दुबई- सन् २०२० को टि–ट्वान्टी विश्वकप क्रिकेट प्रतियोगिता अस्ट्रेलियामा हुने भएको छ। अन्तर्राष्ट्रिय क्रिकेट परिषद्(आइसिसी)ले खेलहरु हुने स्थान समेत तोकेको छ। आज बिहान दुबईमा बसेको आइसिसीको बैठकले महिला र पुरुष दुवैतर्फको प्रतियोगिता पहिलो पटक एकै वर्ष एउटै देशमा आयोजना गर्ने पनि निर्णय गरेको छ।
आइसिसीको निर्णयअनुसार अस्ट्रेलियाका विभिन्न ८ शहरमा खेलहरु हुनेछन्। खेल हुने ८ शहरहरुमा एडिलेड, ब्रिस्बेन, क्यानवेरा, गिलङ, होवार्ट, मेलवर्न, पर्थ तथ सिड्नी रहेका छन्।
महिला र पुरुष दुवैतर्फको विश्वकप फाइनल भने अस्ट्रेलियाको सबैभन्दा बढि सिट क्षमता भएको मेलवर्न क्रिकेट ग्राउन्ड(एमसिजी)मा हुनेछ। यसअघि सन् २०१५ मा भएको एकदिवसिय विश्वकप क्रिकेटको फाइनल खेलमा हालसम्मकै सबैभन्दा धैरै ९३ हजार १३ जना दर्शक एमसिजी पुगेका थिए।
खेल हेर्न धेरै दर्शकको उपस्थिती रहोस् भन्न सन् २०२० को अन्तर्राष्ट्रिय नारी दिवस मार्च ८ कै दिनमा महिला विश्वकपको फाइलन खेल तय गरिएको आइसिसीका प्रमुख कार्यकारी डेभिड रिचर्डसनले बताए। दुवै फाइनलका लागि प्रवेश टिकटको मूल्य समेत समान राखिएको छ।
हालसम्म महिलाहरुको कुनै पनि खेलमा दर्शकको उपस्थितीलाई आँकलन गर्ने हो भने सन् १९९९ मा अमेरिकाको क्यालिफेर्नियामा भएको महिला विश्वकपको फाइनल खेल हेर्न सर्वाधिक ९० हजार १ सय ८५ दर्शक उपस्थित भएका थिए।
महिलातर्फको सेमिफाइनल सिड्नी क्रिकेट ग्राउण्ड(एससिजी)मा हुने आइसिसीले जनाएको छ। पुरुषतर्फको खेल भने (एससिजी) र एडिलेड ओभल मैदानमा गरि २ स्थानमा हुनेछन्।
आजको निर्णयले पुरुषलाई जत्तिकै महिला क्रिकेट खेलाडिलाई पनि एकैसाथ आफ्नो योग्यता पस्केर विश्वको ध्यान खिच्न वातावरण बनाइदिएको छ।
क्रिकेट अस्ट्रेलियाका तथा विश्वकपको स्थानीय आयोजन कमिटिका अध्यक्ष डेभिड पिभरले विश्वकप आयोजना गर्न अष्ट्रेलिया उत्सुक रहेको बताए। उनले सन् २०२० को टि–ट्वान्टी विश्पकप क्रिकेटले विश्वका सबै समुदायलाई एकै ठाउँमा गाँस्न र नयाँ पुस्तालाई क्रिकेटप्रति आकर्षित गर्न अवसर दिने बताए।
प्रतियोगिताअन्तर्गत महिलातर्फको खेल फेब्रुअरी २१ देखि मार्च ८ सम्म तथा पुरुषतर्फको खेल भने अक्टोबर १८ देखि नोभेम्बर १५ सम्म चल्नेछ।
महिलातर्फ विश्वका उत्कृष्ट १० देशको सहभागिता रहने प्रतियोगितामा पुरुषतर्फ भने १६ देश सामेल हुँदैछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
