काठमाडौं– बिहीबारदेखि अफ्रिकी मुलुक नामिबियामा हुने आइसिसी विश्व क्रिकेट लिग डिभिजन २ का खेल तीन वटा मैदानमा हुँदै छन्। तीन वटै खेलमा ६–६ वटा खेल हुनेछन्। नेपालले पनि तीन मैदानमै खेल्दै छ।
मैदानको अवस्थाले क्रिकेटको नतिजामा असर पार्ने भएकाले नेपालले कन्डिसन अनुसार रणनीति बनाउने कप्तान पारस खड्काको भनाइ छ। त्यसो त नेपालका ८ खेलाडीले तीन वटै मैदानमा खेलिसकेका छन्। ६ खेलाडीका लागि भने नामिबियाको पिच नयाँ हुनेछ।
कप्तान पारस खड्कासहित उपकप्तान ज्ञानेन्द्र मल्ल, शरद भेषावकर, वसन्त रेग्मी, शक्ति गौचन, आरिफ शेख, सोमपाल कामी र करण केसीले तीन वर्षअघि पनि डिभिजन–२ खेलेका थिए। दिलीप नाथ, ललितसिंह भण्डारी, दीपेन्द्रसिंह ऐरी, सन्दीप लामिछाने, अनिलकुमार साह र रोहितकुमार पौडैल पहिलो पटक नामिबियामा खेल्दै छन्।
नेपाली टिमका कप्तान पारस खड्काले तीन वटै मैदानको कन्डिसन फरक–फरक भएको अनुभव गरेका छन्। त्यसैले नयाँ खेलाडीलाई मैदानबारे जानकारी दिइएको पारसले अभ्यासमा युएई जानुअघि नेपाल लाइभलाई बताएका थिए।
पारसको भनाइ छ, 'कुनै मैदानमा एक्स्ट्रा बाउन्स हुनसक्छ भने कुनै मैदान फ्ल्याट छ। त्यसैले हामीले एक-आपसमा अनुभव सेयर गरेका छौं। पहिलाको अनुभव अनुसार योजना बनाएर मैदानमा उत्रिन सक्यौं भने राम्रो हुन्छ।'
नामिबियाको क्रिकेट मैदानको अवस्था दक्षिण अफ्रिकाको जस्तै छ। नामिबियामा सन् २०१५ को डिभिजन २ मा एक खेलमा मात्र ३ सयभन्दा बढी रन बनेको थियो। त्यतिबेला पहिलो इनिङको औसत रन २ सयभन्दा कम थियो। त्यसैले नामिबियामा २ सयको हाराहारीको स्कोरलाई राम्रो रन मान्न सकिन्छ।
वान्डरर्स मैदानमा बिहानी समयमा स्विङ हुने गरेको छ। यो मैदानको पिचमा विस्तारै बल टर्न हुने गरेको छ। वान्डरर्समा नेपालले केन्या र क्यानडासँग प्रतिस्पर्धा गर्नेछ।
ट्रस्टको युनाइटेड मैदान ब्याट्सम्यानका लागि कठिन मैदान हो। यहाँ स्लो र लो पिच छ। यो मैदानमा नेपालले यूएईसँग मात्र प्रतिस्पर्धा गर्नेछ।
बिहीबार पहिलो खेलमा नेपालले वान्डरर्स एफेइस पार्क (डब्लुएपी) मैदानमा आयोजक नामिबियासँग प्रतिस्पर्धा गर्नेछ। यो मैदान अन्य दुई मैदानको तुलनामा ब्याटिङका लागि राम्रो मानिएको छ। पिच गतिशील भएको यो मैदान दक्षिण अफ्रिकाको मैदानभन्दा फरक अवस्थाको छ। यहाँ बाउन्स समेत हुने गर्छ। दुई मैदानको तुलनामा यो मैदानको बाउन्ड्री पनि सानो छ। मैदानमा नेपालले नामिबियासँग खेले लगत्तै दोस्रो खेलमा ओमानसँग प्रतिस्पर्धा गर्नेछ।
नामिबियामा फेब्रुअरीमा बढी पानी पर्ने गरेको छ। यतिबेला गर्मी बढेको छ। नामिबिया पुगेपछि नेपाली टिमका उपकप्तान ज्ञानेन्द्र मल्लले भने, 'हिजो र अस्ति पानी परेको थियो। अहिले भने गर्मी छ।'
नामिबियामा फेब्रुअरी महिनामा सामान्यतया बिहान बादल लाग्ने तथा दिउँसो असिना-पानी पर्ने पूर्वानुमान मौसमविद्ले गरेका छन्। त्यसैले कुनै पनि खेल वासआउट हुने सम्भावना समेत रहन्छ।
डिभिजन-२ खेल तालिका:
माघ २५ गते
केन्या भर्सेस यूएई – वान्डरर्स मैदान
नेपाल भर्सेस नामिबिया – डब्लुएपी मैदान
ओमान भर्सेस क्यानडा – ट्रस्टको युनाइटेड मैदान
माघ २६ गते
युएई भर्सेस क्यानडा – वान्डरर्स मैदान
नेपाल भर्सेस ओमान – डब्लुएपी मैदान
केन्या भर्सेस नामिबिया – ट्रस्टको युनाइटेड मैदान
माघ २८ गते
नामिबया भर्सेस ओमान – वान्डरर्स मैदान
केन्या भर्सेस क्यानडा – डब्लुएपी मैदान
नेपाल भर्सेस यूएई – ट्रस्टको युनाइटेड मैदान
माघ २९ गते
नेपाल भर्सेस केन्या – वान्डरर्स मैदान
यूएई भर्सेस ओमान – एब्लुएपी मैदान
नामिबिया भर्सेस क्यानडा – ट्रस्टको युनाइटेड मैदान
फागुन २ गते
नेपाल भर्सेस क्यानडा – वान्डरर्स मैदान
यूएई भर्सेस नामिबिया – डब्लुएपी मैदान
केन्या भर्सेस ओमान – ट्रस्टको युनाइटेड मैदान
फागुन ३ गते
फाइनल – वान्डरर्स मैदान
तेस्रो र चौथो प्लेअफ – डब्लुएपी मैदान
पाँचौं र छैटौं प्लेअप – ट्रस्टको युनाइटेड मैदान
नेपाली टिम-
पारस खड्का (कप्तान), ज्ञानेन्द्र मल्ल, शक्ति गौचन, वसन्त रेग्मी, शरद भेषावकर, सोमपाल कामी, करण केसी, आरिफ शेख, सन्दीप लामिछाने, दीपेन्द्रसिंह ऐरी, दिलीप नाथ, ललित भण्डारी, अनिलकुमार साह, रोहितकुमार पौडेल।
वैकल्पिक खेलाडी– सुनिल धमला, ललित राजवंशी, सिद्धार्थ लोहनी, किशोर महतो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
