काठमाडौं- त्रिभुवन अन्तर्राष्ट्रिय विमानस्थल आजबाट पुनः ७ घन्टा बन्द हुने भएको छ।
नेपाल नागरिक उड्डयन प्राधिकरणले नोटाम जारी गर्दै आज बेलुका साढे ११ बजेदेखि बिहान साढे ६ बजेसम्म विमानस्थल बन्द गर्न लागेको हो। नोटाम जारी भएको समय अर्थात् रातको २ बजेबाट साढे २ बजेसम्म भने नेपाल एयरलाइन्सको ओसाका उडान भर्ने विमानका लागि पनि नोटाम लागू हुने छैन। नेपाल एयरलाइन्सले भदौ १२ बाट ओसाका उडान गर्दैछ।
विमानस्थलको ट्याक्सी वे, ट्याक्सी वे र रन-वे बीचको लिंक रोड जोड्ने कामका लागि प्राधिकरणले नोटाम जारी गर्दै विमानस्थलमा हुने उडान तथा अवतरण बन्द गर्न लागेको हो। साथै उक्त समयमा रन–वेमा लाइटिङको काम पनि हुने विमानस्थल कार्यालयका प्रमुख राजकुमार क्षेत्री बताउँछन्।
यसअघि चैत १८ गतेबाट असार १५ गतेसम्म बेलुका १० बजेदेखि बिहान ८ बजेसम्म विमानस्थलको सबै उडान तथा अवरतण बन्द गर्दै धावनमार्गको पिच परिर्वतनको काम भएको थियो। वर्षा सिजन सुरु भएसँगै दुई महिना रन–वे मर्मतको काम रोकिएको थियो। अहिले विमानस्थलको ३ हजार मिटरको रन-वेको पिच परिवर्तनको काम सकिएको छ।
दुई महिनादेखि रोकिएको काम अब पुनः सुरु हुन लागेको हो। अब विमानस्थल कार्यालयले डिसेम्बर ३१ सम्मका लागि उडान तथा अवतरण नगर्न नोटाम जारी गर्दै विमानस्थल रन–वे मर्मतको बाँकी काम सम्पन्न गर्ने जनाएको छ।
सन् १९७५ को दशकमा निर्माण भएको रन-वेको पिच पहिलो पटक परिवर्तन भएको हो। ३ हजार मिटर रन-वेको पिच परिर्वतनको काम सकिए पनि अझै एप्रोन, ट्याक्सी-वे र रन-वेदेखि ट्याक्सी-वे जोड्ने ठाउँको काम गर्न बाँकी छ। उक्त काम डिसेम्बसम्म सम्पन्न गर्नुपर्ने समयसीमा तोकिएको छ।
रन-वे मर्मतको काम सकिएसँगै विमानस्थल कार्यालयलले प्राधिकरण, संस्कृति, पर्यटन तथा नागरिक उड्डयन मन्त्रालय र एयरलाइन्स कम्पनीको सहयोगमा २४ घन्टा नै विमानस्थल सञ्चालनको तयारी गरेको छ। रन–वे मर्मतको काम सकिएसँगै भिजिट नेपालको पनि काम सुरु हुनेछ।
यसअघि ३ महिना लगाएर भएको पिच सुधारको काममा एयरलाइन्स कम्पनीहरुले पूर्णरुपमा सहयोग गरेका थिए। त्रिभुवन अन्तर्राष्ट्रिय विमानस्थलको रन–वे पिच परिर्वतन (रिह्याबिलिटेसन)को जिम्मा चिनियाँ सरकारी कम्पनी चाइना नेसनल एग्रो ट्रक्नोलोजी इन्टरनेसनल इन्जिनियरिङ कर्पोरेसनले पाएको छ।
निर्माण कम्पनीले बीचमा बन्द भएको दुई महिनाको समयमा दोस्रो चरणका लागि आवश्यक सामग्री संकलन समेत गरिरहेको छ। चिनियाँ निर्माण कम्पनीसँग करबाहेक ३ अर्ब ७५ करोड रुपैयाँ रन-वे पिच परिर्वतनका लागि सम्झौता भएको थियो।
रन-वे पिच परिर्वतनमा करसहित ४ अर्ब २७ करोड रुपैयाँ खर्च हुने प्राधिकरणले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
