काठमाडौं - युइएफए वर्ष खेलाडीको अवार्ड बिहीबार घोषणा हुँदैछ। जसमा इटालियन क्लब युभेन्टसका क्रिष्टियानो रोनाल्डो, इंग्लिस क्लब लिभरपुलका भर्जिल भ्यान डाइक र स्पेनिस क्लब बार्सिलोनाका लियोनल मेस्सीमध्ये एकले जित्नेछन्।
को खेलाडी उत्कृष्ट भन्ने बहस फुटबल प्रतियोगिताका रुपमा सुरु हुन थालेदेखि नै हो। अहिले उत्कृष्ट घोषणा गरेर अवार्ड नै दिने प्रचलनमा त अझ यसको महत्व बढीरहेको छ। विश्व फुटबललाई नियाल्नेहरु को उत्कृष्टको बहसमा सामाजिक सञ्जालमा नै बहस गरिरहेका हुन्छन्।
गएको वर्ष स्पेनिस क्लब रियल मड्रिडका लुका मोडरिकले जितेको अवार्डमा रोनाल्डो र मेस्सी पछि परेका थिए।
अहिले तीनैको हाराहारीमा भ्यान डाइक आउनुले विश्व फुटबलमा एकछत्र राज गरिरहेका रोनाल्डो र मेस्सी फेरि खालि हात हुनेछन् या उनीहरुको छायामा नै फुटबल जगत फर्कनेछ भन्ने बहस चलिरहेको छ।
जब विश्व फुटबलमा उत्कृष्ट खेलाडीको मनोनयन हुन्छ त्यसमा गएको दशकदेखि नै मेस्सी र रोनाल्डो छाइरहेका छन्। सन् २०११ मा युइएफएले युरोपियन स्पोर्टस् मिडियासँगको सहकार्यमा अवार्ड दिन थालेपछि रोनाल्डोले २०१४, २०१६ र २०१७ मा गरेर तीन पटक जितिसकेका छन्।
लियोनल मेस्सीले २०११ र २०१५ मा गरेर दुई पटक जितेका छन्। यसपटक पनि रोनाल्डोले युभेन्टसलाई सिरी ए जिताउँदा र मेस्सीले बार्सिलोनालाई ला लिगा जिताउँदा उनीहरु नै केन्द्रमा रहे।
मेस्सीले गएको सिजन ३१ जुलाई २०१८ देखि ३१ जुलाई २०१९ सम्ममा बार्सिलोनाबाट ५० र अर्जेन्टिनाबाट ८ गरेर ५८ खेल खेले। जसमा उनले ४ हजार २४ मिनेट मैदानमा बिताएका छन्। त्यसमा बार्सिलोनाबाट ५१ र अर्जेन्टिनाबाट ३ गरेर ५४ गोल हानेका छन्। त्यसलाई तुलनात्मक रुपमा हेर्ने हो भने उनले एक गोल गर्न सरदर ८६ मिनेट लगाएका छन्। मेस्सीले पोस्टमा प्रहार गरेको सट संख्या २८४ रहेको छ।
त्यही समयमा रोनाल्डोले युभेन्टसबाट ४३ र पोर्चुगलबाट ४ गरेर ४७ खेल खेलेका छन्। जसमा उनको खेल समय ३ हजार ९ सय ४६ मिनेट रहेको देखिन्छ। उनले युभेन्टसबाट २८ र पोर्चुगलबाट ३ गरेर ३१ गोल बनाए।
यसरी सरदरमा हेर्दा उनले एक गोलका लागि १ सय २७ मिनेट लगाएको देखिन्छ। उनले पोस्टमा प्रहार गरेको सट संख्या २ सय ५४ रहेको छ।
गएको वर्षको खेललाई गोलका आधारमा तुलना गर्ने हो भने रोनाल्डोभन्दा मेस्सी अगाडि देखिन्छन्। त्यसमा उनीहरुले एक गोलका लागि लगाएको सरदर समयले पनि मेस्सीको गोलको महत्व बढी देखिन्छ।
गोलमा बढ्ने दुई स्ट्राइकर रोनाल्डो र मेस्सीको तुलना गरिरहँदा डिफेन्डर भ्यान डाइकको भूमिकालाई कमजोर मान्न भने मिल्दैन। प्रिमियर लिगमा गएको सिजनदेखि लगातार ४९ खेलमा उनलाई छलाएर कसैले बल कटाउन सकेको थिएन। ५० औँ खेलमा गएको शनिबार आर्सनलका निकोलस पेपेले मात्र उनलाई काटेर बल अगाडि बढाएका थिए।
प्रिमियर लिगमा दोस्रो रहँदा मात्र होइन भ्यान डाइकले लिभरपुललाई गएको सिजन च्याम्पियन्स लिग जिताउँदा पनि महत्वपूर्ण भूमिका खेलेका थिए। नेदरल्याण्ड्सका भ्यान डाइकले यसअघि अवार्ड नजितेको भए पनि योपटक उनको नाममा समेत फुटबल पण्डितहरु जितको आँकलन गरिरहेका छन्। यसअघि कुनै पनि डिफेन्डरले यो अवार्ड नजितेका कारण पनि भ्यान डाइकले जितेमा छुट्टै इतिहास बन्नेछ।
भ्यान डाइक डिफेन्डरको भूमिकामा मात्र होइन गोल स्कोररमा पनि राम्रो देखिएका छन्। उनले गएको सिजन लिभरपुलबाट ५० र नेदरल्याण्ड्सबाट ९ गरेर ५९ खेल खेलेका थिए। जसमा उनले ९ गोल पनि गरे। चार गोलका लागि अवसर मिलाएर समेत उनले आफूलाई अब्बल देखाएका थिए।
लिभरपुलका लागि ४ हजार ४ सय ६५ मिनेट मैदानमा रहेका उनले आफू दुई खेलाडीमा बलका लागि संघर्ष हुँदा ७० प्रतिशत समय बलमा नियन्त्रण बनाएका छन्।
युइएफए वर्ष खेलाडीमा मात्रै होइन फिफा उत्कृष्ट खेलाडी र बालोन डि’ओर जस्ता अवार्डमा पनि यिनै खेलाडीको चर्चा चलिरहँदा बिहीबारको युइएफए वर्ष खेलाडीको विजेताको प्रभाव अझ बलियो बन्नेछ।
यसैले लिभरपुलका प्रशिक्षक जर्गेन क्लोपले भनेका छन्, ‘आधुनिक फुटबल यो सयममा स्ट्राइकर या डिफेन्डर भनेर रुमलिनु हुँदैन। लियोनल मेस्सी र क्रिष्टियानो रोनाल्डो मात्र होइन गएको वर्षको खेल हेर्ने हो भने भ्यान डाइक कुनै अर्थमा कम छैनन्। उनले अवार्ड जित्नु भनेको नयाँ खेलाडीलाई डिफेन्डर भएर पनि चल्न सकिन्छ भन्ने सन्देश दिनु पनि हो।’
२०११ मा मेस्सीले जितेको अवार्ड २०१२ मा आन्द्रेस इनिस्टाले जितेका थिए। २०१३ मा फ्रान्क रिबेरी, २०१४ मा रोनाल्डो, २०१५ मा मेस्सी, २०१६ मा र २०१७ मा रोनाल्डो साथै २०१८ मा लुका मोडरिकले जितेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
