काठमाडौं- पाँचौँ एभिसी एसियन सेन्ट्रल जोन भलिबलको पहिलो खेलमा नै नेपाल कीर्गिस्तानसँग पराजित भयो। बलियो टोलीसँग नेपाली खेलाडीको तालमेल नमिल्नु र अग्ला स्पाइकरको सटमा ब्लक कमजोर हुनुका दुःखमा खुसी हुने एउटै कारण थियो, दर्शकको साथ।
नेपाल पहिलो खेलमा नै कीर्गिस्तानसँग ३-० को सोझो सेटमा हारेको हो। सैनिक शारीरिक तालिम तथा खेलकुद केन्द्र लगनखेलमा भएको खेलमा २५-२३, २५-२२ र २५-२२ को सेटमा नेपाल हारेको हो।
दुई वर्षअघिको विजेता टिम कीर्गिस्तानसँग यसअघि पनि नेपाली टिमको खेल कमजोर रहने गरेको भए पनि घरेलु कोर्टमा अवस्था केही भिन्न हुने अनुमान भइरहेको थियो। तर, नेपालले एक सेट पनि जित्न सकेन।
नेपाल भलिबल संघको आयोजना र एसियन भलिबल संघको संयोजनमा भइरहेको प्रतियोगितामा नेपाली दर्शकको उपस्थिति उल्लेखनीय रह्यो। अफगानिस्तानसँगको मैत्रीपूर्ण खेलदेखि नै भरिएको हल प्रतियोगिताकै खेलका बेला त अटसमटस नै देखियो।
नेपाल भलिबल संघले टिकटको व्यवस्था नगरे पनि पहिले पुग्ने दर्शकका लागि खेल हेर्न मिल्ने व्यवस्था गरेको थियो। कीर्गिस्तानसँगको पहिलो खेलमा नै धेरै दर्शक ठाउँ भरिएकाले बाहिरबाटै फर्किरहेका थिए।
दर्शकको अथाह भिडलाई व्यवस्थान गर्न आयोजक चुकिरहेको देखिन्थ्यो। सैनिक तालिम केन्द्रको गेटबाहिर लागेको भिड र भलिबल भइरहेको कभर्ड हल बाहिरको भिडले नेपाली भलिबलप्रतिको माया देखिए पनि त्यसलाई कसरी व्यवस्थित गर्ने भन्ने योजना भने देखिएन।
‘भलिबल हेर्न पाइन्छ भनेर काभ्रेदेखि आइयो तर भित्र छिर्न पाइएला जस्तो छैन। ढोकाबाट हेर्न दिए पनि हुने हो तर ढोकामा नै बस्ने ठाउँ छैन भन्दै छन्’ बाहिर गेटमा भेटिएका रबिन सुन्दासले सुनाए।
नेपाली दर्शकको भिड र खुट्टा अट्ने ठाउँसमेत नदेख्दा विदेशी प्रशिक्षक र पदाधिकारी भने दंग थिए। यसैले कीर्गिस्तान टिमका प्रशिक्षक एनकुदिनोभ एन्ड्रीले खेलबारे गरिएको प्रश्नमा पहिले नै भनिहाले, ‘नेपाली दर्शकलाई धेरै धन्यबाद असाध्यै राम्रो उपस्थिति भएको छ। यसमा धेरै खुशी छु।’
उनले खुसी हुँदै अगाडि भने, ‘यतिका दर्शक खेलका लागि आउनु सानो कुरा होइन। अरु देशमा खेल्दा यत्तिका दर्शक हुँदैनन्। यो समर्थन पाउँदा खेल हारे पनि नेपाली टिम पनि खुसी हुनुपर्छ।’
‘माल्दिभ्ससँगको खेलबाट नेपाल अगाडि बढ्ने ठाउँ अझै छ। सुधार गर्ने ठाउँ सबै टिममा नै हुन्छ। हार्ने र जित्ने दुवैमा। यदि कोचले टिमसँग सन्तुष्ट छु भन्छ भने सुधार हुनै छाड्छ त्यसैले हामीले पनि सुधार गर्न सक्ने ठाउँ धेरै छ’ नेपालले पनि राम्रो खेलेको हो भन्दै कीर्गिस्तानका प्रशिक्षकले भने ।
नेपाली टिमका प्रशिक्षक हान अबिङ भने आफूहरुले खेल्नुपर्ने जस्तो खेल खेल्न नसकेको बताउँछन्। कीर्गिस्तान टिमलाई बधाई दिँदै उनले भने, ‘उनीहरुले राम्रो खेलेका हुन्। खेल धेरैजसो उनीहरुकै नियन्त्रण रह्यो। हामीले जस्तो खेल्नुपर्ने हो त्यस्तो भएन।’
अफगानिस्तानसँगको मैत्रीपूर्ण खेलमा जस्तो खेलेर मात्रै पुग्दैन भन्ने आफूहरुले बुझेको भए पनि त्योअनुसार नभएको भन्दै प्रशिक्षक अबिङले भने, ‘उनीहरु हामीभन्दा धेरै जम्प गर्छन्, त्यसैले पनि ब्लक राम्रो हुन सकेन। उनीहरुको स्पाइक निकै राम्रो हो।’
‘हाम्रो खेलमा अझ ‘इमोसन’ पुगेको छैन। दर्शकबाट पनि त्यो हुटिङ र उत्साहको अझ जरुरी छ। हार होस या जित खेलको उत्साह भने रहिरहनु पर्छ। हामीले अब माल्दिभ्ससँगको खेल जित्नै पर्छ र जित्न चाहन्छौँ पनि। हरेक खेललाई विचार गरेर खेल्नुपर्छ हामीले माल्दिभ्सलाई हराउने सम्भावना पनि राम्रो छ’ उनले भने।
नेपालले समूह चरणको दोस्रो खेलमा बुधबार बेलुका पाँच बजे माल्दिभ्ससँग खेल्नेछ। नेपालको समूहमा तीन देश मात्रै रहेकाले माल्दिभ्सलाई जित्न सके नेपाल सेमिफाइनलमा पुग्ने छ।
थप तस्बिरमा दर्शकको उत्साह
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।