रसुवा- रसुवामा प्लास्टिकको बोतलको प्रयोग कम गर्न ओजोनेटेड सिस्टमको फिल्टर जडान गरिएको छ।
लाङटाङ राष्ट्रिय निकुञ्ज क्षेत्रका विभिन्न ८ स्थानमा प्लास्टिककको बोतल प्रयोग कम गर्न फिल्टर जडान गरिएको हो। लाङटाङ राष्ट्रिय निकुञ्जको पर्यटकीय क्षेत्रमा प्लास्टिक प्रयोग घटाउन र स्थानीय उपभोक्ता समितिको आयआर्जनमा वृद्धि गर्न फिल्टर जडान गरिएको निकुञ्ज तथा मध्यवर्ती सहयोग आयोजना डब्लुडब्लुएफका आयोजना प्रबन्धक आरबि राईले बताए। 'निकुञ्जको पर्यटकीय क्षेत्रमा प्लास्टिकजन्य वस्तुको बढी प्रयोग हुन थालेको छ,' उनले भने, 'त्यसले वातावरण नै प्रदूषण हुने हुँदा केही हदसम्म प्लास्टिकजन्य वस्तुको प्रयोगमा कमी ल्याई पर्यटक, अस्पताल तथा विद्यालयलाई शुद्ध पानी उपलब्ध गराउन फिल्टर जडान गरेका हौँ।'
करिब ३० लाखको लागतमा जिल्लाको लाङटाङ, ठुलोस्याफ्रु, धुन्चे, लाङटाङ राष्ट्रिय निकुञ्जको कार्यालय, घ्याङफेदी, कुटुम्साङ, हेलम्बु र शेर्माथाङमा फिल्टर जडान गरिएको राईले बताए। उनका अनुसार जिल्लाको ८ स्थानमा जडान गरिएको फिल्टर सोलार तथा विद्युतबाट सञ्चालन गर्न सकिन्छ। 'लाङटाङ र कुटुम्साङमा सोलारबाट सञ्चालन हुने फिल्टर राखेका छौँ, अन्य क्षेत्रमा विद्युतबाट सञ्चालन हुने फिल्टर राखिएको छ,' उनले भने।
जडान गरिएको फिल्टरको मूल्य ३ लाख ५० हजारदेखि ५ लाखसम्म परेको निकुञ्ज तथा मध्यवर्ति सहयोग आयोजना डब्लुडब्लुएफले जनाएको छ। सोलारबाट सञ्चालन हुने फिल्टरको ५ लाख र विद्युतबाट सञ्चालन हुने फिल्टरको २ लाख ५० हजार परेको आयोजनाले जनाएको छ।
पर्यटकीय क्षेत्रमा रसुवामा मिनिरल वाटरको प्रयोग बढी हुने हुँदा यसको प्रयोगले मिनरल वाटरको खपतमा कमी आई स्थानीयले आयआर्जन गर्न सकिने आयोजनाका आयोजना प्रबन्धक राईले बताए।
आयोजनाले पर्यटकीय क्षेत्रमा रहेका उपभोक्ता समितिहरुमा जडान गरिएको फिल्टरमा एक घन्टामा २ सय लिटर पानी फिल्टर गर्ने क्षमता रहेको छ। 'समितिले प्रतिलिटर २० रुपयाँदेखि डेढ सय रुपैयाँसम्म लिने गर्दछन्,' राईले भने, 'पर्यटकीय क्षेत्रमा नेपालीलाई २० रुपैयाँ र विदेशीलाई डेढ सय रुपैयाँ लिने गरेका छन्।'
फिल्टरको प्रयोगले निकुञ्जभित्र प्लास्टिकजन्य फोहोर व्यवस्थापन, शुद्ध पानीको व्यवस्था र उपभोक्ता समितिलाई आयआर्जनमा वृद्धि गर्न सहयोग पुग्ने विश्वास राखिएको निकुञ्जका प्रमुख संरक्षण अधिकृत युवराज रेग्मीले बताए।
२०३२ सालमा स्थापना गरिएको निकुञ्जले रसुवाको ५७ प्रतिशत, नुवाकोटको ७ प्रतिशत र सिन्धुपाल्चोकको ३६ प्रतिशत क्षेत्रफल ओगटेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787570132.jpg)
-1786602170.png)
-1786513116.png)
