काठमाडौं- इन्डोनेसियामा ‘विवाहभन्दा पहिलेको यौनसम्पर्क’मा रोक लगाउने व्यवस्थासहित निर्माण भएको विधेयकको विरोधमा भइरहेको प्रदर्शनमा धरपकड गरिएको छ।
विवादित विधेयकलाई लिएर इन्डोनेसियाका विभिन्न सहरमा प्रदर्शन चर्किएको छ। प्रहरीले इन्डोनेसियाको संसद्अगाडि प्रदर्शनमा उत्रेका प्रदर्शनकारीमाथि बल प्रयोग गरेको थियो। प्रहरीले संसद् भवनअगाडि प्रदर्शनमा उत्रिएका उनीहरुविरुद्ध अश्रुग्याँस र पानीको फोहोरासमेत चलाएको थियो।
जसका कारण ८० भन्दा बढी प्रदर्शनकारी घाइते भएका छन्।
प्रस्तावित विधेयकमा धेरै प्रकरणमा गर्भपात र राष्ट्रपतिको अपमानलाई गैरकानुनी मानिएको छ। विरोध प्रदर्शन सुरु भएपछि सरकारले यो विधेयक अघि बढाउन सकेको छैन तर प्रदर्शनकारीको चिन्ता संसद्बाट यसलाई कुनै न कुनै रुपमा पास गरिन सक्नेतर्फ छ।
विवादित विधेयकमा के छ?
प्रस्तावित विधेयकमा एक नयाँ 'क्रिमिनल कोर्ट' रहने व्यवस्था राखिएको छ। विधेयकमा गरिएका अन्य व्यवस्थाहरुमा भनिएको छः
-
विवाह पहिले यौनसम्पर्क दण्डनीय अपराध हो। यदि उक्त नियम उल्लंघन गरेमा एक वर्ष कैद हुनेछ।
-
विवाहभन्दा पहिले सँगै रहनु, सम्बन्धमा रहनुलाई पनि अपराध मानिनेछ। यसको उल्लंघन गरेमा ६ महिनासम्म कैद हुनेछ।
-
राष्ट्रपति, उपराष्ट्रपति, धर्म, सरकारी संस्था र राष्ट्रिय प्रतीकको रुपमा रहेको राष्ट्रिय ध्वजा वा राष्ट्रगानको अपमान गर्नु गैरकानुनी हुने र यस्तो कार्य गर्नेलाई पनि जेल सजाय हुनेछ।
-
गर्भपतन दण्डनीय अपराध हो। बलात्कार र मेडिकल इमर्जेन्सीबाहेक अन्य स्थितिमा गर्भपतन गरेमा ४ सम्म वर्ष कैद सजाय सुनेछ।
यो विधेयकमाथि मंगलबार संसद्मा मतदान हुनुपर्ने थियो। तर, राष्ट्रपति जोको विडोडोले शुक्रबारसम्म यसलाई स्थगित गर्ने निर्णय गरेका थिए। विडोडोले यो विधेयकमाथि अझ विचार गर्नुपर्ने आवश्यकता देखिएको भन्दै रोकेका हुन्।
किन भइरहेको छ विरोध प्रदर्शन?
राष्ट्रपतिले विधेयकमाथि विचार गरिने भनि प्रदर्शनकारीलाई सम्बोधन गरेको भए पनि उनीहरु ढुक्क छैनन्। उनीहरुलाई लागेको छ कि कुनै न कुनै रुपमा यो विधेयक संसद्बाट पारित हुनेछ।
विधेयकमा विवाद पहिले शारीरिक सम्बन्ध राख्न नपाउने कुरामा चर्चा भए पनि उनीहरुको वास्तविक चिन्ता भनेको भ्रष्टाचार उन्मुुलन आयोगलाई कमजोर पार्नेगरी विधेयकमा प्रस्ताव गरिएको व्यवस्थाप्रति हो। भ्रष्टाचार मामलामा काम गर्ने संस्थालाई कमजोर पार्ने उद्देश्यले यस्तो विधेयक सरकारले दर्ता गराएको उनीहरुको आरोप छ।
सरकारले शारीरिक सम्बन्धलाई देखाएर भ्रष्टाचारबाट उन्मुक्ति दिनेगरी विधेयक ल्याउन खोजेको प्रदर्शनकारीले बताइरहेका छन्।
इन्डोनेसियाको अलग-अलग क्षेत्रमा प्रदर्शनकारीले जुलुस निकालिरहेका छन्। युवायुवती तथा स्कुले छात्रछात्राहरु पनि प्रदर्शनमा सहभागी भएका छन्।
कतिपय ठाउँमा यस्ता प्रदर्शनहरुमा झडप हुँदा प्रदर्शन हिंसात्मकसमेत बनेको छ। राजधानी जाकर्तामा प्रदर्शनमा उत्रिएका उनीहरुले संसद्का सभामुख बमबान्ग सोसैतियोसँग भेट्ने माग गरेका थिए। तर, सो स्थानमा प्रहरीले बल प्रहार गरेपछि हिंसात्मक झडप भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
