काठमाडौं- सञ्चारकर्मी शालिकराम पुडासैनीको आत्महत्या प्रकरणमा टिभी कार्यक्रम प्रस्तोता रवि लामिछानेसहित ३ जनालाई थप ५ दिन थुनामा राख्न म्याद थप भएको छ।
जिल्ला अदालत चितवनले लामिछानेसहित अस्मिता कार्की र युवराज कँडेलमाथि थप अनुसन्धानका लागि आजबाट फेरि ५ दिन समय थप गरेको हो। न्यायाधीश गायत्रीप्रसाद रेग्मीको इजलासले थप ५ दिन थुनामा राखी अनुसन्धान अगाडि बढाउन अनुमति दिएको हो।
यसअघि गत बिहीबारदेखि ५ दिन थुनामा राख्न प्रहरीले अनुमति पाएको थियो।
तीनै जनाको बयान आज सकिएको छ। अब उनीहरुविरुद्ध प्रहरीले थप अनुसन्धान गरी अभियोगपत्र दायर गर्नेछ।
उनी मुलुकी फौजदारी संहिताअन्तर्गत आत्महत्यामा दुरुत्साहन गरेको कसुरमा उनीहरु अनुसन्धानका लागि पक्राउ परेका थिए।
पुडासैनीले आत्महत्याअघि गरेको भिडियो रेकर्डमा लामिछानेसहित कँडेल कार्कीको नाम लिएका थिए। सोही भिडियोका आधारमा पत्रकार पुडासैनीलाई आत्महत्या गर्न दुरुत्साहन गरेको विषयमा अनुसन्धान गर्न जिल्ला प्रहरी कार्यालय चितवनले बिहीबार उनीहरुलाई काठमाडौबाट पक्राउ गरी चितवन लगेको थियो।
लामिछाने न्युज २४ टेलिभिजनको कार्यक्रम 'सिधा कुरा जनतासँग'का प्रस्तोता हुन् भने कँडेल पनि सोही कार्यक्रमसँग आबद्ध पत्रकार हुन्।
जिल्ला अदालतमा प्रहरीको तर्फबाट जिल्ला सरकारी वकिल कार्यालयका जिल्ला न्यायधिवक्ता यदुनाथ शर्माले बहस गरेका थिए भने रविलगायतको पक्षबाट अधिवक्ता सुनिलकुमार पोखरेलसहितले बहस गरेका थिए।
चितवनको नारायणढस्थित पोखरा बसपार्कमा रहेको होटेल कंगारुमा पुडासैनी साउन २० गते झुन्डिएको अवस्थामा मृत फेला परेका थिए।
सम्बन्धित
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।