काठमाडौं– माघ २५ गतेदेखि नामिबियामा हुने आइसिसी विश्व क्रिकेट लिग डिभिजन–२ प्रतियोगिताको तयारीका लागि युएईमा रहेको नेपालले पहिलो अभ्यास खेलमा सफलता हात पारेको छ।
मंगलबार दुबईको आइसिसी ओभलमा भएको अभ्यास खेलमा नेपालले युएईको 'ए' टिमलाई २५ रनले पराजित गरेको हो।
नेपालले दिएको २ सय ४७ रनको लक्ष्य पछ्याएको युएई ४८.४ ओभरमा २ सय २१ रनमा अलआउट भयो। यूएईका लागि निल लोबोले सवैभन्दा बढी ५९ रन बटुले। चिराग सुरीले ४५ रन र फहाद नवाजले ३६ रनको योगदान दिए। यस्तै वासि साह र अन्स टन्टनले १७–१७ रन जोडे।
बलिङतर्फ नेपालका कप्तान पारस खडकाले ५ विकेट लिए। दीपेन्द्रसिंह ऐरीले ३ विकेट लिँदा ललित भण्डारी र करण केसीले १–१ विकेट हात पारे।
त्यसअघि टस जितेर पहिले ब्याटिङ गरेको नेपाल ३ बल खेल्न बाँकी छदा २ सय ४६ रनमा अलआउट भएको थियो। नेपालका लागि ओपनिङ ब्याट्सम्यान दिलीप नाथले सबैभन्दा बढी ६१ रनको योगदान दिए। उनले ६० बलमा ९ चौका र १ छक्का प्रहार गरे।
नवौं नम्बरमा ब्याटिङ गरेका करण केसीले आक्रमक ब्याटिङ गर्ने क्रममा १६ बलमा ३५ रन जोडे। उनले ४ चौका र २ छक्का हिर्काए। रोहित कुमार पौडेलको ४३ रन पनि नेपालका लागि महत्वपूर्ण सावित बन्यो। रोहितले ५१ बल खेलेर ६ चौका प्रहार गरे।
अनिल कुमार साहले ३१ रन जोड्दा पारस खड्का २० रनमा आउट भए। बसन्त रेग्मीले २१ रनको योगदान दिए। बलिङतर्फ युएईका लक्ष्मण श्रीकुमारले ३ विकेट लिए। मोहमद क्वासिम र कार्तिक मायाप्पनले २–२ विकेट हात पारे।
अब नेपालले दुबई बसाइका क्रममा २ अभ्यास खेल खेल्नेछ।
माघ अन्तिम सातादेखि नामिबियामा हुने आइसिसी विश्व क्रिकेट लिग डिभिजन–२ मा सहभागी हुने ६ वटै टिमले तयारी अन्तिम चरणमा पुर्याएका छन्। डिभिजन–२ मा नेपाल, नामिबिया, यूएई, केन्या, क्यानडा र ओमानले प्रतिस्पर्धा गर्दै छन्।
डिभिजन–२ को शीर्ष २ भित्र पर्ने टिमले एकदिवसीय विश्वकप छनोट प्रतियोगिता र इन्टरकन्टिनेन्टल कप खेल्ने अवसर पाउनेछन्। एकदिवसीय टिम मान्यताको समेत ढोका खुल्ने भएकाले डिभिजन–२ लाई महत्वपूर्ण प्रतियोगिताका रुपमा हेरिएको छ।
नेपाल माघ २१ गते युएईबाट नामिबिया प्रस्थान गर्नेछ। माघ २५ गतेदेखि सुरु हुने डिभिजन–२ मा नेपालले पहिलो खेल नामिबियासँग खेल्नेछ।
नेपाली टिम
पारस खड्का (कप्तान), ज्ञानेन्द्र मल्ल, शक्ति गौचन, बसन्त रेग्मी, शरद भेषावकर, सोमपाल कामी, करण केसी, आरिफ शेख, सन्दीप लामिछाने, दीपेन्द्रसिंह ऐरी, दिलीप नाथ, ललित भण्डारी, अनिलकुमार साह, रोहितकुमार पौडेल
वैकल्पिक खेलाडी– सुनिल धमला, ललित राजवंशी, सिद्धार्थ लोहनी, किशोर महतो
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
