काठमाडौं - नेपाली राष्ट्रिय फुटबल टिममा नयाँ कप्तान बनेका सुजल श्रेष्ठले टिमका सबै खेलाडी कप्तान जस्तै भएकाले आफूलाई दबाब नहुने बताएका छन्।
मलेसियाको लिग विजेता क्लब जोहोर दारुल टाजिम एफसीसँग मैत्रीपूर्ण खेलका लागि सुजललाई कप्तानी दिइएको हो।
मलेसिया जाने टोलीलाई अखिल नेपाल फुटबल संघ (एन्फा) मा एक कार्यक्रम गरी शुक्रबार बिदाइ गरिएको छ।
विश्वकप फुटबल छनोटअन्तर्गत दोस्रो चरणका खेल खेल्नुअघि नेपालले आगामी ९ गते जोहोर दारुल टाजिम एफसीसँग मलेसियामा मैत्रीपूर्ण खेल खेल्दैछ।
यसअघिका कप्तान विराज महर्जन टिममा नपरेपछि सुजललाई मैत्रीपूर्ण खेलका लागि कप्तान बनाइएको हो।
कप्तानको घोषणापछि सुजलले के भने ?
दुई महिनामा हाम्रो अभ्यास राम्रो भएको छ। टिमका लागि आवश्यक मैत्रीपूर्ण खेल पनि खेल्न जाँदै छौँ। समग्रमा टिम एकदमै राम्रो छ। प्रशिक्षकको भूमिका पनि राम्रो छ।
नेपालको राष्ट्रिय टिमको कप्तान हुन पाउनु खुसीको कुरा हो। तर, मलाई के लाग्छ भने टिममा हरेक खेलाडी नै कप्तान हुन्। हामी सेटमा खेल्ने ११ जनाले नै एकअर्कालाई सहयोग गर्दै बढ्ने नै हो। यसमा सबैको भूमिका महत्वपूर्ण हुन्छ। त्यसैले मलाई कप्तानको दबाब हुनेछैन।
जो टिममा हुनुहुन्न ती खेलाडीहरुले पनि आफ्नो समयमा निकै राम्रो गरेर जानुभएको हो। अहिले टिमका रहेका युवा खेलाडीले पनि टिमका लागि राम्रो गर्ने छौँ भन्ने लागेको छ।
मैत्रीपूर्ण खेल पनि हामीभन्दा माथिल्लो स्तरको टिमसँग नै भएकाले त्योसँग कसरी खेल्ने हो भन्ने हाम्रो तयारी छ। विशेष गरी हाम्रो डिफेन्स लाइन बलियो छ। फरवार्ड लाइनमा अलिकति सुधार गर्ने हो भने राम्रो हुनेछ भन्ने लाग्छ।
यस्तै खाले अभ्यास खेल अझ खेल्न पाएको भए राम्रो हुन्थ्यो भन्ने लागेको छ। मलेसियामा हाम्रो खेलबाट पनि केही रणनीतिहरु बन्नेछ। आफूलाई प्रमाणित गर्ने चुनौती पनि छ। त्यसैले सबैले राम्रो गर्छन् भन्ने लाग्छ।
के भन्छन् नेपाली टिमका प्रशिक्षक योहान कालीन ?
हामीले सक्नेसम्म राम्रो अभ्यास गरेका छौँ। हामीले मलेसियन टिमसँग अभ्यास खेल खेल्न पाउनु राम्रो टिम हो। त्यसले टिममा सकरात्मक परिवर्तन ल्याउनेछ। खेलाडीहरुले अभ्यासमा राम्रो मेहनत गरेका छन्। उनीहरुको मेहनत मैदानमा देखिनेछ भन्ने लाग्छ।
अभ्यास खेल भए पनि मलेसियन क्लबसँग हामीले राम्रो खेल्नुपर्छ भन्ने लाग्छ। त्यसले विश्वकप छनोटमा पनि सहयोग गर्नेछ। हामीले पहिले नै बलियो टिमसँग खेल्न चाहेको हौँ जुन मिलेको पनि छ।
नेपाली टिम राम्रो फाइट गर्ने टिम हो। खेलाडीहरु हार मान्दैनन्। त्यो राम्रो कुरा हो। उनीहरुको त्यो स्वभाव अभ्यासका बेला मैले नियालेको छु। हामी राम्रो भनेका टिमलाई पनि प्रतिस्पर्धा दिन सक्छौँ भन्ने लागेको छ। नतिजा के हुन्छ भन्न सकिने कुरा होइन तर हामी राम्रो खेल्नेछौँ।
पहिलो खेल कुवेतसँग
नेपालले जोहोर एफसीसँगको मैत्रीपूर्ण खेल खेलेको १० दिनपछि भदौ १९ मा कुवेतसँग विश्वकप छनोट अन्तर्गतको खेल खेल्नेछ।
नेपाल र कुवेतबीच गएको मार्चमा भएको दुई खेलमा एउटा गोलरहित बराबरीमा टुंगिएको थियो भने अर्कोमा नेपाल १–० ले पराजित भएको थियो।
विश्वकप छनोटमा कुवेतसँगको खेलपछि नेपालले चाइनिज ताइपेइसँग भदौ २४ गते चाइजिन ताइपेइमा नै खेल्नेछ। असोज २८ गते जोर्डनसँग जोर्डनमा नै खेल्नेछ। मंसिर ३ गते कुवेतसँग दशरथ रंगशालामा, चैत १३ गते चाइनिज ताइपेइसँग दशरथ रंगशालामा खेल्नेछ। आउँदो वर्ष जेठ २२ गते दशरथ रंगशालामा जोर्डनसँग खेल्नेछ।
यस्तै नेपालले अस्ट्रेलियासँगको पहिलो खेल अस्ट्रेलियाको मैदानमा असोज २३ गते र अस्ट्रेलियासँग दशरथ रंगशालामा चैत १८ गते खेल्नेछ।
फिफा वरीयताको एसियाली राष्ट्रमा शीर्ष ३४ भित्र पर्दै नेपालले विश्वकप छनोटको दोस्रो चरणमा सिधै स्थान बनाएको थियो। जसमा अप्रिलमा भएको वरीयताअनुसार एसियाली राष्ट्रभित्र नेपाल ३४औं स्थानमा नै थियो।
दोस्रो चरणमा रहेका ८ समूह विजेताका साथै ४ उत्कृष्ट उपविजेता गरी १२ टिम विश्वकप छनोटको अन्तिम चरणमा पुग्नेछन्। यी १२ टिमले नै सन् २०२३ मा हुने एसियन कपमा स्थान बनाउने भएकाले पनि प्रतियोगिताको महत्व बढेको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।