लन्डन- आरोन राम्सेले पहिलो ह्याट्रिक तथा पिएरे एमरिक औवामियाङले पहिलो गोल गरेपछि इंग्लिस प्रिमियर लिगमा इभरर्टनमाथि आर्सनलले ५–१ को फराकिलो जित हात पारेको छ।
इभर्टनविरुद्ध आर्सनलले पहिलो २० मिनेटमै ३ गोल गर्न सफल भएको थियो। खेल अवधिभर ३ गोलका लागि एसिस्ट गरेका अर्मेनियन क्याप्टेन हेनरिख खिातारयानको पासमा राम्सेले टोलीका लागि पहिलो गोल गरे।
खेलको १४ मिनेटमा औवामियाङको पासमा लओरेन्ट कोसिल्नेले हेड मार्फत गोल गर्दै २–० को अग्रता दिलाए। दोस्रो गोल गरेको ५ मिनेट पनि बित्न नपाउँदै मेसुट ओजिलको कर्नरमा रिवाउन्ड बललाई राम्सेले गोलको दिशा दिए।
खेलको ३७ मिनेटमा औवामियाङले अर्को एक गोल थपेपछि हाफ टाइम अघि आर्सनल ४–० ले अग्रता लिन सफल भयो।
औवामियाङ जर्मन क्लब बोरुसिया डर्टमुन्डबाट हालसम्मकै सर्वाधिक ५६ मिलियन पाउण्डमा गत बुधबार मात्रै आर्सलन आएका हुन्। उनले गत सिजनको बुन्डेसलिगामा सर्वाधिक ३१ गोल गरेका थिए।
दोस्रो हाफको ६४ मिनेटमा इभर्टनका सब्स्टिच्युट खेलाडि डोमिनिक कालभर्ट लेविनले कुको मार्टिनाले लेफ्ट विङबाट हानेको प्रहारलाई हेडमार्फत गोलपोष्टको दिशा दिएर खेलमा फर्किने संकेत गरे। तर ४ जना डिफेन्स तथा ३ जनालाई सेन्ट्रल डिफेन्समा खेलाउने इभरर्टन मेनेजर साम अलार्डिसको रणनीतिलाई आर्सनलका खेलाडिहरुले सफल हुन दिएनन्।
म्यान अफ दि म्याच बनेका खिातारयानको लो क्रस पासलाई जाली चुमाउँदै खेलको ७४ मिनेटमा राम्सेले सिजनको पहिलो ह्याट्रिक गरे। योसँगै आर्सनल ५–१ ले विजयी भयो।
राम्से आर्सनलबाट प्रिमियर लिगमा ह्याट्रिक गर्ने २०औँ खेलाडि बनेका छन्।
यसैबिच गएराति नै भएका अन्य खेलहरुमा एफसि बर्नमाउथले स्टोक सिटीलाई २–१, ब्राइटन एन्ड होभ अल्वियनले वेस्टह्याम युनाइटेडलाई ३–१ तथा साउथ ह्याम्प्टनले वेस्ट ब्रोमविच अल्वियनलाई ३–२ ले पराजित गरे।
म्यान्चेस्टर युनाइटेडले हर्डसफिल्ड टाउनलाई २–० ले पाखा लगाउँदा बर्नलीले लिग लिडर म्यान्चेस्टर सिटीलाई १–१ गोलको बराबरीमा रोकेको छ। लेस्टर सिटी र स्वान्सी सिटीले पनि १–१ को बराबरी खेले।
गएरातिका खेलहरुपछि म्यानचेस्टर सिटी पहिलो स्थानमा रहँदा म्यान्यु दोस्रो तथा लिभरपुल अंक तालिकाको तेस्रो स्थानमा कायम छन्।
प्रिमियर लिग अन्तर्गत आज दुई खेल हुँदैछन्। क्रिस्टल प्यालेसले न्याकासल युजाइटेडको सामना गर्दा लिभरपुलले आफ्नै मैदान एनफिल्डमा टोटनह्याम हट्सपरसँग खेल्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
