नयाँ दिल्ली- चीनका राष्ट्रपति सी चिनफिङ आज भारत जाँदैछन्। २ दिने भ्रमणका लागि उनी आज भारत पुग्न लागेका हुन्।
उनले दोस्रोपटक भारतीय प्रधानमन्त्री नरेन्द्र मोदीसँग अनौपचारिक भेट गर्दैछन्। यी दुई नेताबीच पहिलो पटक चीनको वुहानमा गतवर्षको अप्रिलमा भेटवार्ता भएको थियो। दोक्लाम विवादपछि भएको उक्त भेटका दौरानमा मोदीले चिनियाँ राष्ट्रपति चिनफिङलाई भारत भ्रमणको निम्तो दिएका थिए।
भारतको भ्रमणमा निस्कनुअघि चिनियाँ राष्ट्रपति चिनफिङले बेइजिङमा पाकिस्तानका प्रधानमन्त्री इमरान खानसँग भेट गरेका थिए। सो क्रममा खान र चिनफिङबीच काश्मीर विवादको विषयमा छलफल भएको थियो। बेइजिङले गत महिना भएको संयुक्त राष्ट्र संघको ७४औं महासभामा काश्मीर विवादमा भारतको आलोचना गरेको थियो। इमरानसँगको भेटमा चिनफिङले यसअघिकै भनाइलाई दोहोर्याइएको बताइएको छ।
भारत जानुअघि पाकिस्तानका प्रधानमन्त्रीसँग भेटवार्ता हुनु र नयाँ दिल्लीपछि काठमाडौं उत्रिने भएकोले पनि चिनियाँ राष्ट्रपतिको यो भ्रमणलाई विश्व राजनीतिमा महत्वपूर्ण रुपमा हेरिएको छ।
प्रधानमन्त्री मोदी र राष्ट्रपति चिनफिङबिचको बैठक शनिबार बिहान हुँदैछ। तर, उक्त बैठक अनौपचारिक मात्रै हुनेछ। भेटमा कुनै पनि सम्झौतामा हस्ताक्षर हुनेछैन भने संयुक्त प्रेस विज्ञप्तिसमेत जारी हुनेछैन।
भेटमा प्रमुख राजनीतिक मुद्दा तथा दुई देशबीचको आपसी हितका अन्य विविध विषयमा कुराकानी हुने बताइएको छ। आतंकवाद, अर्थतन्त्र, आतंकवादीहरुलाई मिल्ने सहयोग आदि विषयमा छलफल हुने भारतीय समाचार संस्था 'एनडिटिभी'ले लेखेको छ। यसका अलावा दुई देश बीचको व्यापार, सुरक्षा तथा सीमासम्बन्धी मुद्दाले समेत बैठकमा प्रवेश पाउने बताइएको छ।
यस्तो छ भ्रमण कार्यक्रम
चिनियाँ राष्ट्रपति शुक्रबार दिउँसो सवा २ बजे चेन्नई पुग्नेछन्। यहींबाट उनी महाबलिपुरम मन्दिर दर्शनका लागि जानेछन्। सोही क्रममा मोदीले चिनफिङलाई अन्य तीन प्राचीन स्मारकहरु अर्जुन्स पेनेन्स, पन्चरथ र शोर टेंपलको समेत भ्रमण गराउनेछन्। दुवै नेताले शोर टेंपलमा हुने सांस्कृतिक कार्यक्रमको समेत अवलोकन गर्नेछन्।
शनिवार बिहान ताज फिसरम्यान कोव रिसोर्ट एन्ड स्पामा दुवै नेताबीच अनौपचारिक भेटघाट हुने कार्यक्रम तय भएको छ। त्यसपछि दुवै देशका प्रमुख नेताहरु प्रतिनिधिमन्डल स्तरीय वार्तामा सरिक हुनेछन्। यसपछि दुवै नेताले सँगै 'लन्च' तथा 'डिनर' गर्ने कार्यक्रम समेत रहेको 'एनडिटिभी'ले जनाएको छ।
भारतमा दुई दिनको बसाइपछि सी शनिबार दिउँसो नेपालका लागि प्रस्थान गर्नेछन्। उनले आइतबारसम्म नेपालमै बिताउने बिहीबार पत्रकार सम्मेलन गरी परराष्ट्र मन्त्रालयले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
