सिओल- उत्तर र दक्षिण कोरियाको संयुक्त महिला आइस हक्की टोली आफ्नो पहिलो खेलमा पराजित भएको छ। शितकालिन ओलम्पिक सुरु हुनु अघि स्विडेनसँग भएको मैत्रीपूर्ण खेलमा संयुक्त टोली ३–१ ले पराजित भएको हो।
गएराति भएको सो खेल ओलम्पिकको तयारीका लागि भएको पहिलो र एक मात्र अभ्यास खेल थियो।
यो हारसँगै प्रतियोगिताअघि जित हात पार्दै संयुक्त कोरियाली टोलीका लागि ओलम्पिक यात्राको सुखद सुरुवात गर्ने मौका गुमेको छ।
खेलका क्रममा केहि मौकाहरु पाएपनि त्यसलाई सदुपयोग गर्न नसक्दा कोरियाली टोलीले बलियो राष्ट्र स्विडेनलाई नतिजा सुम्पिएको हो।
यसअघि आइस हक्कीमा उत्तरका खेलाडीको सहभागितालाई लिएर दक्षिणमा आलोचनासमेत भएको थियो। कतिपयले ओलम्पिकमा दक्षिणको एक पदक गुम्ने आशंका व्यक्त गरेका थिए।
धेरैले कोरियाली टोलीले आफ्नो पहिलो खेल जित्दै सबै आलोचनाहरुको जवाफ दिने अपेक्षा गरिए पनि कोरियाली टोली सफल हुन सकेन।
खेल हेर्नका लागि दुवै कोरियाको संयुक्त झण्डासँगै सयौँ दर्शक रंगशालामा उपस्थित भएका थिए।
शुक्रबारबाट दक्षिण कोरियाको प्योङच्याङमा सुरु हुने शितकालिन ओलम्पिक फेब्रुअरी २५ सम्म चल्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749200817.png)
