डिभिजन–२ अाजबाट नामिबियामा, पहिलो खेलमा नेपाल आयोजकसँग भिड्दै

सुरक्षा/अपराध

नेपाल लाइभ बिहीबार, माघ २५, २०७४ ०८:०६

काठमाडौं– आइसिसी विश्व क्रिकेट लिग डिभिजन–२ प्रतियोगिता अन्तर्गत नेपालले पहिलो खेलमा आज आयोजक नामिबियासँग प्रतिस्पर्धा गर्दैछ। खेल डब्लुएपी मैदानमा नेपाली समयअनुसार दिँउसो सवा १ बजेदेखि सुरु हुनेछ।

आजै केन्या र यूएई वान्डरर्स मैदानमा प्रतिस्पर्धा गर्नेछन्। अर्को खेलमा ओमान र क्यानडाबीच ट्रस्टको युनाइटेड मैदानमा भिडन्त हुनेछ।

डिभिजन–२ को शीर्ष दुईमा रहने लक्ष्यमा रहेका सवै टिमका लागि पहिलो खेल महत्वपूर्ण छ। डिभिजन–२ को शीर्ष २ भित्र पर्ने टिमले एकदिवसीय विश्वकप छनोट प्रतियोगिता र इन्टरकन्टिनेन्टल कप खेल्ने अवसर पाउनेछन्। एकदिवसीय टिम मान्यताको समेत ढोका खुल्ने भएकाले डिभिजन–२ लाई महत्वपूर्ण प्रतियोगिताका रुपमा हेरिएको छ।

सम्बन्धित समचारहरु :

नेपाल भर्सेस नामिबिया : ३ वर्षमा खेलिएका तीनै खेलमा नेपाल हाबी, चौथो खेल जित्ने दाबी

डिभिजन–२ मा नेपालको यात्रा : ब्याटिङको भर

डिभिजन–२ : नेपालले खेल्ने तीन मैदानको अवस्था कस्तो छ?

डिभिजन–२ : ८ खेलाडी नामिबियाबारे जानकार, नयाँ ६ मध्ये ४ खेलाडी यू–१९ टिमका

प्रतियोगिताका लागि नेपालले युएईमा एक साता अभ्यास गरेको थियो। अभ्यासका दौरान नेपालले युएई 'ए' सँग खेलेका ३ मध्ये २ अभ्यास खेलमा जित हात पारेको थियो। युएई भ्रमण उपलब्धिमूलक भएको नेपाली टिमका उपकप्तान ज्ञानेन्द्र मल्लले नेपाल लाइभलाई बताए। 'युएई भ्रमणले टिममा सकारात्मक प्रभाव पारेको छ। टिममा रहेका सबै खेलाडीले आफ्नो जिम्मेवारी पूरा गरे,' मल्लले नामिबियाबाट भने।

डिभिजन–२ का लागि नामिबियाले दक्षिण अफ्रिकामा तयारी गरेको थियो। दक्षिण अफ्रिकाको प्रदेशस्तरीय प्रतियोगिता खेल्दा टिम बलियो बनेको नामिबियाका भरपर्दा ब्याट्सम्यान स्टेफिन बार्डले बताएका छन्। नामिबियाको पत्रिका 'द नामिबियन'लाई दिएको अन्तरर्वार्तामा बार्डले भनेका छन्, 'हामीले प्रतियोगिताका लागि धेरै अघिदेखि तयारी गरेका छौं। टिम समन्वय राम्रो भइरहेको छ। युवा खेलाडीले पनि राम्रो गरेका छन्।'

नेपाल र नामिबियाबीच ३ वर्षबीचमा चौथो पटक प्रतिस्पर्धा हुन लागेको हो। यसअघि सन् २०१५ मा नामिबियामै भएको डिभिजन–२ को खेलमा नेपालले जित निकालेको थियो। ट्रस्टको युनाइटेड मैदानमा भएको खेलमा नेपालले नामिबियालाई ३ विकेटले हराएको थियो। पहिले ब्याटिङ गरेको नामिबिया १ सय ४२ रनमा अलआउट भएको थियो। कप्तान पारस खड्काले ६४ रन जोडेपछि नेपालले ७ विकेटको क्षतिमा लक्ष्य पार गरेको थियो।

सन् २०१६ अप्रिलमा नेपाल र नामिबियाबीच डब्लुसिएल च्याम्पियनसिप अन्तर्गत २ खेल भए। कीर्तिपुरस्थित टियू मैदानमा भएको दुवै खेलमा नेपाल विजयी भएको थियो। पहिले खेलमा नेपालले ५ विकेटको जित निकालेको थियो। नेपालले १ सय ९६ रनको लक्ष्य ५ विकेटको क्षतिमा पार गरेको थियो। नेपालका लागि शरद भेषावकरले नटआउट ५० र विनोद भण्डारीले नटआउट ४० रनको योगदान गरेका थिए।

दोस्रो खेलमा नेपालले नामिबियालाई ३ विकेटले हरायो। नामिबियाले दिएको २ सय ४० रनको लक्ष्य नेपालले १ बल खेल्न बाँकी छँदा ७ विकेटको नोक्सानीमा पार गर्यो०। खेलमा कप्तान पारस खड्काले शतक (१०३ रन) प्रहार गरेका थिए।

नामिबिया विरुद्धको पछिल्लो खेलमा शतक प्रहार गरेका कप्तान पारस खड्का बिहीबार हुने खेलमा जित निकाल्ने योजनामा छन्। पारस पहिलो खेल भएकाले नेपाललाई भन्दा आयोजकलाई बढी दबाब भएको बताउँछन्। अभ्यासका लागि युएईमा जानुअघि पारसले नेपाल लाइभसँग भनेका थिए, 'पहिलो खेलमा आयोजक नर्भस हुन्छन् जस्तो लाग्छ। त्यसको फाइदा हामी उठाउन सक्छौं। नामिबियालाई पहिलो खेलमा हराउन सक्यौं भने राम्रो सुरुवात गर्न सक्नेछौं। महत्वपूर्ण कुरा, हामीले राम्रो क्रिकेट खेन्नुपर्छ। कन्डिसन र खेलाडीभन्दा पनि टिमको कस्तो तयारी र जितको भोक कत्तिको छ भन्ने महत्वपूर्ण हुन्छ।'

नेपाली टिम
पारस खड्का (कप्तान), ज्ञानेन्द्र मल्ल, शक्ति गौचन, बसन्त रेग्मी, शरद भेषावकर, सोमपाल कामी, करण केसी, आरिफ शेख, सन्दीप लामिछाने, दीपेन्द्रसिंह ऐरी, दिलीप नाथ, ललित भण्डारी, अनिलकुमार साह, रोहितकुमार पौडेल

वैकल्पिक खेलाडी– सुनिल धमला, ललित राजवंशी, सिद्धार्थ लोहनी, किशोर महतो।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

नमोबुद्धका बालबालिकामा ‘हेपाटाइटिस’ सङ्क्रमण

जुम्ला–रारा म्याराथन भोलि देखि, ५९१ धावक सहभागी हुँदै

तोलामा एक हजार ४ सयले घट्यो सुनको मूल्य, चाँदीको कति ?