काठमाडौं- नेपाली राष्ट्रिय क्रिकेट टिमका पूर्व प्रशिक्षक पुबुदु दासानायके २०२० को एभरेस्ट प्रिमियर लिग (इपिएल) मा भैरहवा ग्लाडियटर्स टिमको मुख्य प्रशिक्षक बन्ने भएका छन्।
२०११ देखि २०१५ सम्म नेपाली राष्ट्रिय क्रिकेट टिमको प्रशिक्षक रहेका दासानायकेले २०१६ देखि अमेरिकाको राष्ट्रिय टिम सम्हालिरहेका थिए। अमेरिकी टिमको प्रशिक्षकबाट राजीनामा दिएर बसेका उनी नेपाली मैदानमा पुनः आउने भएका हुन्। पहिले नेपालको प्रशिक्षक बन्नुअघि उनी क्यानडा राष्ट्रिय टिमको समेत प्रशिक्षक रहिसकेका थिए।
नेपाली टिमको प्रशिक्षक रहँदा २०१३ को आइसिसी विश्व क्रिकेट लिग डिभिजन थ्री र २०१४ को आइसिसी विश्व ट्वान्टी-२० मा उनको भूमिका महत्वपूर्ण थियो। त्योसँगै नेपाली टिमको ब्याटिङमा गरिएका सुधारदेखि खेलाडीको आत्मबल बढाउने उनको शैलीको प्रशंसा भएको पाइन्छ।
भैरहवा ग्लाडियटर्सको प्रशिक्षक भन्ने भएपछि खुसी हुँदै दासानायकेले भनेका छन्, ‘म टिमसँग काम गर्न उत्साहित छु। नेपाल जहिले पनि मेरो मनमा रहेको छ। त्यसैले पुनः नेपाल आएर जुनसुकै रुपमा भए पनि नेपाली क्रिकेटलाई योगदान दिन सक्ने काम गर्ने अवसर दिनुभएकोमा आभारी छु।’
श्रीलङ्कामा जन्मेका ४९ वर्षका क्यानडाली नागरिक दासानायके भैरहवाको प्रशिक्षक बन्नु नेपाली क्रिकेटकै लागि नयाँ प्रतिभा खोजीको अवसर हुने बताइएको छ। उनैले चितवनको क्याम्पाचौरबाट टिपेर ल्याएका सन्दीप लामिछाने अहिले विश्व क्रिकेटमा छाइरहेका छन्।
भैरहवा ग्लाडियटर्स टिमका मालिक आदित्य सांघाइले पनि लिजेण्ड व्यक्तित्वलाई प्रशिक्षक बनाएर ल्याउन पाउँदा आफूहरु खुसी रहेको बताएका छन्। ‘उनको आगमनले भैरहवालाई मात्रै होइन सिंगो नेपाली क्रिकेटलाई फाइदा हुने विश्वास लिएको छु। उनको आगमनले नयाँ प्रतिभाको खोजीमा पनि मद्धत हुने नै छ।’
यस्तै भैरहवा टिमका कप्तान शरद भेषावकरले पनि पुबुदु नेपाली टिमको प्रशिक्षक बन्नु नै राष्ट्रिय टिमको टर्निङ प्वाइन्ट रहेको सम्झिएका छन्। ‘यो सिजन उनको आगमनले नेपाली क्रिकेटको सुधारमा राम्रो योगदान हुने आशा छ। हामी इपिएलमा दुई सिजन रनर अप भयौँ, यो वर्ष पुबुदु सरले त्यो उपाधिको कमि पनि पूरा गरिदिनुहुनेछ भन्ने विश्वास छ।’
भैरहवा इपिएलमा २०१७ र २०१८ को संस्करणमा फाइनलमा पुगेर पराजित भएको थियो। यसपटक दासानायकेको आगमनले अवस्था फेरिने विश्वास भैरहवाले गरिरहेको छ। श्रीलङ्कामा जन्मेका ४९ वर्षका क्यानडाली नागरिक दासानायके भैरहवाको प्रशिक्षक बन्नु नेपाली क्रिकेटकै लागि नयाँ प्रतिभा खोजीको अवसर हुने बताइएको छ। उनैले चितवनको क्याम्पाचौरबाट टिपेर ल्याएका सन्दीप लामिछाने अहिले विश्व क्रिकेटमा छाइरहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
