काठमाडौं- ट्रान्सपरेन्सी इन्टरनेसनले सार्वजनिक गरेको भ्रष्ट्राचार सम्बन्धी विश्वव्यापी सूचकांकमा नेपालले स्थान सुधार गरेको छ। ट्रान्सपरेन्सी इन्टरनेसनलले बिहीबार सार्वजनिक गरेको प्रतिवेदन अनुसार नेपालले गत वर्षभन्दा २ अंक बढी पाएको छ।
विगत एक वर्षभित्र विश्व बैंक लगायतका ६ वटा संस्थाद्वारा गरिएको सर्वेक्षणका आधारमा नेपालले १०० मा ३१ अंक पाएको छ। सूचकांक अनुसारले १०० अंकले अति स्वच्छ र शून्य अंकले अति भ्रष्टाचार रहेको देखाउँछ।
नेपालले गत वर्षको तुलनामा केही सुधार गरे पनि भ्रष्टाचार अवधारणा सूचकांकमा पाएको अंकले भ्रष्टचारको स्थिति चिन्ताजनक देखिएको ट्रान्सपरेन्सीले जनाएको छ। सर्वेक्षण अनुसार नेपालको सार्वजनिक क्षेत्रमा भ्रष्टाचार, व्यापार व्यवसायमा घुस, सार्वजनिक पद र अधिकारको दुरुपयोग र कारबाहीमा कमी, सूचनामा नागरिकको पहुँचमा कमी, राजनीतिक भ्रष्टाचारजस्ता विषयमा यस वर्ष समेत सुधार भएको छैन।
सूचकांकको आधारमा १ सय ८० देशमध्ये न्युजिल्यान्ड ८९ अंक प्राप्त गरी सबैभन्दा कम भ्रष्टाचार हुने मुलुक र सोमालिया ९ अंक प्राप्त गरी सबैभन्दा बढी भ्रष्ट मुलुकका रुपमा सूचीकृत भएका छन्।
१२२औं स्थानमा रहेको नेपाल दक्षिण एशियाली राष्ट्रमा अफगानिस्तान र बंगलादेशभन्दा कम भ्रष्टाचार हुने मुलुकमा दरिएको छ।
सार्क राष्ट्रमा भुटान ६७ अंक प्राप्त गरी कम भ्रष्टचार हुने मुलुकमा दर्ता भएको छ भने ऊ विश्वभरि २६औं स्थानमा छ। यसैगरी, भारत ४० अंक प्राप्त गरी ८१औं स्थानमा, श्रीलंका ३८ अंक प्राप्त गरी ९१औं स्थानमा, माल्दिभ्स ३३ अंकसहित ११२औं स्थानमा, पाकिस्तान ३२ अंक पाई ११७औं स्थानमा छ।
नेपालभन्दा भ्रष्ट मुलकमा दर्ज भएको बंगलादेश २८ अंकसहित १४३औं र अफगानिस्तान १५ अंक प्राप्त गरी १७७औं स्थानमा छ। छिमेकी मुलुक चीन ४१ अंक प्राप्त गरी ७७औं स्थानमा रहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
