दिल्ली– भारतको नयाँ दिल्लीमा जारी इन्डियन ओपन अन्तर्राष्ट्रिय बक्सिङ प्रतियोगितामा नेपालकी पुनम रावलले पदक जितेकी छिन्। मंगलबार महिला लाइट वेल्टर ६४ केजी तौल समूहमा पुनमले नेपाललाई कास्य पदक दिलाएकी हुन्।
दिल्लीस्थित त्यागराज स्पोर्ट्स कम्प्लेक्समा भएको क्वाटरफाइनलमा पुनमले ताजकिस्तानकी खोलोभा इडीमोखलाई अंकको आधारमा पराजित गर्दै कास्य पदक पक्का गरेकी हुन्। पुनमले ताजिकिस्तानकी इडीमोखमाथि ५–० को जित निकालेकी थिइन्। अब पुनमले सेमिफाइनलमा भारतीय खेलाडीसँग प्रतिपर्धा गर्ने छिन्। उक्त खेलमा पराजित भएपनि पुनमले कास्य पदक प्राप्त गर्ने छिन्।
पुनमको यो पहिलो अन्तर्राष्ट्रिय पदक हो। पुनमले दोस्रो अन्तर्राष्ट्रिय सहभागितामा नेपाललाई पदक दिलाएकी हुन्। जितपछि पुनमले नेपाललाई पदक दिलाउन पाउदा गर्व लागेको बताईन् । उनले भनिन् ,"एकदम खुशी छु । नेपालको लागि पदक जित्न पाउदा, अब नेपालको लागि स्वर्ण जित्ने योजनामा छ ।"
प्रतियोगितामा पुनमले जितेको यो पदक नेपालको यो दोस्रो पदक हो । यसअघि नेपालकी विमला श्रेष्ठले कास्य पदक पक्का गरेकी छिन् ।
मंगलबार भएको अर्को क्वाटरफाइनल खेलमा भने नेपालकी सरस्वती राना मगर पराजित भएकी छिन् । मिडल ७५ केजी तौल समूहकी सरस्वती भारतीय खेलाडी स्विटी बूरासँग अंकको आधारमा ५ – ० ले पराजित भईन ।
प्रतियोगिता अन्तर्गत नै मंगलबार नेपालका तीन पुरुष खेलाडीले प्रतिस्पर्धा गर्न बाँकी छ । पुरुषतर्फ मनोहर (म्याक्स) बस्नेत, भुपेन्द्र थापा मगर र बिष्णु प्रसाद घलेले खेल्न बाँकी छ । पुरुषतर्फको खेल बेलुका ६ बजेपछि हुने आयोजकले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
