काठमाडौं- अमेरिकाले जलवायु परिवर्तनसम्बन्धी पेरिस सम्झौताबाट अलग्गिएको राष्ट्रसंघलाई औपचारिक जानकारी गराएको छ।
सम्झौताबाट बाहिरिन अमेरिकाले संयुक्त राष्ट्रसंघलाई मङ्गलबार औपचारिक पत्र पठाएको हो।
अमेरिकी विदेशमन्त्री माइक पोम्पेओले संयुक्त राष्ट्रसंघका महासचिव एन्टोनियो गुटर्रेसलाई मङ्गलबार पत्र लेखेर औपचारिक रुपमै जानकारी गराएका हुन्।
‘महासचिव गुटर्रेसले संयुक्त राज्य अमेरिकाले सन् २०१५ डिसेम्बर १२ मा गरेको पेरिस सम्झौताबाट हट्न अमेरिकाले पठाएको पत्र प्राप्त गर्नुभएको छ,’ संयुक्त राष्ट्रसंघका महासचिवका प्रवक्ताले भने।
सम्झौतामा भएका प्रावधानहरुको पालना गर्न नसक्ने अमेरिकाले बताउँदै आएको थियो। सम्झौतामा भएका कतिपय प्रावधानका कारणले अमेरिकालाई अनावश्यक रुपमा आर्थिक भार थपेको अमेरिकाको भनाई थियो।
सन् २०१६ को अप्रिल २२ मा सो सम्झौतामा अमेरिकाले हस्ताक्षर गरेको थियो। करिब एक महिनाअघि नै अमेरिकाको सम्झौताबाट बाहिरिनेबारे संयुक्त राष्ट्रसंघलाई अमेरिकाले जानकारी गराएको थियो। विदेशमन्त्री पोम्पेओले राष्ट्रसंघलाई यस बारेमा औपचारिक रुपमा नै जानकारी दिएका थिए।
जालवायु परिवर्तनका क्षेत्रमा ऐक्यबद्ध भएर लड्ने प्रतिबद्धता व्यक्त गरिएको सो सम्झौतामा अमेरिकासहितका विश्वका १ सय ८८ देश सहभागी छन्। अब अमेकिा उक्त सम्झौताबाट अलग भएको कुरा औपचारिक रुपमै कार्यान्वयनमा आउने छ।
क्षति
अमेरिका जलवायू परिवर्तनसम्बन्धी पेरिस सम्झौताबाट बाहिरिँदा पर्ने असर के हो त? यसको यकिन अहिले नै गर्न सकिने अवस्था छैन तर सन् २०१८ मा एउटा संस्थाले गरेको अध्यनले यसले पेरिस सम्झौतामा धेरै असर पुर्याउने देखाएको थियो।
इन्स्टिच्युट अफ इन्टरनेसनल एन्ड युरोपिअन अफेअर्सले सार्वजनिक गरेको प्रतिवेदनमा सम्झौताबाट अमेरिकाको बहिर्गमनले अन्य राष्ट्रलाई पनि त्यसै गर्न उक्साउने उल्लेख गरिएको छ।
खासगरी अमेरिकी राष्ट्रपति डोनाल्ड ट्रम्प उक्त सम्झौताको विपक्षमा छन्। ट्रम्पले सम्झौताबाट बाहिरिने निर्णय गरे पनि २०२० को राष्ट्रपतीय निर्वाचनबाट नयाँ राष्ट्रपति आए यसमा फेरबदल पनि हुन सक्ने आँकलन गरिएको छ।
दुःख व्यक्त
पेरिस सम्झौताबाट बाहिरिने अमेरिकी निर्णयप्रति फ्रान्सका राष्ट्रपति इम्यानुएल म्याँक्रोले दुःख व्यक्त गरेका छन्। चीनको औपचारिक भ्रमणमा रहेका उनले अमेरिकाको यो निर्णयपछि जलवायु परिवर्तनका क्षेत्रमा अब चीन र फ्रान्सको विशेष साझेदारिता आवश्यक भएको बताए।
‘अमेरिकाको यो निर्णयले हामीलाई निकै दुःख लागेको छ र मलाइ लाग्छ अब विश्वमा जलवायू परिवर्तन तथा जैविक विविधताको क्षेत्रमा फ्रान्स र चीनको अलग्गै साझेदारिताको आवश्यकता रहेको छ,’ उनले भनेका छन्। उनले आफू र चिनियाँ राष्ट्रपति सी चिनफिङबीच जलवायु परिवर्तनका विषयमा विशेष सम्झौता हुने पनि बताए। -एजेन्सीको सहयोगमा
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
