राजविराज– पूर्व–पश्चिम राजमार्ग अन्तर्गत सप्तरीको खडग नगरपालिका–४ अमाहामा माघ १२ गते बिहान तीनवटा ट्रक आपसमा ठोक्किए। घटनामा ना ४ ख ५५५६ नम्बरको ट्रकका चालक उदयपुरको त्रियुगा नगरपालिका ४ का ४० वर्षीय कविराज माझीको घटनास्थलमै ज्यान गयो।
पश्चिम जाँदै गरेको ना ४ ख ५५५६, ना २ ख ८७३० र विपरीत दिशाबाट आएको ना ४ ख १८३५ नम्बरको ट्रक आपसमा ठोक्किँदा घाइते भएका ६ मध्ये त्रियुगा नगरपालिका वडा–४ का साइला दनुवार, सञ्जना दनुवार, रञ्जु माझी र निरबहादुर माझीको अहिले पनि विराटनगर स्थित न्युरो अस्पतालमा उपचार भइरहेको छ।
पुस १८ गते कोसी मेला भरेर फर्केका यात्रु बोकेको स१त ३३१८ नम्वरको ट्याक्टर शम्भुनाथ नगरपालिका–१ मा दुर्घटना भयो। ४० मध्ये २४ यात्रु घाइते भए। अधिकांश घाइते शम्भुनाथ नगरपालिकाकै बासिन्दा हुन्। सोही दिन डाक्नेश्वरी नगरपालिका १ कबिलाशावाट कठौना जाँदै गरेको स ४ प १२१९ नम्बरको मोटरसाइकल दुर्घटनामा परी चालक २५ वर्षीय दिपेश चौधरी र पछाडि बसेका २३ वर्षीय दीपक चौधरीको मृत्यु भयो। शम्भुनाथ नगरपालिका–१० स्थित कठौना–पातो सडकखण्डमा बा २४ प २८६१ नम्बरको मोटरसाइकलले ओभरटेक गर्ने क्रममा ठक्कर दिएपछि दुवै मोटरसाइकल दुर्घटनामा परेका थिए।
घाइते भएका दुवै जनाको सिरहाको लहानस्थित सप्तऋषि अस्पतालमा उपचारका क्रममा मृत्यु भयो। सोही राति ना३ख १२६५ नम्बरको यात्रुबस रुपनी गाउँपालिका ५ मा दुर्घटना हुँदा सुरुंगा नगरपालिका ४ मधुपट्टीकी ४८ वर्षीया सुशीला चौधरीसहित ५ जना घाइते भए। सामान्य उपचारपछि उनीहरु घर फर्किए।
सप्तरीमा पछिल्लो समय सवारी दुर्घटनामा वृद्धि भएको देखाउने यी प्रतिनिधि घटना मात्रै हुन्। एकपछि अर्को गर्दै बढेका दुर्घटनाका कारण कतिपयले ज्यानै गुमाएका छन् भने कतिपय अंगभंग भएर बस्नुपरेको छ। चालु आवको बैशाखदेखि पुस मसान्तसम्ममा मात्रै सप्तरीमा कुल ३ सय २ वटा दुर्घटना भएका छन्। जसमा ५८ जनाको मृत्यु भएको छ। ३ सय ७४ जना घाइतेमध्ये १ सय ५८ जना गम्भीर घाइते भएका छन्। यस अवधिमा जम्मामा ४ सय ५८ सवारी साधन दुर्घटना भएको जिल्ला ट्राफिक प्रहरी कार्यालय शम्भुनाथका प्रमुख सुनिलकुमार श्रेष्ठले बताए। जसमा मोटरसाइकलको संख्या मात्रै २ सय ३० छ।
कार्यालयको रेकर्ड अनुसार आर्थिक वर्ष ०७३/०७४ मा जम्मा ३ सय ९२ सवारी दुघटना भएका थिए। जसमा ७० जनाको मृत्यु भएको थियो भने ६ सय २० जना घाइते भएका थिए।
सवारी साधनको बढ्दो चाप, जीर्ण बन्दै गएका सडक र ट्राफिक नियमको उलंघन गर्दै तीव्र गतिमा सवारी सञ्चालन, अनावश्यक ओभरटेक गर्ने सवारी चालक अनि असुरक्षित रुपमा बाटो काट्ने यात्रुका कारण सवारी दुर्घटनामा वृद्धि भएको ट्राफिक प्रहरी प्रमुख श्रेष्ठ बताउँछन्।
जिल्ला ट्राफिक प्रहरी कार्यालयले नियमित चेकजाँचका साथै तालिम, प्रशिक्षण, कारबाही तथा विभिन्न प्रकारका वैकल्पिक उपाय समेत प्रयोग गरिरहेको छ। लामो दूरीका सवारी साधनलाई रोकेर विस्तारै जानोस् भन्ने ‘एक मिनेट कार्यक्रम’, सवारी रोकेर चालकलाई मुख धुन लगाउने र फ्रेस बनाएर पठाउने ‘रिफ्रेसमेन्ट कार्यक्रम’, विद्यार्थी र अभिभावकलाई प्रशिक्षण, चालक–सहचालकलाई तालिम लगायतका विभिन्न कार्यक्रम नियमित रुपमा सञ्चालन भइरहेको छ।
यसैगरी, सवारी साधनको गति चेकजाँच गर्न राडर गनको प्रयोगलाई पनि प्राथमिकतामा राखिएको छ। तर, राडर गन पूर्वाञ्चलमा जम्मा १ थान मात्रै छ। मुस्किलले डेढ महिनामा एक हप्ताका लागि पालो आउने गरेकाले खासै अर्थपूर्ण नभएको ट्राफिक प्रहरीहरु बताउँछन्।
यति गर्दा पनि अटेर गर्ने सवारी र चालकलाई कारवाही समेत गरिएको ट्राफिक प्रमुख श्रेष्ठले बताए। उनका अनुसार माघ महिनामा मात्रै १ हजार ४ सय २७ सवारी साधन कारबाहीमा परेका छन् भने चालु आर्थिक वर्षमा कुल ११ हजार २ सय सवारीलाई कारबाही गरिएको छ। नियमित भइरहेका यस्ता क्रियाकलापले दुर्घटनालाई केही हदसम्म रोके पनि निमिट्यान्नै पार्ने सवालमा भने सवारी चालक र यात्रुले पनि सजग रहनुपर्ने उनको सुझाव छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779545841.jpg)
-1779537548.jpg)
-1764146706.png)
