काठमाडौं– आइसिसी विश्व क्रिकेट लिग डिभिजन–२ क्रिकेट प्रतियोगिताका लागि युएईमा तयारी गरिरहेको नेपाल तेस्रो अभ्यास खेलमा पराजित भएको छ। खराब ब्याटिङ गरेको नेपाललाई शुक्रबार भएको अभ्यास खेलमा युएई 'ए' टिमले ६४ रनले पराजित गरेको हो।
युएईले दिएको २ सय १६ रनको लक्ष्य पछ्याएको नेपाल ३८.५ ओभरमा १ सय ५१ रनमा अलआउट भयो। खराब सुरुवात गरेको नेपालका ओपनर दिलीप नाथ शून्य रनमा दोस्रो ओभरमै आउट भएका थिए। लगत्तै शरद भेषावकर १ रनमा आउट भएपछि नेपाल दबाबमा आयो।
ज्ञानेन्द्र मल्ल २४ रनमा पेभेलियन फर्के। कप्तान पारस खड्काले ४१ रन बनाएर नेपालको स्कोर उकास्न खोजे। तर त्यसपछिका ब्याट्सम्यानले उल्लेख्य रन बटुल्न सकेनन्। दीपेन्द्रसिंह ऐरी २६, अनिलकुमार साह २१ र आरिफ शेख १९ रनमै आउट भए। बसन्त रेग्मी ६ रन जोड्दा सोमपाल कामी र ललित भण्डारीले खाता खोल्न सकेनन्।
त्यसअघि दुबईस्थित आइसिसी ओभल टस जितेर पहिले ब्याटिङ गरेको युएईले ५० ओभरमा ९ विकेटको क्षतिमा २ सय १५ रन जोड्यो। युएईका लागि चिराग सुरीले सबैभन्दा बढी ८५ रनको योगदान दिए। सोमपाल कामीबाट बोल्ड हुनुअघि उनले १ सय २ बलको सामना गर्दै १० चौका प्रहार गरे। उनी गत सिजन आइपिएल टिम गुजरात लायन्समा आवद्ध थिए। युएईका लागि अतिरु रहमानले ३३ र अली मिर्जाले नटआउट ४२ रन जोडे।
बलिङतर्फ नेपालका सोमपाल कामीले ३ विकेट लिए। ललिल भण्डारीले २ विकेट हात पार्दा पारस खड्का, बसन्त रेग्मी र सन्दीप लामिछानले १–१ विकेट लिन सफल भए।
योसँगै नेपालले युएईमा अभ्यास सकेको छ। यसअघि नेपालले सुरुवाती २ खेलमा जित हात पारेको थियो।
नेपाल माघ २१ गते युएईबाट नामिबिया प्रस्थान गर्नेछ। माघ २५ गतेदेखि सुरु हुने डिभिजन–२ मा नेपालले पहिलो खेल नामिबियासँग खेल्नेछ।
डिभिजन–२ मा सहभागी हुने ६ वटै टिमले तयारी अन्तिम चरणमा पुर्याएका छन्। डिभिजन–२ मा नेपाल, नामिबिया, यूएई, केन्या, क्यानडा र ओमानले प्रतिस्पर्धा गर्दै छन्।
डिभिजन–२ को शीर्ष २ भित्र पर्ने टिमले एकदिवसीय विश्वकप छनोट प्रतियोगिता र इन्टरकन्टिनेन्टल कप खेल्ने अवसर पाउनेछन्। एकदिवसीय टिम मान्यताको समेत ढोका खुल्ने भएकाले डिभिजन–२ लाई महत्वपूर्ण प्रतियोगिताका रुपमा हेरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749307650.png)
-1749200817.png)
