सोल- उत्तर कोरियाले ‘छलजन्य व्यवहार’ गरेको भन्दै अमेरिकी विदेशमन्त्री माइक पोम्पेओले दिएको भनाइप्रति प्योङयाङले आलोचना गरेको छ। उसले वासिङ्टनसँग आणविक वार्ताका लागि गर्दै आएको अपेक्षा ‘बिस्तारै हराउँदै’ गएको बताएको छ।
अमेरिकी राष्ट्रपति डोनाल्ड ट्रम्प र उत्तर कोरियाली नेता किम जोङ उनबीच गत जुनमा कोरियाली प्रायदीपलाई आणविकरूपमा निशस्त्रीकरण गर्ने प्रयासस्वरूप आवश्यक प्रक्रियालाई निरन्तरता दिने सहमति भएको भए पनि अमेरिकी विदेशमन्त्री पोम्पेओद्वारा उत्तर कोरियाबारे आएका भनाइलाई लिएर प्योङयाङले आक्रोशजन्य टिप्पणी गरेको हो।
दुई देशका नेताबीच वार्तालाई निरन्तरता दिने सहमतिपछि पनि हालैका दिनहरूमा यसबारे कुनै प्रगति हुनसकेको छैन। तर, दक्षिण कोरियासँग अमेरिकी सेनाले संयुक्त सैन्य अभ्यास जारी राखेको भन्दै विरोधमा उत्तर कोरियाले पनि एकपछि अर्को गर्दै छोटो दूरीका हतियार परीक्षणलाई निरन्तरता दिएको थियो।
'अमेरिकासँग हामीले अपेक्षा गरेको वार्ता बिस्तारै हराउँदै गएको छ र अहिलेसम्म अपनाइएका उपायहरूलाई हामीले पुनः परीक्षण गर्न बाध्य पारिएको छ,' उत्तर कोरियाली उप–विदेशमन्त्री चो सोन हुईले जारी गरेको एक विज्ञप्तिलाई उद्धृत गर्दै उत्तर कोरियाली समाचार संस्था केसिएनएले जनाएको छ।
चोको भनाइ यसै हप्ताको सुरूमा अमेरिकी विदेशमन्त्रीले उत्तर कोरियाली गतिविधिलाई ‘छलकपटपूर्ण व्यवहार’को संज्ञा दिँदै यसलाई बेवास्ता गर्न नसकिने बताएपछि उत्तर कोरियाको यो भनाइ आएको हो।
नेता चोले भने, 'यो किसिमको भाषा असंगतपूर्ण, उत्तेजक र अपमानजनक थियो। अमेरिकाले हाम्रो धैर्यलाई परीक्षण गर्नु गलत छ। यसले पछि पछुताउनुपर्नेछ।'
उत्तर कोरियाको अमेरिकी कूटनीतिज्ञप्रतिको कटू आलोचना एक हप्तापछि पुनः दोहोरिएको छ। अघिल्लो साता पोम्पेओलाई सङ्केत गर्दै उनको बोली र व्यवहारमा समस्या रहेको भन्दै यसले वार्ताको सम्भावनालाई चुनौती दिएको बताइएको थियो। रासस/एएफपी
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
