जमैका- दोस्रो टेस्टमा २ सय ५७ रनको फराकिलो जित निकाल्दै भारतले वेस्ट इन्डिजविरुद्धको टेस्ट शृंखला 'क्लिन स्विप' गरेको छ।
जमैकाको सविना पार्कमा जितका लागि ४ सय ६८ रनको लक्ष्य पछयाएको वेस्ट इन्डिज दोस्रो पारीमा २ सय १० रनमा समेटिएपछि भारत विजयी भएको हो।
वेस्ट इन्डिजका लागि सम्राह ब्रुक्सले ५०, कप्तान जसोन होल्डरले ३९ र जर्मेन ब्ल्याकवुडले ३८ रन बनाए पनि त्यो जितका लागि उल्लेख्य भएन।
भारतीय बलरका अघि दोस्रो पारीमा पनि वेस्ट इन्डिजका ब्याट्सम्यान निरिह देखिए। भारतका लागि रविन्द्र जडेजा र मोहम्मद सामीले समान ३/३ विकेट र इशान्त शर्माले २ विकेट लिए। पहिलो पारीमा ह्याट्रिकसहित ६ विकेट लिएका जसप्रित बुमराहले एकमात्र विकेट हात पारे।
यसअघि पहिलो पारीबाट २ सय ९९ रनले अग्रता लिएको भारतले दोस्रो पारीमा १ सय ६८ रनमा पारी घोषित गर्यो। भारतका लागि अजिंक्य रहानेले ६४ र हनुमा बिहारीले ५३ रनको पारी खेले। बिहारीले पहिलो पारीमा करियरकै पहिलो शतक प्रहार गरेका थिए।
.jpg)
जीवनको पाँचौं अन्तर्राष्ट्रिय टेस्ट म्याच खेलिरहेका हनुमाले पहिलो शतक प्रहार गरेपछि भारतले पहिलो पारीमा ४ सय १६ रनको योगफल तयार गरेको थियो। उनले १ सय ११ रनको योगदान दिएका थिए। यस्तै कप्तान विराट कोहली (७६), इशान्त शर्मा (५७) र मायांक अग्रवाल (५५)ले अर्धशतक बनाए। वेस्ट इन्डिजका जसोन होल्डरले ५ तथा राहकिम कोर्नवालले ३ विकेट हात पारेका थिए।
आफ्नो पहिलो पारीमा वेस्ट इन्डिज १ सय १७ स्थानमा समेटिएको थियो। वेस्ट इन्डिजका ३ ब्याट्सम्यानले खाता नै खोल्न सकेका थिएनन्। सिम्रोन हेटमेरले सर्वाधिक ३४ रन बनाउँदा कप्तान जसोन होल्डरले १८ रन जोडे।
वेस्ट इन्डिजलाई दबाबमा राख्दै भारतका जसप्रित बुमराहले ह्याट्रिकसहित ६ विकेट लिएका थिए। ९.१ ओभर मात्रै बलिङ गरेका उनले ३ मेडन राख्दै मात्र १६ रन खर्चिएका थिए।
नवौं ओभरको दोस्रो, तेस्रो र चौथो बलमा उनले क्रमश: ड्यारेन ब्राभो, समराह ब्रुक्स र रोस्टन चेजलाई पेवेलियन फर्काएका थिए। योसँगै टेस्ट म्याचमा ह्याट्रिक लिने उनी तेस्रो भारतीय बलर बनेका छन्। यसअघि हरभजन सिंह र इरफान पठानका नाममा यो कीर्तिमान थियो।
हरभजनले सन् २००१ मा कोलकातामा अष्ट्रेलियाविरुद्ध र इरफानले सन् २००६ मा कराँचीमा पाकिस्तानविरुद्ध ह्याट्रिक गरेका थिए।
बुमराहले १२औं टेस्ट म्याचका दौरानमा सो उपलब्धि हात पारेका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766152266.png)
-1764146706.png)
-1763721444.png)
