सुर्खेत– माओवादी केन्द्रले प्रदेश नम्बर ६ को संसदीय दलको नेतामा महेन्द्रबहादुर शाहीलाई सर्वसम्मत रुपमा छनोट गरेको छ।
बुधबार बसेको संसदीय दलको बैठकले सांसद शाहीलाई दलको नेता चयन गरेको माओवादी केन्द्रका सांसद विन्दमान विष्टले जानकारी दिए। संसदीय दलको नेता चयन भएसँगै शाहीलाई प्रदेश ६ को मुख्यमन्त्री बन्ने बाटो खुलेको छ। बुधबार बसेको प्रदेश कमिटीको बैठकमा पनि मुख्यमन्त्रीमा शाहीको नाममा सहमति भएको थियो।
मुख्यमन्त्रीका अर्का आकांक्षी नरेश भण्डारीले पनि संसदीय दलको नेतामा आफ्नो दाबी गर्दै आएका थिए। तर, अन्तिममा भने शाहीको नाममा सहमति जनाएका छन्।
एमाले र माओवादी केन्द्रको वाम गठबन्धनको भागबन्डा अनुसार प्रदेश नं. ६ को मुख्यमन्त्री माओवादी केन्द्रले पाउनेछ। ४० सदस्यीय प्रदेशसभामा माओवादीका १३ जना सांसद छन्।
यो प्रदेशमा नेकपा एमालेले पनि बिहीबारै पूर्वमन्त्री यामलाल कँडेललाई संसदीय दलको नेता चयन गरिसकेको छ। नेपाली कांग्रेसले भने केही दिनमै टुंगो लगाउनेगरी छलफल गरिरहेको बुझिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
