काठमाडौं - स्पेनिस क्लब बार्सिलोनाले फ्रेन्च क्लब पिएसजीबाट स्ट्राइकर नेमारलाई ल्याउने पहल कमजोर बन्दै गएको छ। बार्सिलोनाले लगातार गरिरहेका प्रस्तावहरु अस्वीकृत हुँदै जाँदा नेमार पिएसजीमै रोकिने देखिएको हो।
खेलाडी किनबेचको समय एक दिन मात्रै बाँकी रहँदा नेमारसँगको सम्झौता टाढिनुले उनी आफैले पिएसजीमै रहने मनस्थिति बनाइसकेका छन्। बार्सिलोना जान अपुग रकममा २० मिलियन युरो आफै तिर्नसमेत नेमार तयार भए पनि सम्झौता भने कठीन बन्दै गएको छ।
यसमा मुख्य कारण नै पिएसजीले नेमार बेच्न नचाहनु र बार्सिलोनाले पिएसजीले भनेजस्तो महँगो रकम तिर्न नसक्नु रहेको छ। पछिल्लो सयम बार्साका दुई खेलाडीसँगै पिएसजीले १५० मिलियन युरोसम्म माग गरेको थियो। इभान राकिटिक र उसमान डेम्बेलेमध्ये एक र अर्का एक खेलाडीको मागमा बार्सिलोना अघि बढ्न भने सकेन। बार्साले राकिटिक र टोडिबोलाई पिएसजीमा दिएर डेम्बेले लोनमा पठाउने गरी सम्झौताको प्रयास गरे पनि सफल हुन सकेन।
बार्सिलोनाका फुटबल निर्देशक जेभियर बोर्डासले नेमारका लागि पिएसजीसँगको सम्झौताको नजिक पुगेको बताएको एक हप्ता नबित्दै सम्झौता कठीन देखिएको हो। बार्सिलोनाका तर्फबाट बोर्डास, ओस्कार ग्राउ, इरिक अबिडाल र एन्ड्रे करी पेरिसमा नै पुगेर छलफलमा सहभागी थिए। पटक पटकको बैठकबाट पनि ठोस सहमति भने हुन सकेन।
बार्सिलोनाले नेमारका लागि १७० मिलियन युरो तिर्ने र त्यसमा दुई चरणमा पैसा दिने सहमतिको प्रयास गरिरहेको थियो। यसअघि पिएसजीले नेमारका लागि एक सय मिलियन युरोका साथै डेम्बेले र सेमेडो पनि दिनुपर्ने प्रस्तावसमेत गरेको थियो। त्यसमा झण्डै एक सय मिलियन युरोका डेम्बेले र ४० मिलियन युरोका सेमेडो दिनु घाँटा हुने बार्सिलोनाको तर्क थियो।
बार्सिलोना अध्यक्ष जोसेफ मारिया बर्टामेउले नेमारका लागि यो सिजन लोनमा ल्याउने र अर्को सिजनका लागि १७० मिलियन युरो तिर्ने प्रस्तावमा बल गरिरहेका थिए, तर त्यो पनि सम्भव भएन।
अहिले पिएसजीमा अभ्यासमा गइरहँदा फेरिएको व्यवहारले पनि नेमारमाथि तनाव भने बढेको छ। नयाँ सिजनका लागि बार्सिलोना जाने इच्छा सार्वजनिक भएको लामो समय भइसक्दा पनि त्यसमा हरप्रयास असम्भव देखियो।
नेमार ल्याउन पिएसजीसँगको सम्झौताका लागि नै बार्सिलोनाका फुटबल निर्देशक इरिक अबिडालसमेत फ्रान्स गएका थिए। बार्सिलोनामा नेमार भित्र्याउने मागमा स्टार खेलाडी लियोनल मेस्सी नै संलग्न रहे पनि त्यसको समेत प्रभाव देखिएन।
पीएसजीले पनि नेमारलाई क्लब छाड्न दिन तयार रहेको बताउँदै आए पनि सम्झौतामा अघि बढ्ने चासो भने देखाएन।
२०१७ मा बार्सिलोना छाडेर २०० मिलियन पाउण्ड कीर्तिमानी रकममा पीएसजी पुगेका नेमार पुनः बार्सिलोना फर्कने प्रयासमा ठूलो रकम नै बाधक बनिरहेको हो।
अहिले पीएसजी समय बिताउने शैलीमा देखिएको छ। छाड्न चाहने खेलाडीलाई बाटो खुला रहेको बताउँदै आएको पीएसजीले समय सकिएपछि नेमार क्लबकै रहने र प्रोफेसनल रुपमा अघि बढ्ने आशमा नै देखिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766152266.png)
-1764146706.png)
-1763721444.png)
