काठमाडौं- पाँचौँ नेपालगन्ज म्याराथन आउँदो मंसिर ७ गते हुने भएको छ।
म्याराथनका लागि तयारी तीब्र पारिएको आयोजनक ‘क्रियटिभ ह्याण्ड्स’ का अध्यक्ष टीएस ठकुरीले जानकारी दिएका छन्।
१० वर्षे द्वन्द्व अन्त्य भएर शान्ति सम्झौता भएको दिन २०६३ मंसिर ५ गतेको सम्झनामा हरेक वर्ष म्याराथन हुँदै आएको छ। क्रियटिभ ह्याण्ड्सले ‘शान्ति सदभाव र एकता, राष्ट्र निर्माणमा हाम्रो प्रतिवद्धता’ भन्ने मुल नाराका साथ यसवर्ष पाँचौँ संस्करणको म्याराथन आयोजना गर्न लागेको हो।
ट्राफिक व्यवस्था मिलाउन सहज हुने भएकाले शनिबार दिनलाई म्याराथनका लागि रोजिएको अध्यक्ष ठकुरीले बताएका छन्। प्रतियोगिताको पुरस्कार भने केही दिनमा सार्वजनिक गरिने उनले बताए।
आयोजकका अनुसार पुरुष खुल्लातर्फ म्याराथन, महिलाको हाफ म्याराथन, ५ किलोमिटर महिला तथा पुरुषको स्कुल स्तरीय तथा खुला दौड समावेश गरिएको छ। त्यसैगरी ८ देखि १२ बर्ष उमेरसमूहको पनि दौड राखिएको छ भने शारीरिक रुपले अशक्तहरुको लागि पनि दौड स्पर्धा समेटिएको छ।
यस बर्षदेखि ३ किलोमिटरको कर्पोरेट रन पनि राखिएको आयोजकले जनाएका छन्। यसमा जनप्रतिनिधि, चिकित्सक, इन्जिनियर, प्राध्यापक, वकिल, शिक्षक, पत्रकार तथा विभिन्न पेशा र व्यवसायीहरुले सहभागिता जनाउनेछन्।
खुल्ला म्याराथनतर्फ शीर्ष आठ जना तथा हाफ म्याराथनमा शीर्ष ६ जनालाई नगद तथा अन्य उपहारबाट पुरस्कृत गरिने आयोजकको भनाइ छ। अन्य सबै विधामा नगद पुरस्कार दिइने तयारी छ। कर्पोरेट रनका विजेतालाई सरप्राइज पुरस्कार प्रदान गरिने बताइएको छ।
म्याराथन नेपालगन्ज उपमहानगरपालिका नजिकैको बिपी चोकदेखि सुरु भइ कोहलपुर चौराहदेखि उत्तरतर्फ पुगेर सोही रुट हुँदै पुनः बीपी चोकमा पूरा हुनेछ।
म्याराथनमा राष्ट्रियस्तरका धावकसँगै जुम्ला, कालिकोट लगायत जिल्लाहरु र प्रदेश ५, ६ र ७ का खेलाडीहरुले भाग लिँदै आएका छन्। नेपालगन्ज र कोहलपुरलाई भावनात्मक रुपमा अझै जोड्नका लागि पनि यो म्याराथन महत्वपूर्ण हुने विश्वास लिएको आयोजकको भनाइ छ।
नेपालगन्ज म्याराथनको पहिलो संस्करणमा नेपाली सेनाका होमलाल श्रेष्ठ, दोस्रोमा सेनाकै कृष्ण बस्नेत, तेस्रोमा जुम्लाका दुर्ग बुढा र चौथो संस्करणमा नेपाल पुलिस क्लबका भुमिराज राई विजेता बनेका थिए।
महिला हाफ म्याराथनमा नेपालकी नम्बर एक धाविका कान्छीमाया कोजु दुई संस्करणमा विजेता भएकी थिइन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।