भैरहवा- नेपाली कांग्रेसका ४ सय महाधिवेशन प्रतिनिधिलाई प्रशिक्षण दिइएको छ। प्रदेश ५ का १२ जिल्लाका ४ सय जना महाधिवेशन प्रतिनिधिलाई कांग्रेसको इतिहास, वर्तमान बाम सरकारको कमजोरी, असल नागरिक बन्ने अभियान, काग्रेससँग नागरिक र नागरिकसँग कांग्रेसका विषयमा प्रशिक्षण दिइएको हो।
नेपाली कांग्रेस केन्द्रीय नीति, अनुसन्धान तथा प्रशिक्षण प्रतिष्ठानले आगामी महाधिवेशन, उपनिर्वाचन र आगामी निर्वाचनलाई केन्द्रित गरेर महाधिवेशन प्रतिनिधिलाई प्रशिक्षण दिएको हो।
प्रशिक्षणमा कांग्रेसले अहिलेसम्म आफ्नो नेतृत्वमा गरेका तथा भएका सामाजिक, सांस्कृतिक र राजनीतिक आन्दोलनको विश्लेषणसमेत गरिएको थियो।
प्रतिष्ठानका कार्यकारी निर्देशक पुरुषोत्तम दाहालले प्रशिक्षणले नेपाली कांग्रेसका महाधिवेशन प्रतिनिधिलाई तेजिलो बनाएको दाबी गरे। उनले आगामी दिनमा नेपाली काग्रेंस र कांग्रेसको सिद्धान्त अझै चम्किने उल्लेख गरे।
उनले ७ वटै प्रदेशमा आयोजना गरिएको प्रशिक्षणले कांग्रेसलाई फेरि उर्जाशील बनाउनुका साथै कांग्रेसको अभियान गाँउ-गाँउसम्म पुग्ने तथा टोलटोलमा लहर ल्याउने जिकिर गरे।
तीनै तहको सरकारमा नै कांग्रेसको पराजयका किन र के कारणले भयो भन्ने विषयमा समेत प्रशिक्षणमा महाधिवेशन प्रतिनिधिलाई अवगत गराइएको थियो। मुलतः अंक गणितीय हार र सैद्धान्तिक विजयका विषयमा पनि प्रशिक्षणमा बहस तथा छलफल भएको प्रतिष्ठानका सदस्य प्रमोदहरि गुरागाईंले बताए।
दुई दिनसम्म चलेको प्रशिक्षणमा डा जगदिश चन्द्र पोखरेल, डा गोविन्द पोखरेल, डा आरजु देउवा, केशब निरौला, पुरुषोत्तम दाहाल, राजु नेपाल लगायतले प्रशिक्षण दिएका थिए। प्रशिक्षण मंगलबार समापन गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
