काठमाडौं- चिकित्सा शिक्षा सुधारका अभियन्ता तथा त्रिवि शिक्षण अस्पतालका प्राध्यापक डा गोविन्द केसीले चिकित्सा शिक्षा आयोगमा दन्त चिकित्सा (डेन्टिस्ट्री) क्षेत्रबाट समेत प्रतिनिधित्व हुने गरी सदस्य चयन गर्न आग्रह गरेका छन्।
शेरबहादुर देउवा नेतृत्वको सरकारले मनोनयन गरेको सूचीप्रति आपत्ति जानाउँदै डा केसीले डेन्टिस्ट्रीबाट एक जना सदस्य थप गर्न सरकारसमक्ष आग्रह गरेका हुन्।
आयोगको सदस्यमा सरकारले ८ जना मनोनयन गर्नसक्नेछ। सोमध्ये ७ जना देउवा नेतृत्वको सरकारले मनोनयन गरिसकेको छ। बाँकी १ सदस्य मनोनयन गर्दा डेन्टिस्ट्रीबाट गर्न डाक्टर केसीले विज्ञप्तिमार्फत आग्रह गरेका हुन्।
‘चिकित्सा शिक्षा अध्यादेश अनुसार चिकित्सा शिक्षा आयोग बन्ने क्रममा सरकारले मनोनयन गरेको सूचीप्रति हाम्रो गम्भीर ध्यानाकर्षण भएको छ,’ विज्ञप्तिमा भनिएको छ, ‘सदस्य मनोनयनका क्रममा हामीले सबै विधागत क्षेत्रहरु समेटिने गरी डेन्टिस्ट्रीतर्फबाट समेत प्रतिनिधि राख्न आग्रह गरेका थियौं। तर निर्णय भएर आउँदा सो विधालाई नै छुटाइएकाले हाम्रो त्यसप्रति गम्भीर आपत्ति छ। सो त्रुटि सच्याउँदै तुरुन्त सरकारले मनोनयन गर्न सक्ने ८ जनामध्ये ७ जना नियुक्त भइसकेको अवस्थामा डेन्टिस्ट्रीबाट एक जना सदस्य थप गर्न सरकार समक्ष आग्रह गर्दछु।’
यसका साथै डा केसीले अब बस्ने संघीय संसदले समयमा नै चिकित्सा शिक्षा अध्यादेशलाई ऐनका रुपमा जारी गर्नेछ भन्ने विश्वास समेत लिएको जनाएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766673313.png)
-1764146706.png)
-1766648928.png)
-1763721444.png)
