काठमाडौं- शनिबारदेखि मोरङको विराटनगरमा सुरु भएको प्रदेश १ को दुई दिने सुरक्षा गोष्ठी आइतबार सम्पन्न भएको छ।
नेपाल सरकार गृह मन्त्रालय तथा प्रदेश १ को आन्तरिक मामिला तथा कानून मन्त्रालयद्वारा आयोजना गरिएको सुरक्षा गोष्ठी कार्यक्रममा बोल्दै प्रदेश १ का मुख्य मन्त्री शेरधन राईले शान्ति सुरक्षाको क्षेत्र विगतका वर्षभन्दा सुदृढ भएको बताए।
पछिल्लो समय विभिन्न खाले अपराधिक घटनामा कमी आएको मुख्यमन्त्री राईको भनाइ थियो। उनले शान्ति सुरक्षामा खलल पुर्याउने कसैलाई पनि छुट नहुने हुँदा कानून विपरीत कार्य गर्ने जो कसैलाई पनि कानूनी कठघारामा उभ्याउन प्रहरीलाई निर्देशन दिए।
मुख्य मन्त्री राइले राम्रो कामका लागि प्रहरीलाई आवश्यक सहयोग गर्न प्रदेश सरकार सदैव तत्पर रहेको बताए।
यसैगरी आन्तरिक मामिला तथा कानुन मन्त्री हिक्मतबहादुर कार्कीले जनताको चाहाना बमोजिको सुरक्षा रणनीति अबलम्बन गर्नुपर्ने हुँदा सोही अनुसार कानूनी परिधी भित्र रही जनताकै चाहाना बमोजिमको सुरक्षा ब्यवस्था मिलाउनु पर्ने आजको आवश्यकता रहेको बताए।
उनले समुदाय प्रहरी साझेदारी कार्यक्रमले अगाडि सारेका कार्ययोजनाहरुलाई समेत प्रभावकारी रुपमा कार्यान्वयन गरेमा सुरक्षा व्यवस्था अझ मजबुत हुने धारणा राखेका थिए।
कार्यक्रममा प्रहरी महानिरीक्षक सर्वेन्द्र खनालले गृह मन्त्रालयको निर्देशन अनुसार काम गर्न प्रहरी संगठन कटिबद्ध रहेको चर्चा गर्दै यसबाट शान्ति सुरक्षा तथा अपराध अनुसन्धानमा सफलता पाउन सहज भएको बताए।
अपराध र अशोभनीय गतिविधिमा कमी आएको र शान्ति सुरक्षाको दृष्टिकोणले आवश्यक सुधारका कामहरुमा तीव्रता आएको उल्लेख गरे ।
गोष्ठीमा सशस्त्र प्रहरी बलका आइजिपी शैलेनद्र खनाल, गृह मन्त्रालयका प्रवक्ता बालकृष्ण सुवेदी , १ नम्बर प्रदेशका प्रमुख सचिव सुरेश अधिकारी, राष्ट्रिय अनुसन्धान विभागका प्रमुख गणेश अधिकारी, प्रदेश १ का प्रहरी कार्यालयका प्रमुख प्रहरी नायव महानिरीक्षक ठाकुर प्रसाद ज्ञवाली, प्रदेश १ अन्तर्गत अन्तर्गतका १४ जिल्लाका प्रमुख जिल्ला अधिकारीहरु, नेपाली सेनाका प्रतिनिधिहरु, प्रदेश १ स्तरीय सुरक्षा निकायका प्रमुखहरूको सहभागिता रहेको थियो।
गोष्ठी पछि प्रहरी महानिरीक्षक सर्वेन्द्र खनालले १ नम्बर प्रदेश अन्तर्गत १४ जिल्लाका प्रहरी प्रमुखहरुलाई समसामयिक विषयमा निर्देशन समेत दिएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1767770856.png)
-1764146706.png)
