नयाँ दिल्ली- भारत सरकारले राष्ट्रिय राजधानी नयाँ दिल्लीमा सोमबार बिहान ८ बजेबाट यातायातका साधनमा जोरविजोर प्रणाली लागू गरेको छ।
यातायातका साधनबाट निस्किने धुवाँ तथा अत्याधिक यातायातको चाप र आवागमनका कारण उडेको धुलोका कारण भारतको राजधानी दिल्लीमा वायु प्रदुषण भएको भन्दै राज्य सरकारको यो निर्णय आएको हो। सोमबारबाट जोरविजोर नम्बर प्रणालीमा सवारी साधन मात्र चलाउन राज्य सरकारले अनुरोध गरेको छ।
दिल्लीमा विगत केही समयदेखि वायुमा निकै प्रदुषण देखिएको भन्दै स्थानीय सञ्चारमाध्यमले समाचारहरू सम्प्रेषण गरेपछि दिल्ली सरकारले वातावरण प्रदुषण रोक्न पहल थालेको हो।
दिल्लीका मुख्यमन्त्री अरविन्द केजरीवालले वातावरण प्रदुषणलाई रोक्न सरकारले गरेको पहलमा सहयोग गर्न र यातायातमा जोरविजोर प्रणाली लागू गर्न नागरिकहरूलाई आग्रह गरेका छन्। राष्ट्रिय राजधानीमा प्रदुषण बढेकोले यसमा योगदान पुर्याउन निजी सवारी साधन (कार) प्रयोगकर्तालाई पनि ‘कारपुलिङ’ गर्न पनि मुख्यमन्त्रीले अनुरोध गरे।
मुख्यमन्त्रीले नागरिकलाई सरकारले गरेको घोषणालाई मान्न आग्रह गर्दै हिन्दी भाषा प्रयोग गर्दै ट्विटरमार्फत लेखेका छन्, 'प्रिय दिल्लीवासीहरू, आजबाट निजी चार पाङ्ग्रे सवारी साधनका लागि जोरविजोर तथा कारपुलिङ प्रणाली कार्यान्वयनमा आएको छ। आफ्नो, आफ्ना बालबालिका र परिवारको स्वास्थ्यका लागि नियमलाई पालना गरौँ। कार चढ्ने सबैले कारमा आलोपालो गरेर आफ्नो गन्तव्यसम्म पुगौँ। मित्रता, सम्बन्ध बढाऔँ। पेट्रोलको बचत गरौँ र प्रदुषण घटाऔँ।'
नियमअनुसार पालोमा नपरेका कार प्रयोगकर्तालाई पालोमा परेका सवारीधनीले सहयोग गर्न वा ‘कारपुलिङ’ गर्न सरकारले अनुरोध गरेको हो।
दिल्लीमा ‘आम आदमी पार्टी' नेतृत्वको राज्य सरकारले घोषणा गरेको यो कार्यक्रम आगामी नोभेम्बर १४ सम्म लागू गरिनेछ। तर, यो नियम नोभेम्बर १० आइतबारका लागि भने मान्य नहुने बताइएको छ।
भारतमा आइतबार साप्ताहिक बिदा दिइने भएको र बिदाका दिन सवारीसाधनको चाप कम हुने हुनाले सो दिन यो नियम लागू नहुने बताइएको छ।
मुख्यमन्त्री केजरीवालले अक्टोबर १७ मा गरेको घोषणाअनुसार सोमबारदेखि जोरविजोर प्रणाली लागू भएको हो। यो नियम मोटरसाइकल, सार्वजनिक बस तथा अन्य ढुवानीका साधन तथा आपतकालिन सेवामा भने लागू हुनेछैन। महिलाले चलाउने गाडीलाई पनि नियम लागू नहुने बताइएको छ।
भाजपा र कांग्रेसको विरोध
सोमबार जोरविजोर प्रणाली लागू हुने तयारी भइरहँदा यसको केन्द्र सरकारको नेतृत्व गरिरहेको भारतीय जनता पार्टी (भाजपा) तथा प्रतिपक्षी दल भारतीय राष्ट्रिय कांग्रेस (कांग्रेस-आई) ले विरोध जनाएका छन्।
बिजेपीका वरिष्ठ नेता तथा राज्यसभाका सदस्य विजय गोयलले दिल्ली सरकारको जोरविजोर प्रणाली आफूहरूलाई मान्य नभएको बताएका छन्। उनले प्रदुषण नियन्त्रणका लागि राज्य सरकारले चालेका कदमले नागरिकलाई दुःख हुने र यो प्रदुषण नियन्त्रणका लागि सर्वमान्य आधार नभएको दावी गरे। नेता गोयलले आम आदमी पार्टीको यो कदमलाई निर्वाचनमा मत तान्ने नाटकका रूपमा व्याख्या गरे।
त्यस्तै एएनआईसँग बोल्दै काङ्ग्रेस नेता जेपी अग्रवालले राज्य सरकार राजधानीमा देखिएको प्रदुषणको समस्यालाई सही तवरले सम्बोधन गर्न विफल भएको आरोप लगाए।
सरकारले प्रदुषणको समस्या अत्यधिक तथा नियन्त्रण बाहिर पुग्नुमा सरकार जिम्मेवार रहेको भन्दै सरकारको आलोचना गरे। उनले समस्या समाधान गर्न अन्य राज्यका सरकारले कस्तो नीति लिएका छन् यसलाई छलफल गर्न छिमेकी मुख्यमन्त्रीहरू सहितका अधिकारीसँग बसेर रणनीति बनाउन सुझाव दिए। रासस/एएनआई
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
