इंग्ल्यान्ड- इंग्ल्यान्ड राष्ट्रिय क्रिकेट टोलीका अलराउन्डर बेन स्टोक्सलाई न्युजिल्यान्ड विरुद्धको ५ एकदिवसिय क्रिकेटका लागि टोलीमा छनोट गरिएको छ। फेब्रुअरी २५ बाट सुरु हुने शृंखलाका लागि इंग्ल्यान्ड र वेल्स क्रिकेट बोर्ड (इसिबी)ले उनलाई १५ सदस्यीय टोलीमा राखेको हो।
२८ वर्षीय क्रिकेटर स्टोक्स गत सेप्टेम्बरमा ब्रिस्टोल नाइट क्लबअगाडि भएको कुटपिटको घटनामा मुछिएका थिए। अदालतमा उनीमाथि सार्वजनिक स्थानमा सामूहिक कुटपिटमा सहभागी भई शान्ति सुरक्षा खल्बल्याएको आरोपमा फेब्रुअरी १३ सुनुवाइ हुँदैछ।
इसिबीको छनोट समितिले उनलाई यसअघि नै न्युजिल्यान्डसँगको टि–ट्वान्टी शृंखलाका लागि राष्ट्रिय टोलीको सदस्यका रुपमा छानेको थियो। तर स्टोक्सले भने सो घटनापश्चात् राष्ट्रिय टोलीबाट कुनै पनि खेल खेलेका छैनन्।
न्युजिल्यान्डसँग फेब्रुअरी १३ बाट टि–ट्वान्टी शृंखला सुरु हुनेछ। तर, सोही दिन ब्रिस्टोल मेजिस्ट्रेट कोर्टमा सुनुवाइ तोकिएपछि न्युजिल्यान्डसँगको पहिलो टि–ट्वान्टी खेल भने उनले गुमाउने छन्।
अदालतको सुनुवाइपछि न्युजिल्यान्डविरुद्ध फेब्रुअरी १८ मा ह्यामिल्टनमा हुने दोस्रो टि-ट्वान्टी खेलमा भने उनी सामेल हुन सक्ने बताइएको छ।
सुनुवाइका कारण उनले अष्ट्रेलियाविरुद्धको एसेस टेष्ट तथा ५ खेलको एकदिवसीय शृंखला पनि गुमाएका थिए। गत सेप्टेम्बरमा वेस्ट इन्डिजसँगको खेलपछि राष्ट्रिय टोलीको जर्सीमा मैदानमा नओर्लिएका स्टोक्सलाई इसिबीले गत डिसेम्बरमा न्युजिल्यान्डमा भएको घरेलु क्रिकेटमा भने सामेल हुन अनुमति दिएको थियो।
यही साता भएको इन्डियन प्रिमियर लिग (आइपिएल)को अक्सनमा उनी सबैभन्दा महंगो खेलाडिको रुपमा बिक्री भएका थिए। उनलाई राजस्थान रोयल्सले १२ करोड ५० लाख भारुमा किनेको थियो।
टि–ट्वान्टी तथा ५ एकदिवसीय शृंखलापश्चात् इंग्ल्याण्डले किवी टोलीसँग २ टेस्ट म्याच खेल्नेछ।
इंग्ल्यान्डको १५ सदस्यीय एकदिवसिय टोली: इयान मोर्गान(कप्तान), मोइन अली, जोनि ब्यअरस्टो, साम बिलिंग्स, जोस बटलर, टम कुरान, एलेक्स हेल्स, लियाम प्लुंकेट, अदिल रसिद, जोए रुट, जेसन रोए, बेन स्टोक्स, डेभिड विली, क्रिस ओएक्स र मार्क वुड।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
