काठमाडौं - विश्व फुटबलको सर्वोच्च निकाय फिफाले वर्ष २०१९ का लागि दिने उत्कृष्ट पुरुष खेलाडीको अवार्डका लागि उत्कृष्ट १० बाट अन्तिम तीनमा इटालियन क्लब युभेन्टसका क्रिष्टियानो रोनाल्डो, स्पेनिस क्लब बार्सिलोनाका लियोनल मेस्सी र इंग्लिस क्लब लिभरपुलका भर्जिल भ्यान डाइक परेका छन्।
गएको वर्षका विजेता स्पेनिस क्लब रियल मड्रिडका मिडफिल्डर लुका मोडरिक भने यस वर्ष उत्कृष्ट १० मा समेत पर्न सकेका थिएनन्।
गएको बिहीबार रोनाल्डो र मेस्सीलाई नै पछि पार्दै भ्यान डाइकले युइएफए वर्ष खेलाडीको अवार्ड जितेका थिए। यसैले फुटबल पण्डितहरु फिफा वर्ष उत्कृष्ट पुरुष खेलाडी अवार्डमा पनि उनको सम्भावना बढी रहेको बताइरहेका छन्। युइएफए उत्कृष्ट फरवार्डको उपाधि जितेकाले मेस्सीको सम्भावना पनि प्रबल देखिन्छ।
फिफाको मनोनयनमा उत्कृष्ट १० पुरुष खेलाडीमा रोनाल्डो, मेस्सी र भ्यान डाइकसँगै लिभरपुलका सडियो माने, लिभरपुलकै मोहम्मद सलाह, गएको सिजन चेल्सीबाट खेलेका र हाल रियल मिड्रडमा रहेका इडन हाजार्ड, पिएसजीका केलियन एमबाप्पे, टोटनह्यामका ह्यारी केन, गएको सिजन आयाक्सबाट खेलेर अहिले युभेन्टस गएका म्याथिज डि लिग्ट साथै गएको सिजन आयाक्समै रहेका र अहिले बार्सिलोना गएका फ्रान्की डि योङ रहेका थिए।
कसको सम्भावना कति ?
रोनाल्डो र मेस्सीले फिफा उत्कृष्ट वर्ष खेलाडीको अवार्ड ५/५ पटक जितेका छन्। रोनाल्डोले २००८, २०१३, २०१४, २०१६ र २०१७ मा जितेका थिए भने मेस्सीले २००९, २०१०, २०११, २०१२ मा लगातार चार पटक र २०१५ मा समेत जितेका थिए। यस्तै रोनाल्डो पाँच पटक दोस्रो स्थानमा रहेका छन् भने मेस्सी ६ पटक दोस्रो स्थानमा रहेका छन्।
यसैले पनि को उत्कृष्ट भन्ने बहसमा विशेष त रोनाल्डो र मेस्सीकै चर्चा हुने गरेको छ। तर पनि गएको सिजनको खेललाई नियाल्ने हो भने र भर्खरै युइएफए वर्ष खेलाडीको अवार्ड जितेकाले भ्यान डाइक पनि प्रमुख बनेका छन्।
.jpg)
मेस्सीले गएको सिजन ३१ जुलाई २०१८ देखि ३१ जुलाई २०१९ सम्ममा बार्सिलोनाबाट ५० र अर्जेन्टिनाबाट ८ गरेर ५८ खेल खेले। जसमा उनले ४ हजार २४ मिनेट मैदानमा बिताएका छन्। त्यसमा बार्सिलोनाबाट ५१ र अर्जेन्टिनाबाट ३ गरेर ५४ गोल हानेका छन्। त्यसलाई तुलनात्मक रुपमा हेर्ने हो भने उनले एक गोल गर्न सरदर ८६ मिनेट लगाएका छन्। मेस्सीले पोस्टमा प्रहार गरेको सट संख्या २८४ रहेको छ।
त्यही समयमा रोनाल्डोले युभेन्टसबाट ४३ र पोर्चुगलबाट ४ गरेर ४७ खेल खेलेका छन्। जसमा उनको खेल समय ३ हजार ९ सय ४६ मिनेट रहेको देखिन्छ। उनले युभेन्टसबाट २८ र पोर्चुगलबाट ३ गरेर ३१ गोल बनाए। यसरी सरदरमा हेर्दा उनले एक गोलका लागि १ सय २७ मिनेट लगाएको देखिन्छ। उनले पोस्टमा प्रहार गरेको सट संख्या २ सय ५४ रहेको छ।
.jpg)
गएको वर्षको खेललाई गोलका आधारमा तुलना गर्ने हो भने रोनाल्डोभन्दा मेस्सी अगाडि देखिन्छन्। त्यसमा उनीहरुले एक गोलका लागि लगाएको सरदर समयले पनि मेस्सीको गोलको महत्व बढी देखिन्छ।
गोलमा बढ्ने दुई स्ट्राइकर रोनाल्डो र मेस्सीको तुलना गरिरहँदा डिफेन्डर भ्यान डाइकको भूमिका पनि याद गर्नुपर्ने हुन्छ। प्रिमियर लिगमा गएको सिजनदेखि लगातार ४९ खेलमा उनलाई छलाएर कसैले बल कटाउन सकेको थिएन। ५० औँ खेलमा आर्सनलका निकोलस पेपेले मात्र उनलाई काटेर बल अगाडि बढाएका थिए। प्रिमियर लिगमा दोस्रो रहँदा मात्र होइन भ्यान डाइकले लिभरपुललाई गएको सिजन च्याम्पियन्स लिग जिताउँदा पनि महत्वपूर्ण भूमिका खेलेका थिए।
.jpg)
भ्यान डाइक डिफेन्डरको भूमिकामा मात्र होइन गोल स्कोररमा पनि राम्रो देखिएका छन्। उनले गएको सिजन लिभरपुलबाट ५० र नेदरल्याण्ड्सबाट ९ गरेर ५९ खेल खेलेका थिए। जसमा उनले ९ गोल पनि गरे। चार गोलका लागि अवसर मिलाएर समेत उनले आफूलाई अब्बल देखाएका थिए। लिभरपुलका लागि ४ हजार ४ सय ६५ मिनेट मैदानमा रहेका उनले आफू दुई खेलाडीमा बलका लागि संघर्ष हुँदा ७० प्रतिशत समय बलमा नियन्त्रण बनाएका छन्।
अरु अवार्डमा को को ?
उत्कृष्ट गोलका लागि दिइने पुसकास अवार्डमा – मेस्सी, जुआन फर्नान्डो, ड्यानियल सोरी
उत्कृष्ट पुरुष गोलकिपर – एलिसन, एडरसन, मार्क आन्द्रे टेर स्टेगेन
उत्कृष्ट महिला गोलकिपर – क्रिष्टियन एन्डलर, हेडभिग लिन्दाह, सारी भ्यान भेनेनडाल
उत्कृष्ट महिला टिम प्रशिक्षक – जिल एलिस, फिल नेभिल, सारिना विगम्यान
फिफा समर्थक अवार्ड – सिल्भिया ग्रेको, महिला विश्वकपमा नेदरल्याण्ड्सका समर्थक, जुस्टो सान्चेज
पुरुष टिम उत्कृष्ट प्रशिक्षक – पेप गार्डिओला, जर्गेन क्लोप, माउरिसियो पोचेटिनो
उत्कृष्ट महिला खेलाडी – लुसी ब्रोन्ज, एलेक्स मोर्गान, मेगान रापिनो
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
