फागुन ६ गते डोटी जिल्ला अस्पतालमा कार्यरत डा जितेन्द्र सिहंमाथि हातपात भएको छ। के कारणले भयो डा सिंहमाथि हातपात ? उनले घटनाबारे स्वास्थ्यखबरलाई यसरी बताएः
म डोटी जिल्लाको केदार अखडा प्राथमिक स्वास्थ्य केन्द्रमा स्थायी दरबन्दीमा मेडिकल अधिकृतका रुपमा कार्यरत छु। जिल्ला अस्पतालमा एक महिनाका लागि काजमा बोलाएर आएको हुँ। जिल्ला अस्पतालका डाक्टरहरु क्याम्पमा गएका कारण बिरामीको उपचारमा समस्या नपरोस् भनेर मलाई बेलाइएको हो। सोही अनुसार म अस्पतालमा बिरामीको उपचारमा संलग्न छु।
आइतबार म अस्पतालमा काम गरिरहेको थिएँ। दिउँसो साढे २ बजेतिर भिडियो एक्स–रेको काम भइरहेको थियो। लाइनमा थुप्रै थिए। एक जना बिरामीको पालो १४–१५ जनापछि थियो। तर, ती बिरामी सुरुदेखि नै कोठाभित्र छिरेर किचकिच गरिरहेका थिए। धेरै पटक बाहिर बस्नुस् भन्दा पनि मानेका थिएनन्। निरन्तर कराई मात्र रहेका थिए।
मैले ३–४ चोटि ‘बाहिर गएर बस्नुस् पालो आएपछि बोलाउँला’ भनेँ तर पनि मानेनन्। त्यसपछि उनको भिडियो एक्सरे गर्ने पालो आयो। त्यति बेलासम्म उनको हामीसँग बोल्ने तरिका ठिक थिएन। थर्काएर ‘राम्रोसँग गर्’ भन्न थाले। मैले उनलाई ‘म मेडिकल अधिकृत हो, भिडियो एक्सरेकै विषय पढेको विज्ञ डाक्टर होइन’ भनिरहेको थिएँ। तपाईलाई त्यस्तो शंका लाग्छ भने अरु ठाउँमा गर्न जानुस् पैसा फिर्ता हुन्छ भनें। तर, उनले ‘यहीँ गर्छु’ भने। त्यसपछि मैले भिडियो एक्सरे गरें।
त्यसपछि त उनले ‘त्यो भएन, यसरी गर्, त्यसरी गर्’ भन्दै मलाई चर्को स्वरमा थर्काउन थाले। ३–४ पटक मलाई त्यस्तो व्यवहार गरेपछि ‘तपाईंको पैसा फिर्ता लैजानू, मैले गर्दै गर्दिनँ’ भने। त्यसपछि उनले ‘म यहीँ सुत्छु’ भनेर धम्की दिए। मैले पनि ‘सुत्ने भए सुत्नुहोस्, बस्ने भए बस्नुहोस्’ भनेर उनको पैसा फिर्ता गरिदिएँ। अनि म ओपिडीमा आएँ।
त्यसपछि तिनै बिरामीका मानिसले आफैं भिडियो अन गरेर बसे। अनि ‘एक्सरे किन नगरेको तुरुन्त गर’ भनेर थर्काउन थाले।
‘मैले सिरियस बिरामीको त भिडियो एक्सरे गरेको छु, उहाँको किन नगर्नु, तर उहाँले जथाभावी गाली गर्नुभयो, त्यसैले गर्दिनँ’ भनिदिएँ।
त्यसपछि पनि ती मानिसले ‘तैंले गर्नैपर्छ’ भन्दै किचकिच गर्दै थर्काउन थाले। ‘ती बिरामीले मैले गरेको भिडियो एक्सरेमा विश्वास छैन भन्दै गाली गरेको’ कुरा सुनाएँ।
त्यसपछि मलाई उनीहरुले हात छाडे। सुरुमा धकेले। त्यसपछि मैले त्यसो नगर्नुहोस् भनेर सम्झाउनँ खोजेँ। तर, उनीहरुले मानेनन् अनि हिर्काउन नै थाले।
त्यसपछि अरु आएर छुट्याए। उनीहरु त्यहाँबाट गएँ। म मेडिकल सुपरिटेन्डेन्टको कोठामा गएर बसें। त्यसको एक घन्टापछि ती बिरामी थप मानिस लिएर आए। म बसेको कोठाको ढोका फोडेर ममाथि निरन्तर आक्रमण गरे। मलाई कुट्नेमा विजयसिहं विष्ट, टेकबहादुर विष्ट, हिक्मतबहादुर विष्ट र अरुण महत हुन्।
उनीहरुको आक्रमणबाट मेरो टाउको, नाक, हात र शरीरका अन्य भागमा चोट लागेको छ। मथिल्लो एउटा दाँत भाँचिएको छ। उनीहरुले आक्रमण गर्दा प्रहरी र अन्य स्थानीय नआइपुगेको भए सायद मेरो ज्यानै जान्थ्यो होला। अहिले म यहीँ अस्पतालमा उपचाररत छु। बिरामीको सेवामा खटिँदा आक्रमण गर्नेलाई कडाभन्दा कडा सजाय होस् भन्ने चाहन्छु।
(सिर्जना खत्रीसँगको कुराकानीमा आधारित)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
