काठमाडौं– आइसिसी विश्व क्रिकेट लिग डिभिजन–२ अन्तर्गत दोस्रो खेलमा नेपालले ओमानलाई १ सय ३९ रनको लक्ष्य दिएको छ।
नामिबियाको डब्लुएपी मैदानमा टस जितेको ओमानले पहिले फिल्डिङ गर्ने निर्णय गरेपछि ब्याटिङमा आएको नेपाल ४६ ओभरमा १ सय ३८ रनमा अलआउट भयो।
खराब सुरुवात गरेको नेपालले १० ओभरको पावर प्लेमा २७ रन जोड्दा १ विकेट गुमाएको थियो। पहिलो विकेटका रुपमा ओपनर तथा उपकप्तान ज्ञानेन्द्र मल्ल पाँचौं ओभरको अन्तिम बलमा ७ रन बनाएर आउट भए। १७ बल खेलेका उनले १ रन प्रहार गरे। अर्का ओपनर दिलीप नाथ १९ रन बनाएर आउट भए। उनले ४९ बल खेल्दा ३ चौका प्रहार गरे।
आरिफ शेखले फेरि पनि राम्रो ब्याटिङ गर्न सकेनन्। उनी ६ रनमा आउट भए। कप्तान पारस खड्का १७ रन बनाएर खेलिरहँदा कालीमुल्लाहबाट बोल्ड भए। उनले ४२ बल खेल्दा १ चौका प्रहार गरे। नेपालको रन स्कोरलाई गति दिने प्रयास गरेका दीपेन्द्रसिंह ऐरी २० रनमा पेभेलियन फर्के। उनले ३२ बल खेल्दा ३ चौका हिर्काए। लगत्तै बसन्त रेग्मी १ रनमै आउट भए।
१ सय ११ रनमा शरद भेषावकर सातौं विकेटका रुपमा आउट भए। उनले २२ रनको योगदान दिए। ३२ बल खेलेका उनले ३ चौका प्रहार गरे। रोहितकुमार पौडेलले १४ रन बटुले। उनले ४२ बल खेल्दा १ चौका हिर्काएका थिए।
सोमपाल कामीले नटआउट १७ रनको योगदान गरे। करण केसी ४ रनमा रनआउट भए। सन्दीप लामिछाने शून्य रनमा बोल्ड भए।
ओमानका कालीमुल्लाले ४ विकेट लिए। बिलाल खानले २ विकेट लिए । जएस ओएड्रा, खावर अली र फइज बटले १–१ विकेट हात पारे।
दोस्रो खेलमा नेपालले टिममा कुनै परिवर्तन गरेको छैन। टिममा नामिबिया विरुद्ध बिहीबार उत्रिएका सबै खेलाडी छन्।
नेपाली टिम– ज्ञानेन्द्र मल्ल, दिलीप नाथ, पारस खड्का, आरिफ शेख, शरद भेषावकर, दीपेन्द्रसिंह ऐरी, रोहितकुमार पौडेल, बसन्त रेग्मी, सोमपाल कामी, करण केसी, सन्दीप लामिछाने।
डिभिजन–२ को शीर्ष २ भित्र पर्ने टिमले एकदिवसीय विश्वकप छनोट प्रतियोगिता र इन्टरकन्टिनेन्टल कप खेल्ने अवसर पाउनेछन्। एकदिवसीय टिम मान्यताको समेत ढोका खुल्ने भएकाले डिभिजन–२ लाई महत्वपूर्ण प्रतियोगिताका रुपमा हेरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
