हनोई- बेलायतमा ३९ जनाको शव भेटिएको घटनाका बारेमा अनुसन्धान गर्न भियतनामी प्रहरीले ८ जनालाई पक्राउ गरेको छ।
मारिएका सबै जना भियतनामी भएको बेलायती प्रहरीले विश्वास गरिरहेका बेला भियतनामी प्रहरीले घटनासँग सम्बन्धित भएको आशंकामा ८ जनालाई पक्राउ गरेको हो। बेलायतको राजधानी लन्डनदेखि पूर्वतिर पर्ने ग्रेज एसेक्स औद्योगिक क्षेत्रमा फ्रिजयुक्त कन्टेनरभित्र ती ३९ शव फेला परेको थियो।
गत अक्टोबर २३ मा भेटिएका शवमध्ये ३१ पुरुष र ८ महिलाको रहेको अधिकारीहरुले जनाएका छन्। मृत्युको कारण पत्ता लगाउन शव परीक्षण भइरहेको जनाइएको छ। सुरुमा उनीहरु चिनियाँ भएको विश्वास गरेको बेलायती प्रहरीले पछि भने भियतनामी भएको विश्वास गरेको थियो।
तर, उनीहरुको अनुसन्धान भइरहेकाले घटनाको यथार्थ विवरण र मृतकहरुको सनाखत हुन नसकेको प्रहरीले जनाएको छ। भियतनामको राज्यद्वारा सञ्चालित टेलिभिजनसँगको कुराकानीका क्रममा भियतनामी एक प्रहरी अधिकारीले घटना निकै पिडादायक भएको सोमबार बताए। भियतनामी समाचार संस्थाले पनि उनीहरु पक्राउ परेको पुष्टी सहितको समाचार सम्प्रेषण गरेका छन्।
यसअघि शवहरू फेला परेपछि उत्तरी आयरल्यान्डका ट्रक चालक मोरिस रबिन्सनलाई पनि बेलायती प्रहरीले पक्राउ गरेको थियो। रासस/एएफपी
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
