काठमाडौं– नेपाली क्रिकेट टिम आइसिसी विश्व क्रिकेट लिग डिभिजन–२ मा सहभागी हुन नामिबिया पुगेको छ। युएईमा एक साता अभ्यास गरेपछि नेपाल नामिबिया पुगेको हो।
बिहीबार आयोजक नामिबियासँग खेलेर प्रतियोगिताको सुरुवात गर्ने नेपालले केन्या, युएई, क्यानडा र ओमानसँग प्रतिस्पर्धा गर्नेछ। प्रतियोगितामा कम्तीमा दोस्रो हुँदै एकदिवसीय विश्वकप छनोट प्रतियोगितामा स्थान बनाउने नेपालको लक्ष्य छ।
शीर्ष दुईभित्र पर्न नेपालको चुनौती ब्याटिङमा देखिएको छ। बलिङमा एकनासको प्रदर्शन गर्ने नेपाल ब्याटिङमा चुक्दा पराजय भोग्नुपरेका कैयौं उदाहरण छन्।
नेपालका कप्तान पारस खड्का पनि नेपालको चुनौती ब्याटिङमा भएको स्वीकार गर्छन्। युएई उड्नुअघि नेपाल लाइभलाई दिएको अन्तर्वार्तामा पारसले भनेका थिए, 'यस पटक पनि हामीलाई ब्याटिङमा राम्रो प्रदर्शन गर्ने चुनौती छ।'
नेपालले नामिबिया प्रस्थान गर्नुअघि युएई 'ए' टिमसँग ३ अभ्यास खेल खेलेको थियो। सुरुवाती २ खेल जितेको नेपाल अन्तिम अभ्यास खेलमा पराजित भएको थियो अन्तिम नेपालको पराजयको कारण ब्याटिङ बनेको थियो। नेपालका कप्तान पारस जितको आधार ब्याटिङ नै मान्छन्।
भन्छन्,'पछिल्ला खेलको विश्लेषण गर्ने हो भने पनि जुन खेलमा नेपालले ब्याटिङ राम्रो गरेको छ, त्यो खेलमा जित हात पारेको छ।'
अन्तिम अभ्यास खेलमा २ सय १६ रनको सामान्य लक्ष्य पछ्याएको नेपाल ३८.५ ओभरमा १ सय ५१ रनमै अलआउट भएको थियो। खराब ओपनिङ गरेको नेपालका ओपनिङ ब्याट्सम्यान दिलीप नाथ शून्य रन आउट भए लगत्तै शरद भेषावकर १ रनमै पेभेलियन फर्केका थिए। नेपालका लागि कप्तान पारस खड्काले सबैभन्दा बढी ४१ रन जोड्दा नेपालको लगातार विकेट गएको थियो। खेलमा नेपाल ६४ रनले पराजित भएको थियो।
अभ्यासका सुरुवाती दुई खेलको जितको आधार पनि ब्याटिङले नै तय गरेको थियो। दोस्रो अभ्यास खेलमा नेपालले ३ सय ३३ रन बनाउँदा उपकप्तान तथा ओपनिङ ब्याट्सम्यान ज्ञानेन्द्र मल्लले सतक (१५४ रन) प्रहार गरेका थिए। १ सय ४१ रनको ओपनिङ गरेको नेपालका ओपनर दिलीप नाथले ६४ रनको योगदान गरेका थिए। विशाल लक्ष्य पछ्याएको युएई १ सय ४० रनमा अलआउट भएको थियो। खेलमा सन्दीप लामिछानेले ४ विकेट लिएका थिए।
पहिलो अभ्यास खेलमा पनि ओपनिङ ब्याट्सम्यान दिलीप नाथको अर्धसतकमा नेपालले २ सय ४६ रन बनाएको थियो। दिलीपले ६१ रनको योगदान दिँदा मध्यक्रमका ब्याट्सम्यानले आक्रामक ब्याटिङको नमुता प्रस्तुत गरेका थिए। जवाफी ब्याटिङ गरेको युएई २ सय २१ रनमा अलआउट भएको थियो।
यो योगफललाई नेपालका प्रशिक्षक जगत टमाटा राम्रो मान्छन्।
'हामीले खेल जित्न कम्तीमा २ सय ५० रनको हाराहारीमा रन बनाउनुपर्छ, अनि मात्र हामीले बलिङबाट विपक्षीलाई दबाब दिन सक्छौं। पहिले ब्याटिङ गरेमा पनि हामीले विपक्षीलाई रोक्न गाह्रो हुनेछैन', अभ्यासमा जानुअघि टमाटाले कीर्तिपुर मैदानमा आफ्नो योजना सुनाएका थिए।
एक साताको तीन अभ्यास खेलबाट नै नेपालको जितको आधार ब्याटिङ भएको पुष्टि भएको छ। अब नामिबियाको पिचले पनि ब्याटिङमा असर गर्ने देखिन्छ।
बलिङमा राम्रो प्रदर्शन गर्न आत्मविश्वासी देखिएको नेपालको सुधार गर्नु पक्ष ब्याटिङ भएको कप्तान पारस बताउँछन्।
उनी भन्छन्, 'नामिबियामा तीव्र गतिका बलरलाई राम्रो हुन्छ भनिएको छ। गत संस्करणको डिभिजन–२ मा पनि त्यही भनिएको थियो। तर, स्पिनरले पनि महत्वपूर्ण भूमिका खेलेका थिए। जितको आधार सबै टिमको समन्वय हो। बलिङ युनिटका लागि हामीले राम्रो रणनीति बनाउनेछौं। त्यसैले तीव्र बलिङदेखि सबै क्षेत्रमा राम्रो रणनीति बनाएर मैदानमा लागू गर्ने हो भने हाम्रो पक्षमा नतिजा ल्याउन सक्छौं।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749307650.png)
-1749200817.png)
