काठमाडौं- ट्रान्सफर सिजनको अन्तिम दिनसम्म फ्रेन्च क्लब पिएसजीले सिजनको भरपुर उपयोग गरेको छ। विशेषतः लोनमा ल्याइएका स्ट्राइकर माउरो इकार्डी र चार वर्षको सम्झौतामा आएका गोलकिपर केलर नाभासको चर्चा चलिरहेको छ।
अर्जेन्टिनाका इकार्डीले भर्खरै इन्टर मिलानसँग दुई वर्षको सम्झौता थप गरेको भए पनि उनी एक वर्षको लोनमा पिएसजी गएका हुन्। लोनमा भए पनि अर्को सिजन सकिँदासम्म पिएसजीले ६५ मिलियन युरो तिरेर स्थायी रुपमा राख्नसमेत सक्नेछ।
इन्टरमा ६ वर्ष रहेका इकार्डीले २१९ खेलमा १२४ गोल गरेका थिए। ‘मेरो नयाँ टिमलाई अगाडि लैजान मैले सक्दो मेहनत गर्नेछु’ ट्रान्सफरपछि इकार्डीले भनेका छन्।
यसैगरी मड्रिडमा पाँच वर्ष बिताएका गोलकिपर नाभास झण्डै १५ मिलियन युरोमा पिएसजीसँग चार वर्षको सम्झौता गरेर आबद्ध भएका छन्। मड्रिडमा पाँच वर्षमा १२ उपाधि जितेका नाभास पिएसजी पुग्नुले नयाँ सिजनका लागि पिएसजी बलियो देखिएको छ।
पिएसजीबाट बार्सिलोना जाने प्रयासमा लागिरहेका स्ट्राइकर नेमारलाई पनि समय सकाएर क्लबमै रोक्न सक्नु पनि पिएसजीको बलियो पक्ष देखिएको छ। बार्सिलोनाका प्रस्तावहरु पिएजसीले लगातार अस्वीकार गरिरहेको थियो। पिएसजीको मागअनुसारको रकम तिर्न बार्सिलोना सक्षम भएन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1698918398-1698987692.png)
-1764146706.png)
