काठमाडौं - म्यानचेस्टर युनाइटेडबाट इन्टर मिलान गएका स्ट्राइकर एलेक्स सान्चेजले आफूलाई युनाइटेडमा हुँदा पनि कुनै पछुतो नरहेको तर खेल्ने समय नै कम पाउनाले कठिन भएको बताएका छन्।
एक वर्षको लोनमा इन्टर मिलान गएका उनले युनाइटेडमा १९ महिना बिताए। ३० वर्षका चिलीका खेलाडी सान्चेजले युनाइटेडमा रहँदा सबैभन्दा धेरै हप्ताको ४ लाख पाउण्ड तलब लिने गरेका थिए। तर, उनले खेलेका ४५ खेलमा भने ५ गोल मात्रै गरे।
‘म्यानचेस्टर युनाइटेड पुगेर पनि म असाध्यै खुसी नै छु, मैले जहिल्यै भन्दै आएको कुरा हो- युनाइटेडले इंग्ल्याण्डमा धेरै कुरा जितेको छ। यसमा आबद्ध हुन पाउनु खुसीको कुरा हो। त्यहाँ पुगेर मलाई पछुतो छैन’ सान्चेजले भनेका छन्।
२०१४ मा बार्सिलोनाबाट ३० मिलियन पाउण्डमा आर्सनल गएका सान्चेजले आर्सनलमा १६६ खेलमा ८० गोल गरेका थिए। उनी आर्सनलमै रहँदा २०१७ मा प्रोफेसनल फुटबलर्स एशोसियसनले दिने प्लेयर अफ दि एयर को मनोनयनमा पनि परेका थिए।
सान्चेजले २०११ देखि २०१४ सम्म बार्सिलोनामा रहँदा १४१ खेलमा ४७ गोल गरेका थिए।
अहिले युनाइटेडबाट इन्टर मिलान पुगेपछि उनीबारे समर्थकहरु मध्यमा रहेर कुरा गरिरहेका छन्। उनले छाड्नुको दुःख या उनी रहँदाको सुख केही देखिएको छैन।
गएको सिजन युनाइटेडका लागि २७ खेल खेलेका उनले २ गोल मात्रै गरेका थिए। तर, कोपा अमेरिकामा चिलीलाई सेमिफाइनलसम्म लैजाँदा २ गोल गरेका उनको विशेष चर्चा भएको थियो।
यसैले उनले भनेका छन्- ‘मलाई लाग्छ राष्ट्रिय टिमको लागि खेल्दा नै म बढी खुसी हुन्छु। म्यानचेस्टरमा नै हुँदा पनि दुःखी नै भएको त होइन तर, साथीहरुलाई सधैँ भनिरहेको हुन्थेँ, म खेल्न चाहन्छु। कहिँलेकाहिँ कुनै खेलको ६० मिनेट मैदानमा हुन्थेँ र निकालिन्थेँ, त्यसपछिको खेलमा फेरि मौका पाउँदैन थिएँ, त्यस्तो किन हुन्थ्यो मलाई थाहा छैन।’
इन्टर मिलान जानु अघि पनि युनाइटेड प्रशिक्षक ओल गुनार सोल्सकेयरले सान्चेजका लागि कुनै योजना बनाएका थिएनन्। उनी प्रि सिजनको तयारी खेलमा पनि सामेल गराइएका थिएनन्। जब कि कोपा अमेरिका खेलेर फर्कने वित्तिकै सान्चेजले मैदान जान आफू तयार रहेको बताउँदै आएका थिए।
नयाँ सिजनमा इन्टर मिलान बलियो टिमका रुपमा देखिएको छ। डिएगो गोडिन, रोमेलु लुकाकु, एलेक्स सान्चेज जस्ता खेलाडी ल्याएको मिलानले च्याम्पियन्स लिगमा पनि बलियो उपस्थिति देखाउने आँकलन भइरहेको छ। अहिले सिरि ‘ए’ मा २ खेलमा दुवै खेल जितेको मिलान शीर्ष स्थानमा नै छ।
मिलान च्याम्पियन्स लिगमा कठीन समूहमा बार्सिलोना, बोरुसिया डर्टमुण्ड र स्लाभिया प्राहासँगै रहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764501638.png)
-1764498344.png)
-1764146706.png)
-1763721444.png)
-1763559424.jpg)
-1764080971.png)
