नेमा उनी अब्बल छन्।'
'मैदानमा रोड्रिगो डरमुक्त भएर खेलेको मन पर्छ'
गएराति रोड्रिगोको एसिस्टमा एक गोल गरेका बेन्जिमाले उनी डरमुक्त भएर खेल्ने गरेको बताए। 'रोड्रिगो १८ वर्षका मात्रै भए तर उनी डरमुक्त भएर खेल्छन्,' बेन्जिमाले थपे, 'मलाई युवा फुटबलरले यही तरिकाबाट खेलेको मन पर्छ।'
यसअघि सन् २००४ मा म्यानचेस्टर युनाइटेडका स्ट्राइकर वायन रोनीले १८ वर्षकै उमेरमा टर्किस क्लब फेनेरबाचविरुद्ध ह्याट्रिक गरेका थिए। त्यो उनको म्यान्यूका लागि डेब्यू खेलसमेत थियो।
जितसँगै रियल मड्रिड ७ अंकसहित ग्रुप 'ए'को दोस्रो स्थानमा यथावत छ। पहिलो स्थानमा रहेको पेरिस सेन्ट जर्मेन रियलभन्दा ५ अंकले माथि छ। जितसँगै रियल म्यानेजर जिदानमाथिको दबाब केही कम भएको मानिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1752222253.png)
-1752043710.jpg)
-1749826086.png)
