काठमाडौं- भारतबाट चोरी गरेर ल्याइएको जापानी कार उत्पादक कम्पनी टोयोटाको 'फर्चुनर' कार वैधानिक बनाउन खोजेको भेटिएको छ।
भारतबाट ल्याइएको '२०१९' मोडलको दुईवटा फर्चुनर कार यातायात व्यवस्था कार्यालय साना/ठूला सवारी, एकान्तकुनामा दर्ता गरेको पाइएको हो। तर, ती गाडीमा जुन नम्बर राखिएको छ, कार्यालयको रेकर्डमा भने अर्कै गाडी दर्ता छ।
कार्यालयको रेकर्डअनुसार बा२१च ५५६२ नम्बरमा महिन्द्रा कम्पनीको 'स्कर्पियो' गाडी दर्ता भएको देखिन्छ। भारतबाट चोरेर ल्याइएका दुई फर्चुनरमध्ये एक सोही नम्बरमा दर्ता भएको छ। त्यस्तै, चोरीको फर्चुनरमा लगाइएको नम्बर प्लेट बा२१च ४७१६ छ। तर, यातायात कार्यालयको रेकर्डमा यो नम्बरमा मारुती सुजुकीको 'अल्टो-८००' कार दर्ता छ।
नेपाल लाइभले प्राप्त गरेको कागजातअनुसार एकान्तकुनास्थित यातायात कार्यालयमा दर्ता भएका दुवै गाडी दर्ता भएको केही समयमै सरुवा सहमति लिएर अन्यत्र गएको रेकर्डमा उल्लेख छ। बा२१च ४७१६ नम्बरको 'अल्टो-८००' गत फागुन २६ मा दर्ता भएको र चैत ३ मा यातायात व्यवस्था कार्यालय पोखराका लागि सरुवा सहमति दिइएको हो।
त्यस्तै बा२१च ५५६२ नम्बरमा दर्ता देखिएको महिन्द्रा स्कर्पियो एकान्तकुना कार्यालयबाट २०७५ चैत २६ गते यातायात व्यवस्था कार्यालय धनगढीका लागि सरुवा सहमति लिएर गएको कार्यालयको अभिलेखमा उल्लेख छ।
यसरी दर्ता भएको सवारी अर्को कार्यालयमा सरुवा सहमति लिएर गएको नम्बरमा टोयोटाको फर्चुनर गाडी दर्ता हुनुले यसमा कार्यालयको समेत मिलेमतो रहेको अनुसन्धानमा संलग्न अधिकारी बताउँछन्। उक्त गाडी अवैध रुपमा नेपाल भित्रिएको सम्बन्धमा राजस्व अनुसन्धान विभागले अनुसन्धान गरिरहेको छ।
राजस्व अनुसन्धानको टोलीले टोयोटाका दुई कार गत कात्तिक ६ गते नियन्त्रणमा लिएको थियो। चोरीका गाडी दर्तामा संलग्न ३ जनालाई विभागको टोलीले पक्राउसमेत गरेको छ। ‘विभागको टोलीले आवश्यक कागजात संकलन गरेर अनुसन्धान जारी राखेको छ,’ विभाग स्रोतले भन्यो, ‘यस विषयमा केही दिनमा टुंगोमा पुगिन्छ।’
चोरीका गाडी दर्तामा ठूलो गिरोहको संलग्नता रहेको हुनसक्ने विभागले जनाएको छ। भारतबाट चोरेर ल्याइएका पौने २ करोड रुपैयाँ (प्रतिगाडी) पर्ने ती गाडीका कागजातका आधारमा भन्सार जाँचपास भएर भित्रिए र दर्ता भए भन्ने गम्भीर प्रश्न उब्जिएको अनुसन्धानमा संलग्न ती अधिकारी बताउँछन्। राजस्व अनुसन्धान विभागका अनुसार कागजपत्र मिलाएर प्रतिगाडी ९० लाख रुपैयाँमा बिक्री गर्ने तयारी थियो।
लामो अनुसन्धानपछि राजस्व अनुसन्धान विभागले ती गाडी नियन्त्रणमा लिन सफल भएको हो। स्रोतले नेपाल लाइभसँग भन्यो, ‘सूचना आएको झन्डै महिना दिनपछि यी गाडी नियन्त्रणमा लिन सफल भएका हौं। थप अनुसन्धान चलिरहेको छ।’
कात्तिक ६ को मध्यराति गाडीसहित पक्राउ परेका ३ जना व्यक्ति को हुन्, उनीहरुले कसरी यी गाडी भित्र्याए, गाडी किन्न खोज्ने मान्छे को हुन् र कसको योजनामा यति महँगो गाडी वैधानिक बनाएर बेच्न खोजियो भन्नेबारे राजस्व अनुसन्धान विभागले अहिलेसम्म केही बताएको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786800305.jpg)
-1786801195.jpg)
-1786800311.jpg)
-1786602170.png)
-1786513116.png)
