काठमाडौं- यस वर्षको खेमराज स्रष्टा सम्मान जनगायक रामेशलाई प्रदान गरिएको छ।
लोकप्रिय गायक स्व खेमराज गुरुङको तेस्रो स्मृति दिवशका अवसरमा खेमराज गुरुङ ट्रस्टले सो सम्मान जनगायक रामेशलाई प्रदान गरेको हो।
'गाउँ–गाउँबाट उठ, बस्ती–बस्तीबाट उठ', 'एक जुगमा एकदिन एकचोटि आउँछ' लगायतका गीतमार्फत परिवर्तनका पक्षमा बलियो जनमत सिर्जना गर्न सफल रामेशलाई नगद ५० हजार रुपैयाँसहितको खेमराज स्रष्टा सम्मान प्रदान गरिएको हो।
विगत पाँच दशकभन्दा लामो समयदेखि जनपक्षीय गीत/संगीतमार्फत पुर्याएको योगदानको कदर गर्दै रामेशलाई सम्मान गरिएको ट्रस्टले जनाएको छ।
यसअघि यो सम्मान वरिष्ठ गीतकार रत्न शमशेर थापा र संगीतकार प्रकाश गुरुङलाई प्रदान गरिएको थियो।
त्यस्तै, ट्रस्टले स्मृति दिवसका अवसरमा खेमराज प्रतिभा पुरस्कार सुसन लामालाई प्रदान गरेको छ। काभ्रेको चौरी देउराली गाउँपालिकाका लामा २०४७ सालमा प्रतिभाको डबलीमार्फत सिर्जना यात्रामा लागेका हुन्।
यसअघि प्रतिभा सम्मान पहिलो स्मृति दिवसमा गायिका मेलिना राई र गत वर्ष संगीतकार तथा गायक ओमप्रकाश राईलाई प्रदान गरिएको थियो।
प्रमुख निर्वाचन आयुक्त दिनेशकुमार थपलियाको प्रमुख आतिथ्यमा नेपाल प्रज्ञा प्रतिष्ठानमा सम्पन्न स्मृति सभामा प्रतिष्ठानका सदस्यसचिव श्याम तमोट, सिक्किम सरकारका पूर्वमन्त्री गर्जमान गुरुङलगायतको सहभागिता रहेको थियो।
चर्चित गायक राजेश पायल राईले गायक खेमराज गुरुङले नेपाली गीतसंगीतको क्षेत्रमा पुर्याएको योगदानको चर्चा गरेका थिए। कार्यक्रम ट्रस्टका संरक्षक एवम् स्व गुरुङकी आमा तुलसीमाया गुरुङको अध्यक्षतामा सम्पन्न भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791950786-1793201567.png)
-1786602170.png)
