काठमाडौं- वैदेशिक रोजगारीमा कामदार पठाउने इजाजत पाएका म्यानपावर कम्पनीको धरौटी वृद्धि भएसँगै मर्जरमा जाने प्रक्रिया अघि बढाएका छन्। एक्लैले धरौटी पुर्याउन नसक्ने तथा एकै परिवारका फरकफरक सदस्यद्वारा सञ्चालित म्यानपावर कम्पनीले मर्जरमा जाने प्रक्रिया थालेका हुन्।
आगामी बुधबार (भदौ १८ गते)सम्म सबै म्यानपावर व्यवसायीहरूले वैदेशिक रोजगार नियमावलीको पाँचौ संसोधन अनुसार लागू गरीएको नयाँ धरौटी रकम राखिसक्नु पर्नेछ।
धरौटी राख्ने अन्तिम मिति नजिकिँदै गर्दा मर्जरमा जाने म्यानपावरको संख्या बढ्दै गएको विभागले जनाएको छ। शनिबारसम्म २ सय १४ म्यानपावर कम्पनी मर्जरमा गएका छन्।
मर्जरमा जाने म्यानपावर कम्पनी गाभिएर ९२ वटा म्यानपावर कम्पनी बन्न लागेको वैदेशिक रोजगार विभागका निर्देशक भोलानाथ गुरागाँइले बताए।
‘मर्जरमा जाने म्यानपावर कम्पनीको संख्या बढ्दै गइरहेको छ। ६ वटासम्म म्यानपावर मिलेर एउटै म्यानपावरमा गाभिएका छन्,’ निर्देशक गुरागाँइले भने।
शनिबारसम्म विभागमा दुई वटा म्यानपावर कम्पनी मर्जरमा जानका लागि ७५ वटा निवेदन विभागमा परेका छन्। ३ वटा म्यानपावर कम्पनी गाभिन ७ वटा निवेदन, ४ वटा गाभिन ८ वटा निवेदन, ५ वटा गाभिन १ वटा निवेदन र ६ वटा गाभिन १ वटा निवेदन परेको निर्देशक गुरागाँइले बताए।
शनिबारका तुलनामा आइतबार धरौटी तथा मर्जरका लागि आउने म्यानपावरको चापमा केही कमी आएको निर्देशक गुरागाँइले जानकारी दिए।
‘म्यानपावर व्यवसायीलाई धरौटी रकम राख्नका लागि अन्तिम मिति भदौ १८ गते राति १२ बजेसम्म समय छ, त्यो अवधि भित्र धरौटी नबुझाउने म्यानपावर कम्पनीको इजाजत स्वतः खारेज हुनेछ,’उनले भने, ‘मर्जरमा भने उनीहरु आफ्नो इच्छा अनुसार जहिले पनि जान पाउने छन्।
धरौटी राख्ने ५ सयभन्दा बढी
शनिबारसम्म नयाँ प्रावधानअनुसारको धरौटी रकम राख्ने म्यानपावर ५ सय ६४ पुगेका छन्। जसमध्ये २ करोड धरौटी राख्ने म्यानपावरको संख्या सबैभन्दा बढी छ।
वैदेशिक रोजगार नियमावलीको पाँचौ संसोधनमा म्यानपावर कम्पनीको धरौटी रकम बढेर न्यूनतम २ करोडदेखि अधिकतम ६ करोडसम्म पुगेको छ।
वैदेशिक रोजगारीमा वार्षिक ५ हजारभन्दा बढी कामदार पठाउने म्यानपावर कम्पनीले ४ करोड बैंक ग्यारेन्टी र २ करोड नगद धरौटी राख्नुपर्ने छ।
वार्षिक ३ हजारदेखि ५ हजारसम्म कामदार पठाउने म्यानपवार कम्पनीले १ करोड नगद र २ करोड बैंक ग्यारेन्टी ३ करोड बैंक ग्यारेन्टी राख्नुपर्ने व्यवस्था छ।
वार्षिक १ सयदेखि ३ हजारसम्म कामदार पठाउने म्यानपावर कम्पनीले १ करोड ५० लाख बैंक ग्यारेन्टी सहित ५० लाख नगदसहित २ करोड धरौटी राख्नुपर्ने छ।
वैदेशिक रोजगार विभागकाअनुसार इजाजत लिएका १२ सयभन्दा बढी म्यानपावर सञ्चालनमा रहेपनि वार्षिक रुपमा नियमति कामदार पठाउने म्यानपावर १ हजारको हाराहारिमा छन्।
जसमध्ये पनि वार्षिक ५ हजारबढी कामदार वैदेशिक रोजगारीमा पठाउने म्यानपावर कम्पनी आर्थिक वर्ष २०७५/०७६ मा द रिभर ओभरसिज मात्रै छ।
गत आर्थिक वर्ष द रिभर ओभर्सिसले ५ हजार २ सय ५८ जना कामदार वैदेशिक रोजगारीमा पठाएको थियो। विभागको तथ्यांक अनुसार ३ करोड बैंक ग्यारेन्टी राख्नुपर्ने एशओएस म्यानपावर र प्याराडाइज गरी दुईवटा मात्रै छन्।
संसोधित ऐन अनुसार दुई आर्थिक वर्षमा १ सयभन्दा कम कामदार पठाउने म्यानपावर स्वतः खारेजीमा जाने प्रावधान छ।
सोही प्रावधान अनुसार ५ सय ६२ वटा म्यानपावर कम्पनीहरु खारेजीको जोखिममा रहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
